தென்காசி மாவட்டம் ஆலங்குளம் அருகே உள்ள சொக்கநாதன்பட்டி கிராமத்தைச் சேர்ந்தவர் 45 வயதுடைய ஜெயபால். ஆடு வியாபாரம் மற்றும் வட்டிக்கு பணம் விட்டு சம்பாதிக்கும் தொழில் செய்து வந்த இவருக்கும் ஆழ்வார்குறிச்சி அருகே உள்ள செட்டிகுளம் பகுதியை சேர்ந்த ஒருவருக்கும் வியாபாரம் தொடர்பாக நட்பு இருந்துள்ளது. ஜெயபால் ஆழ்வார்குறிச்சி சென்றபோது  தனது நண்பரின் 15 வயது மகளை பாலியல் வன்கொடுமை செய்துள்ளார்.

ஜெயபாலின் தொந்தரவு தாங்காத அந்த சிறுமி தான் அணிந்திருந்த உடையில் தீ வைத்து தற்கொலைக்கு முயற்சியில் ஈடுபட்டதாக கூறப்படுகிறது.  உடனடியாக அக்கம் பக்கத்தினர் அவரை மீட்டு அம்பாசமுத்திரம் அரசு மருத்துவமனையில் அனுமதித்தனர். 

விசாரணையில் ஜெயபால் சிறுமிக்கு பாலியல் தொல்லை அளித்தது தெரியவந்தது. சிறுமியின் பெற்றோர் அளித்த புகாரின் பேரில் ஆலங்குளம் அனைத்து மகளிர் காவல்நிலைய போலீசார் ஜெயபால் மீது போக்சோ சட்டத்தின் கீழ் வழக்குப் பதிந்து நீதிமன்றத்தில் ஆஜர்படுத்தினர்.

சென்னை திருவள்ளூர் மாவட்டம் பெரும்பாக்கம் பகுதியைச் சேர்ந்தவர் டில்லிபாபு. இவர் சொந்தமாக மாலை கட்டும் தொழில் செய்து வருகிறார். கொடுங்கையூரில் வசித்து வரும் தனது அக்கா சசிகலா என்பவரை பார்ப்பதற்காக நேற்று இரவு 9 மணி அளவில் டீச்சர்ஸ் காலனி மெயின் ரோடு 3வது தெரு வழியாக சென்று கொண்டிருந்தார்.

அப்போது மூன்று நபர்கள் டில்லிபாபுவை வழிமறித்து மது அருந்துவதற்கு பணம் கேட்டுள்ளனர். அவர் தர மறுக்கவே கத்தியை எடுத்துக் காட்டி மிரட்டி உள்ளனர். அவர் தனது கையில் இருந்த 300 ரூபாய் பணத்தைக் கொடுத்துவிட்டு சென்ற போது மீண்டும் அவரை வழிமறித்து செல்போன் மற்றும் கழுத்தில் அணிந்திருந்த இரண்டு சவரன் தங்கச் செயினை பறிக்க முற்பட்டனர் அப்போது டில்லி பாபு கூச்சலிட்டு உள்ளார். 

அப்போது பொதுமக்கள் மர்ம நபர்களை பிடிக்க முற்பட்டபோது ஒருவர் மட்டும் சிக்கினார் மற்ற இரண்டு நபர்கள் ஓடிவிட்டனர். டில்லி பாபுவின் கழுத்தில் இருந்து பறிக்க முயன்ற செயின் கீழே விழுந்து கிடந்தது. இதனை பொதுமக்கள் எடுத்து டில்லி பாபுவிடம் ஒப்படைத்தனர்.

இதுகுறித்து கொடுங்கையூர் போலீசாருக்கு தகவல் தெரிவித்தனர் தகவலின் பேரில் அங்கு வந்த கொடுங்கையூர்  போலீஸார் பிடிபட்ட நபரை காவல் நிலையம் அழைத்து சென்று விசாரணை செய்ததில் பிடிபட்ட நபர் மாதவரம் மூலசத்திரம் பகுதியைச் சேர்ந்த கமலக்கண்ணன் வயது 30 என்பது தெரியவந்தது. 

இதனையடுத்து அவர் கொடுத்த தகவலின் பேரில் கொடுங்கையூர் காமராஜ் சாலை பகுதியைச் சேர்ந்த பிரியதர்ஷன் என்கின்ற காக்கா, கொடுங்கையூர் டீச்சர்ஸ் காலனி பகுதியை சேர்ந்த வெங்கடேஷ் ஆகிய இருவரையும் போலீசார் கைது செய்தனர் இவர்களிடம் இருந்து ஒரு சின்ன கத்தி பறிமுதல் செய்யப்பட்டது கைது செய்யப்பட்ட மூன்று பேரிடமும் போலீசார் தொடர்ந்து விசாரணை மேற்கொண்டு வருகின்றனர்.

நாகையில் மது குடிக்க பணம் கேட்டு தகராறில் ஈடுபட்ட நபரை தந்தை, மகன் சேர்ந்து கொடூரமாக தாக்கிய வீடியோ சமூக வலைத்தளங்களில் பரவி பரபரப்பை ஏற்படுத்தியுள்ளது.

நாகை மாவட்டம் தெற்கு பொய்கை நல்லூர் கிராமத்தை சேர்ந்தவர் நடவண்டி மோகன். இவர் மீது பல்வேறு குற்ற வழக்குகள் நிலுவையில் உள்ளன.

இவர், வேளாங்கண்ணி பேருந்து நிலையத்தில் பழக்கடை மற்றும் மெழுகுவர்த்தி வியாபாரம் செய்து வரும் மதியழகன் மற்றும் அவரது மகன் ஆனந்த மாரிமுத்து ஆகியோரிடம் மது குடிக்க பணம் கேட்டு தகராறில் ஈடுபட்டார். இதனால் ஆத்திரமடைந்த தந்தை மகன் இருவரும் மோகனை கட்டையால் தாக்கினர். 

தற்போது இந்த வீடியோ காட்சி வெளியாகி பரபரப்பை ஏற்படுத்தியுள்ளது. படுகாயமடைந்த நபர் திருவாரூர் அரசு மருத்துவமனையில் சிகிச்சை பெற்று வருகிறார். மேலும், தந்தை - மகனை கைது செய்து வேளாங்கண்ணி போலீசார் விசாரணை நடத்தி வருகின்றனர்.

சென்னை மாதனாங்குப்பம் பஜனை கோவில் தெருவில் உள்ள ஒரு வீட்டில் பயங்கர ஆயுதங்களுடன், ஒரு கும்பல் பதுங்கி இருப்பதாக கொரட்டூர் போலீசாருக்கு தகவல் கிடைத்தது.

இந்நிலையில், தனிப்படை போலீசார் அங்கு பதுங்கி இருந்த தபதி, பிரகாஷ், ஜெயக்குமார், பாலகிருஷ்ணன், ஐசக் ராபர்ட், ஈசாக், கிருஷ்ணகுமார் ஆகியோரை கைது செய்தனர்.

விசாரணையில், கடந்த 25ம் தேதி கல்பாளையத்தை சேர்ந்த பாக்ஸர், விக்கி, சீனா ஆகியோருடன் இவர்களுக்கு தகராறு ஏற்பட்டதும், இதனால் ஏற்பட்ட முன்விரோதம் காரணமாக அவர்கள் 3 பேரை கொலை செய்ய திட்டம் தீட்டி அவர்கள் பதுங்கியிருந்ததும் தெரியவந்தது. 

7 பேர் கொண்ட கும்பலை கைது செய்த போலீசார் அவர்களிடம் இருந்த 5 ஆசிட் பாட்டில், 12 கத்தி, 5 இருசக்கர வாகனம், 7 செல்போன்கள், 2 கிலோ கஞ்சா, 1 எடை போடும் இயந்திரம் ஆகியவற்றை பறிமுதல் செய்து விசாரணை நடத்தி வருகின்றனர்.

புதுச்சேரி கருவடிக்குப்பத்தை சேர்ந்தவர் பிரபல ரவுடி சரத் (எ) பொடிமாஸ் (23)   இவர் கடந்த மூன்று தினங்களாக அரியாங்குப்பம் காவல் நிலையம் பின்புறம் உள்ள தெற்கு காவல் கண்காணிப்பாளர் அலுவலகம் எதிரே உள்ள தனது தங்கையின் வீட்டில் தங்கி இருந்தார்.

இவரை நோட்டமிட்டு வந்த மர்ம நபர்கள் இன்று அதிகாலை பொடிமாஸ் தங்கி இருந்த வீட்டின் கதவை தட்டி உள்ளனர். வீட்டில் இருந்த  அவரின் மாமா கதவை திறந்தவுடன் அவரை கத்தி முனையில் மிரட்டி அமரவைத்து பொடிமாஸை கழுத்து, தலை, முகம் ஆகிய பகுதிகளில் வெட்டி   கொடூரமாக கொலை செய்துவிட்டு அங்கிருந்து தப்பி ஒடி விட்டனர்.

இது குறித்து பொடிமாஸின் மாமா அரியாங்குப்பம் காவல் நிலையத்திற்கு அளித்த தகவலின் பேரில் சம்பவ இடத்திற்கு வந்த அரியாங்குப்பம் போலீசார் கொலை செய்யப்பட்டவரின் உடலை கைப்பற்றி பிரேத பரிசோதனைகாக கதிர்காமம் அரசு மருத்துவமனைக்கு அனுப்பி வைத்தனர்.  தொடர்ந்து  கொலைக்கான காரணம், யார் கொலை செய்தது என்பது குறித்து போலிசார் தீவிர விசாரணை மேற்கொண்டு வருகின்றனர்.

மேலும் கொலை செய்யப்பட்ட பொடிமாஸ் மீது வெடி குண்டு வீச்சு, கொலை முயற்சி அடிதடி உள்ளிட்ட 10 வழக்குகள் நிலுவையில் உள்ளது, குண்டாஸ் சட்டத்தில் சிறையில் அடைக்கப்பட்டிருந்தவர் கடந்த சில தினங்களுக்கு முன்பு தான் வெளியே வந்துள்ளார். காவல் கண்காணிப்பாளர் அலுவலகம் எதிரே பிரபல ரவுடி கொலை செய்யப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தி உள்ளது.