எடப்பாடி பழனிசாமி முன்மொழிந்துள்ள வேட்பாளரை ஏற்கிறீர்களா அல்லது மறுக்கிறீர்களா என்ற விவரத்தை சொல்லுமாறு அனைத்து பொதுக்குழு உறுப்பினர்களுக்கும் அவைத்தலைவர் உத்தரவிட்டுள்ளார்.

அதிமுக பொதுக்குழு வழக்கு :

அதிமுக கடந்த ஜூலை 11 ஆம் தேதி நடந்த பொதுக்குழு கூட்டத்திற்கு பிறகு ஈபிஎஸ், ஓபிஎஸ் என இரண்டு அணிகளாக பிரிந்தது. மேலும் இது தொடர்பான வழக்கு உச்சநீதிமன்றத்தில் விசாரணையில் உள்ளது. 

தேர்தல் ஆணையம் மறுப்பு :

இந்நிலையில் ஈரோடு கிழக்கு தொகுதிக்கு வரும் பிப்ரவரி 27 ஆம் தேதி இடைத்தேர்தல் நடத்துவதாக தேர்தல் ஆணையம் அறிவித்தது. இந்த அறிவிப்புக்கு பிறகு தமிழ்நாட்டில் அரசியல் களம் சூடுபிடித்தது. அனைத்துக் கட்சிகளும் தங்களது நிலைப்பாட்டை அறிவித்து வந்த நிலையில், அதிமுக தரப்பில் இரண்டு வேட்பாளர்களை அறிவித்தனர். இதனால் அதிமுக சின்னம் எந்த அணிக்கு என்ற குழப்பம் நிலவிய நிலையில், அதிமுக இடைக்கால பொதுச்செயலாளராக எடப்பாடி பழனிசாமி கையொப்பமிட்ட வேட்பாளர் மனுவை தேர்தல் ஆணையம் மறுத்துவிட்டது.

பொதுக்குழுவை கூட்டி வேட்பாளரை தேர்வு செய்ய வேண்டும் :

இதன்காரணமாக, ஈபிஎஸ் தரப்பு அதிமுக பொதுக்குழு வழக்கில் இடைக்கால உத்தரவு வழங்கக்கோரி உச்சநீதிமன்றத்தில் மனுதாக்கல் செய்தார். இந்த மனுவை விசாரித்த உச்சநீதிமன்ற நீதிபதிகள், ஈபிஎஸ் மற்றும் ஓபிஎஸ் தரப்பு ஆதரவாளர்கள் அனைவரையும் உள்ளடக்கிய பொதுக்குழுவை கூட்டி வேட்பாளரை தேர்வு செய்ய வேண்டும் என்று இடைக்கால உத்தரவு பிறப்பித்தது.

இதையும் படிக்க : இல்லந்தோறும் ஒலித்த குரல்...இன்று சென்னை பெசன்ட் நகரில்...!

தமிழ்மகன் உசேன் அனுப்பிய கடிதம் :

இந்த உத்தரவிற்கு பிறகு, பொதுக்குழு பொறுப்பாளராக நியமிக்கப்பட்ட அவைத்தலைவர் தமிழ்மகன் உசேன், அதிமுகவில் இருந்து நீக்கப்பட்ட ஓ.பன்னீர்செல்வம், வைத்திலிங்கம், ஜே சி டி பிரபாகர், மனோஜ் பாண்டியன் உள்பட அனைத்து பொதுக்குழு உறுப்பினர்களுக்கும் நேற்று கடிதம் அனுப்பினார். அந்த கடிதத்தில், ஈரோடு கிழக்கு தொகுதி இடைத்தேர்தலுக்காக எடப்பாடி பழனிசாமி முன்மொழிந்த வேட்பாளர் தென்னரசுவை ஏற்கிறீர்களா? அல்லது மறுக்கிறீர்களா? என்ற விவரத்தை இன்று மாலை 7 மணிக்குள்ளாக சொல்ல வேண்டும் என்று அனைத்து பொதுக்குழு உறுப்பினர்களுக்கும் அவைத்தலைவர் உத்தரவிட்டிருந்தார்.

அதிமுக பொதுக்குழு தேர்ந்தெடுக்கப்போகும் வேட்பாளர் யார் ?

இந்நிலையில், அவைத்தலைவர் அனுப்பிய கடிதம் ஓபிஎஸ்க்கும் சென்ற நிலையில், அதிமுக வேட்பாளராக தென்னரசுவை முன்மொழிந்துள்ள எடப்பாடி பழனிசாமியின் பதவி பற்றி எதுவும் கடிதத்தில் இல்லாததால் அவர் என்ன பொறுப்பில் இருக்கிறார் என ஓ.பன்னீர்செல்வம் தரப்பு கேள்வி எழுப்பியுள்ளனர்.  இதனால் அவைத்தலைவர் அனுப்பியுள்ள கடிதத்திற்கு ஓபிஎஸ் தரப்பு ஓகே சொல்லுமா? அதிமுக பொதுக்குழு தேர்ந்தெடுக்கப்போகும் வேட்பாளர் யார் ? என்ற குழப்பம் அரசியல் வட்டாரத்தில் எழுந்துள்ளது. 

19 மொழிகளில் 10 ஆயிரத்திற்கும் மேற்பட்ட பாடல்களை பாடி, தமிழர்களின் வாழ்வில் பிரிக்க முடியாத நபராக இணைந்து விட்ட வாணி ஜெயராமின் வாழ்க்கைப் பயணத்தை இப்போது பார்ப்போம்...  

தமிழர் உள்ளங்களில்:

1945-ம் ஆண்டு வேலூரில் கலைவாணி என்ற இயற்பெயரோடு பிறந்தவர் தான் வாணி ஜெயராம்.  1971-ம் ஆண்டு இந்தியில் வெளியான குட்டி படத்தில் போலே ரே பப்பி ஹரா என்ற பாடலின் மூலம் திரையுலகிற்கு அறிமுகமாகி,முதல் பாடலே அமோக வெற்றி பெற்றதைத் தொடர்ந்து இசையமைப்பாளர்களால் தேடப்படும் பாடகியாக உருவெடுத்தார்.  1974-ஆம் ஆண்டு கவிஞர் வாலி எழுத்தில் எம்.எஸ் விஸ்வநாதன் இசையில் ’ மல்லிகை என் மன்னன் மயங்கும் ‘ என்ற பாடலை பாடி தமிழர் உள்ளங்களில் நீக்கமற இடம்பிடித்தார். 

காந்த குரலால்:

ரோசாப்பூ ரவிக்கைக்காரி படத்தில் இவரது  குரலில் "என்னுள்ளே எங்கோ ஏங்கும் கீதம் ஏன் கேட்கிறது ஏன் வாட்டுது ஆனால் அதுவும் ஆனந்தம்" என்ற பாடலை கண்மூடி லயித்து கேட்கும் போது விழிகளை தாண்டும் கண்ணீரை யாராலும் தடுக்க இயலாது. 

தன் காந்த குரலால் பாடல் கேட்பவரின் உணர்வுகளை உலுக்கி சங்கமிக்கும் விந்தைகாரி தான் வாணி ஜெயராம்.  கவிதை கேளுங்கள் கருவில் பிறந்தது ராகம்..என்ற பாடல் தாளத்திற்கு ஏற்ற துள்ளல் நிறைந்ததாக அமைந்திருக்கும்.  வார்த்தை உச்சரிப்புகளில் அட்சர சுத்தம் நிறைந்திருக்கும். பாலைவனசாலை படத்தில் வரும் "மேகமே மேகமே " பாடலில் வரிக்கு வரி நெகிழ்ச்சியை உணர முடியும்.  அந்தமான் காதலியில் "நினைவாலே சிலை செய்துவைத்தேன் " என்ற பாடல் உறைந்து கிடக்கும்  அக ஊடாட்டங்களை தட்டி எழுப்பும். 

அனைத்தும்...:

இளமை ஊஞ்சலாடுகிறது என்ற படத்தில் " ஒரே நாள் உனை நான்" என்ற பாடலில் காதல்தேன் சொட்டும்.  தான் பாடும் பாடலின் வாயிலாக , ரசிகர்களின் காதுகளின் வழியாக மனதிற்குள் இறங்கி சென்று, காதல், மகிழ்ச்சி, துக்கம், ஏக்கம், குழப்பம், புத்துணர்ச்சி, காமம் ஆகியவற்றை துளியும் குறையாமல் கடத்தி தன் குரலால் என்றைக்குமே தமிழ் மக்களை ஆண்டு கொண்டிருக்கும் ஓர் பாடகிதான் வாணி ஜெயராம். 

விருதுகள்:

தலைமுறை கடந்து தன் தடம்பதித்த வாணி ஜெயராம் தேசிய விருது, பிலிம்பேர் விருது, நந்தி விருது, சிறந்த பின்னனி பாடகி விருது,பத்மபூஷண் விருது உட்பட பல்வேறு உயரிய விருதுகளை பெற்றுள்ளார். 

அதிசய பொக்கிஷம்:

திரையுலகில்  வாணி ஜெயராம் 10,000க்கும் அதிகமான பாடல்களை தமிழ், தெலுங்கு, கன்னடம் உட்பட 19 மொழிகளில் வாணி ஜெயராம் பாடல்களை பாடியுள்ளார்.  60 ஆண்டுகளை இசைக்காகவே அர்ப்பணித்து விட்ட வாணி ஜெயராம் தமிழ் சினிமா கண்டெடுத்த அதிசய பொக்கிஷம்.  தமிழ் திரையுலகில் இன்னும்  ஒலிக்க வேண்டிய குரல் தன் 78 வது  அகவையில் காற்றில் கரைந்து நிசப்தம் அடைந்திருக்கிறது.

இதையும் படிக்க:  உதவித்தொகையை நிறுத்துவதாக அறிவித்த மத்திய அரசு...கண்டனம் தெரிவித்த சிதம்பரம்!

ஈரோடு கிழக்கு இடைத்தேர்தலில், ஈபிஎஸ் தரப்பு வேட்பாளராக தென்னரசுவை அறிவித்து அதிமுக அவைத் தலைவர் தமிழ்மகன் உசேன் படிவம் வெளியிட்டுள்ளார். 

ஈ.பி.எஸ் அணி வேட்பாளர் ஒப்புதலுக்கான சுற்றறிக்கை படிவம் :

பொதுக்குழு மூலம் அதிமுக வேட்பாளர் தேர்வு செய்யப்பட வேண்டும் என உச்சநீதிமன்றம் உத்தரவிட்ட நிலையில், ஈரோடு கிழக்கு தொகுதி இடைத்தேர்தலில் ஓபிஎஸ், ஈபிஎஸ் தரப்பினர் பல்வேறு ஆலோசனைகளை மேற்கொண்டு வருகின்றனர். அதன் ஒரு பகுதியாக ஈ.பி.எஸ் அணி வேட்பாளர் ஒப்புதலுக்கான சுற்றறிக்கை படிவம் அதிமுக தலைமை அலுவலகத்தில் அவைத்தலைவர் தமிழ் மகன் உசேன் தலைமையில் இன்று விநியோகம் செய்யப்பட்டது. அதனை தொடர்ந்து பொதுக்குழு உறுப்பினர்கள் நாளை இரவுக்குள் படிவத்தை அதிமுக தலைமை அலுவலகத்தில் ஒப்படைக்க வேண்டுமென அறிவுறுத்தப்பட்டுள்ளது.

இதனிடையே ஈபிஎஸ் தரப்பு வேட்பாளராக தென்னரசு தொடர்வார் என்றும், பிரமாண பத்திரத்தில் அவருக்கு ஆதரவாக ஒப்புதல் அளிக்க பொதுக்குழு உறுப்பினர்களுக்கு தமிழ்மகன் உசேன் வேண்டுகோள் விடுத்துள்ளார்.

இதையும் படிக்க : கேரள அரசின் மாநில பட்ஜெட்...கேள்வி எழுப்பிய பி.சிதம்பரம்...!

இந்நிலையில் சேலம் மாநகர் மாவட்ட அதிமுக நிர்வாகிகளுடன் அதிமுக இடைக்கால பொதுச்செயலாளர் எடப்பாடி பழனிச்சாமி ஆலோசனை மேற்கொண்டார். சேலம் நெடுஞ்சாலை நகர் இல்லத்தில் நடைபெற்ற ஆலோசனை கூட்டத்தில் முன்னாள் அமைச்சர் செம்மலை, சேலம் மாநகர மாவட்டத்தை சேர்ந்த  பொதுக்குழு, செயற்குழு உறுப்பினர்கள் பங்கேற்றனர். அதனை தொடர்ந்து எடப்பாடி பழனிச்சாமியிடம், அதிமுக நிர்வாகிகள் மற்றும் பொதுக்குழு உறுப்பினர்கள் அடையாள அட்டை, ஆதார் கார்டு, கட்சியின் அடிப்படை உறுப்பினர் அட்டை மற்றும் புகைப்படம் உள்ளிட்ட நகலை ஒப்படைத்தனர்.

மேலும் ஈரோடு கிழக்கு இடைத்தேர்தல் தொடர்பாக ஓ.பன்னீர்செல்வம் அவரது ஆதரவாளர்களான மனோஜ் பாண்டியன், ஜேசிடி பிரபாகர் உள்ளிட்டோருடன் ஆலோசனை நடத்தினார். அதனை தொடர்ந்து ஓபிஎஸ் தரப்பு வேட்பாளர் செந்தில் முருகனின் வேட்புமனுவை திரும்ப பெற முடிவு செய்துள்ளதாக தகவல் வெளியாகியுள்ளது.

ஈரோடு கிழக்கு தொகுதிக்கான அதிமுக வேட்பாளரை முடிவு செய்ய, ஓ.பி.எஸ்-யையும் இணைத்து அதிமுக பொதுக் குழுவைக் கூட்ட வேண்டும் என்றும், அதில் பரிந்துரைக்கப்படும் வேட்பாளரை, தேர்தல் ஆணையம் ஏற்க வேண்டும் என்றும் உச்சநீதிமன்றம் உத்தரவிட்டுள்ளது.

ஈபிஎஸ் தாக்கல் செய்த மனு விசாரணை :

அதிமுக இடைக்கால பொதுச் செயலாளர் என்ற முறையில் தனது கையொப்பத்துடன் கூடிய வேட்பாளரின் படிவத்தை தேர்தல் ஆணையம் ஏற்க மறுப்பதாகவும், இதனால் இரட்டை இலை சின்னம் கிடைக்காத சூழல் நிலவுவதால், தன்னை அதிமுக இடைக்கால பொதுச் செயலாளராக அங்கீகரிக்கக் கோரி, ஈபிஎஸ் தரப்பில் தாக்கல் செய்த மனு உச்சநீதிமன்றத்தில் விசாரணைக்கு வந்தது. நீதிபதிகள் தினேஷ் மகேஸ்வரி, ரிஷிகேஷ் ராய் அமர்வு இந்த மனுவை விசாரித்தனர்.

இடைத்தேர்தலில் அதிமுக போட்டியிட முடியாமல் போனால் மகிழ்ச்சியாக இருக்குமா?

இரட்டை இலை சின்னம் முடக்கப்பட்டுள்ளதா என்ற நீதிபதிகளின் கேள்விக்கு, சின்னம் முடக்கப்படவில்லை என்று தேர்தல் ஆணையம் பதிலளித்தது. ஒருங்கிணைப்பாளர் என்ற முறையில் வேட்பாளரை அறிவித்துள்ளோம் என்று  ஓபிஎஸ் தரப்பிலும், இடைக்கால பொதுச் செயலாளர் என்ற முறையில் வேட்பாளரை அறிவித்துள்ளோம் என்று ஈ.பி.எஸ். தரப்பிலும் வாதங்கள் முன் வைக்கப்பட்டன. வேட்பு மனு தாக்கல் செய்ய பிப்ரவரி 7-ம் தேதி கடைசி நாளாக உள்ள நிலையில், இடைத்தேர்தலில் அதிமுக போட்டியிட முடியாமல் போனால் மகிழ்ச்சியாக இருக்குமா? என்று நீதிபதிகள் கேள்வி எழுப்பினர். 

இதையும் படிக்க : ஒரே வேட்பாளர்...அதுதான் பாஜாகவின் நிலைப்பாடு...!

பொதுக்குழுவை நடத்த வேண்டும் :

இருவரும் இணைந்து தீர்வு காணும்போது என்ன பிரச்னை உள்ளது என கேள்வி எழுப்பிய  உச்சநீதிமன்ற நீதிபதிகள், வேட்பாளரை தேர்ந்தெடுக்க ஏன் பொதுக்குழுவை  கூட்டக் கூடாது என்றும் கேள்வி எழுப்பினர். கட்சியின் விதிமுறைகளின் படி ஆட்சிமன்ற குழு தான் வேட்பாளரை தேர்ந்தெடுக்கிறது என்று ஓபிஎஸ் தரப்பு கூறியதையடுத்து, ஜூலை 11-ம் தேதி பொதுக்குழுவில் நீக்கப்பட்ட ஓ.பி.எ.ஸ் உள்ளிட்டோரையும் இணைத்து, தமிழ்மகன் உசேன் தலைமையில் பொதுக்குழுவை கூட்ட வேண்டும் என்றும், அந்த கூட்டத்தில் வேட்பாளரை தேர்வு செய்து, அவைத்தலைவர் தேர்தல் ஆணையத்துக்கு வேட்பாளரை பரிந்துரை செய்ய வேண்டும் என்றும் நீதிபதிகள் உத்தரவிட்டனர். அவைத்தலைவர் பரிந்துரை செய்யும் வேட்பாளரை தேர்தல் ஆணையம் ஏற்க வேண்டும் என்றும் நிதிபதிகள் உத்தரவிட்டுள்ளனர்.

மேலும், இந்த உத்தரவு இடைத்தேர்தலில் அதிமுக வேட்பாளரை முன்னிறுத்துவதற்கான இடைக்கால உத்தரவு மட்டுமே என்றும் நீதிபதிகள் தெரிவித்தனர்.

சென்னையில் கூவம் நதி தான் கடந்த 50 ஆண்டுகளுக்கு முன்னர் மிகப்பெரிய நீர் ஆதாரமாக விளங்கியது என்றால் நம்ப முடிகிறதா... ஆம்...சென்னை மக்களின் முக்கிய நீர் ஆதாரமாக விளங்கிய கூவம் நதி தற்போது, இந்தியாவிலேயே அதிக மாசடைந்த நதியாக மாசுக்கட்டுப்பாட்டு வாரியத்தால் அறிவிக்கப்பட்ட நிலையில், கூவம் நதியின் வரலாறு என்ன, மாசற்ற நதியாக மாறியதற்கான காரணங்கள் என்ன என்பது பற்றி இந்த செய்தி தொகுப்பில் பார்க்கலாம்....

மாசற்ற நதியாக மாறிய கூவம் :

தமிழ்நாட்டில் இருக்கும் பல ஆறுகளை நாம் முறையாகப் பராமரிப்பது இல்லை என்ற புகார் இருந்து வரும் நிலையில், தலைநகர் சென்னையில் நிலை ரொம்பவே மோசம். கூவம், அடையாறு, கொசஸ்தலை என மூன்று ஆறுகள் ஓடினாலும் கூட மூன்றையும் மோசமான நிலையில் தான் வைத்துள்ளது.   

இதனிடையே, இந்தியாவில் மத்திய மாசு கட்டுப்பாட்டு வாரியத்தின் மூலம் 4 ஆயிரத்திற்கும் மேற்பட்ட இடங்களில் 311 நதிகளில் மேற்கொள்ளப்பட்ட சோதனையின்படி கூவம் ஆற்றில், அடையாறில் இருந்து சத்யா நகர் வரை உள்ள வழித்தடத்தில் இருந்து எடுக்கப்பட்ட ஒரு லிட்டர் தண்ணீர் தூய தண்ணீராக மாற 345 மில்லி கிராம் ஆக்சிஜன் தேவைப்பட்டுள்ளது. இந்த சோதனையின் மூலம் தான் இந்தியாவில் அதிகமாக மாசடைந்த நதியாக கூவம் நதி அறிவிக்கப்பட்டுள்ளது. 

நதி மாசடைவதற்கான காரணத்தை விளக்குகிறார் வெங்கடேசன் :

கூவம் நதியின் வரலாறு, நதி மாசடைவதற்கு காரணம் என்ன என்பதை தெளிவுபடுத்துகிறார் வரலாற்று ஆய்வாளர் வெங்கடேசன், திருவள்ளூர் மாவட்டத்தில் இருந்து உருவாகும் கூவம், கிழக்கு நோக்கி சுமார் 72 கிலோமீட்டர் வரை சென்று வங்காள விரிகுடாவில் கலக்கிறது.  இதில் சென்னை நகரில் இந்த கூவம் ஆறு மிக மோசமாக மாசடைந்த நிலையில் உள்ளது. 

வட இந்தியாவில் சிப்பாய்க் கலகம் நடந்த போதே சென்னையில் அணைகள் கட்டுவது குறித்து பேச தொடங்கி 1868 ஆம் ஆண்டு கொசஸ்த்தலை ஆற்றின் நடுவில் சிறிய அணைகட்டி அந்த நீரை நெற்குன்றம் பக்கம் திருப்பி விட்டனர். அதன் பிறகு கூவம் நீரானது சென்னைக்குள் வரவே இல்லை,  நல்ல தண்ணீர் சென்னைக்குள் கூவம் நதியாக வந்து 140 ஆண்டுகள் ஆகிவிட்டது என்கிறார் வரலாற்று ஆராய்ச்சியாளர் வெங்கடேசன் 

சென்னையின் அதீத தாகத்தை தீர்த்தது கூவம் :

சென்னையின் அதீத தாகத்தை தீர்த்தது கூவமும் கொசஸ்தலை ஆறும் தான். பின்னர் வளர்ச்சி காரணமாக இந்த இரண்டு ஆதாரங்களும் பற்றாமல் போனது. பின்னர் 1942 ஆம் ஆண்டு சென்னை மாநகராட்சியின் புதிய மேயராக பதவி ஏற்ற சத்தியமூர்த்தி சென்னைக்கு ஒரே வருடத்தில் நிரந்தரமாக நீர் ஆதாரத்தை அமைக்க வேண்டும் என்பதற்காக பூண்டி ஏரியை உருவாக்க திட்டமிட்டதாக வரலாற்று ஆய்வாளர் வெங்கடேசன் கூறுகிறார். 

கோடி கோடியாய் செலவு செய்தாலும் மீண்டும் கூவம் நதியை சுத்தம் செய்ய முடியாது 5 வருடத்திற்கு ஒரு முறை சுத்தம் செய்வதாக மக்களின் வரிப்பணத்தை தான் வீணடிக்கிறார்கள் என்கிறார் வரலாற்று ஆய்வாளர் வெங்கடேசன். ஆஸ்திரேலியா போன்ற நாடுகளில் மாசடைந்த நீரை 90 சதவீதம் சுத்திகரித்து பணிகளுக்கு பயன்படுத்துகிறார்கள் அது போன்ற வழிமுறைகளை மேற்கொண்டால் இந்த நிலை மாற வாய்ப்புள்ளதாகவும் அவர் கூறுகிறார். 

சென்னையின் ஒட்டுமொத்த தண்ணீர் ஆதாரம் என்ற பெருமையும், பழைய வரலாற்று பெருமைகளை தாங்கி மாசடைந்து நிற்கும் கூவம் நதியை அரசு மீட்டெடுக்குமா என்பது சமூக ஆர்வலர்களின் எதிர்பார்ப்பாக உள்ளது.