நேபாள பிரதமர் ஷேர் பகதூர் தேவுபா அழைப்பின் பேரில், புத்த பவுர்ணமி நிகழ்ச்சியில் பங்கேற்பதற்காக,  ஒரு நாள் பயணமாக பிரதமர் மோடி அங்கு சென்றுள்ளார். அவருக்கு அந்நாட்டு பிரதமர் மற்றும் அதிகாரிகள் உற்சாக வரவேற்பு அளித்தனர்.

தொடர்ந்து  மகாமயா தேவி கோயிலுக்குச் சென்று சிறப்பு வழிபாடு நடத்தினார். பின்னர் சர்வதேச புத்த அமைப்பு சார்பில், லூம்பினியில் புதிதாக கட்டப்படவுள்ள புத்த மத கலாச்சார மையத்துக்கு பிரதமர் மோடி அடிக்கல் நாட்டினார்.

அதனைத்தொடர்ந்து அங்குள்ள இந்திய மக்களுடன் கலந்துரையாடிய பிரதமர் மோடி, புத்த பெருமானிடம் அவர் ஆசிபெறுவது போன்று, நபர் ஒருவர் வரைந்த ஓவியத்தில் கையெழுத்திட்டார்.

இதை தொடர்ந்து இரு நாட்டு நல்லுறவு தொடர்பாக நேபாளம் பிரதமர் ஷேர் பகதூர் தேவுபாவுடன்  பிரதமர் மோடி ஆலோசனை நடத்தினர்.  அப்போது இரு நாடுகள் இடையே 6 புரிந்துணர்வு ஒப்பந்தங்கள் கையெழுத்தானது. ஐஐடி மெட்ராஸ் மற்றும் காத்மண்டு பல்கலைக்கழகம் இடையே புரிந்துணர்வு ஒப்பந்தம் செய்யப்பட்டுள்ளது. மேலும்   லூம்பினி புத்த பல்கலைக்கழகத்தில் டாக்டர் அம்பேத்கர் அமர்வு ஏற்படுத்துவது உள்ளிட்ட  ஒப்பந்தங்கள்  கையெழுத்தாகியுள்ளன.

தொடர்ந்து நிகழ்ச்சியில் உரையாற்றிய பிரதமர் மோடி, புத்தர் மீது கொண்டுள்ள பக்தியும், நம்பிக்கையும் இரு நாடுகளையும் ஒரிழையில் பிணைப்பது ஒரே குடும்பத்தினராக நினைக்க செய்வதாக கூறியுள்ளார். புத்தர் உலகெங்கும் வாழும் மக்களுக்கு சொந்தக்காரர் என குறிப்பிட்ட மோடி, நேபாளம் இல்லாமல் ராமர் நிறைவு பெற்றவராக கருத இயலாது என கூறியுள்ளார்.

ஹைதராபாத் அடுத்த குடிமல்காப்பூர் பகுதியைச் சேர்ந்த இளம்பெண் பொந்தள ரோஜா, தனது குடும்பத்தினருடன்,  நலகொண்டா மாவட்டம் யாதகிரி லட்சுமி நரசிம்மா சுவாமி கோவிலுக்கு சென்றுள்ளார்.

தரிசனத்திற்கும் முன்பு, கோவில் தெப்ப குளத்தில்  குடும்பத்தினருடன் குளிக்க இறங்கிய போது, எதிர்பாராத விதமாக இளம்பெண் பொந்தள ரோஜா நீரில் மூழ்கி உயிரிழந்ததாக கூறப்படுகிறது. இதனிடையே, இளம்பெண் உடலை கண்டு குடும்பத்தினர், கதறி அழுத காட்சிகள் அனைவரையும் சோகத்தில் ஆழ்த்தியது.

இந்நிலையில், உடலை மருத்துவமனைக்கு கொண்டு செல்ல கோவிலுக்கு சொந்தமான ஆம்புலன்ஸ் உதவியாளர்கள் மறுப்பு தெரிவித்துள்ளனர். 

2 மணி நேரத்திற்கு மேலாக கோவில் வளாகத்திலேயே ரோஜா உடலுடன் குடும்பத்தினர் காத்திருந்த நிலையில், தேவஸ்தான நிர்வாகத்தின் சார்பில் எந்த ஒரு நடவடிக்கையும் எடுக்கப்படாததால், உடலை நகராட்சி குப்பை வாகனத்தில் கொண்டு சென்றுள்ளனர். உயிரிழந்த பக்தரின் உடலை கொண்டு செல்ல ஏற்பாடு செய்யாத கோவில் நிர்வாகத்திற்கு பக்தர்களும் பொதுமக்களும் கண்டனம் தெரிவித்து வருகின்றனர்.

நடு வழியில் ரோலர்கோஸ்டர் செயலிழந்ததால் 235 அடி உயர அந்தரத்தில் சுற்றுலா பயணிகள் சிக்கி தவித்த சம்பவம் இங்கிலாந்தில் அரங்கேறியுள்ளது.

இங்கிலாந்தின் Blackpool Pleasure Beach பகுதியில் அமைந்துள்ள கேளிக்கை பூங்கா ஒன்றில் தான் இந்த அதிர்ச்சிகர சம்பவம் அரங்கேறியுள்ளது. உலகின் மிக உயரமான மற்றும் செங்குத்தான இந்த ரோலர் கோஸ்டர் கடந்த 1994 ஆம் ஆண்டு நிறுவப்பட்டுள்ளது. வார இறுதி நாட்களில் கடற்கடற்கரையில் குவியும்  ஏராளமான மக்கள் இந்த ரோலர்கோஸ்டரில் உல்லாச சுற்றுலா செல்வது வழக்கம். 

இந்த நிலையில் வழக்கம்போல் சுற்றுலா பயணிகள்  ரோலர்கோஸ்டரில் செல்ல, அது நடு வழியில் செயலிழந்துள்ளது.  235 அடி உயரத்தில் சுமார் 45 நிமிடங்களுக்கு பயணிகள் அந்தரத்தில் தொங்கியபடி தவித்துள்ளனர். இச்சம்பவம் பெரும் பரபரப்பை ஏற்படுத்தியது.

அசாமில் கொட்டி தீர்த்த கனமழையால் கடும் வெள்ளப்பெருக்கு ஏற்பட்டுள்ளது.  15 வருவாய் வட்டங்களுக்கு உட்பட்ட 222 கிராமங்கள் வெள்ளத்தால் சூழப்பட்டுள்ளன. 10 ஆயிரத்து 321 ஹெக்டேர் விவசாய நிலங்கள் நீரில் மூழ்கியுள்ளதாகவும் தகவல்கள் தெரிவிக்கின்றன. 57 ஆயிரம் பேர் வீடுகளை இழந்து தற்காலிக முகாம்களில் தங்க வைக்கப்பட்டுள்ளனர்.  கடும் வெள்ளத்தில் சிக்கி இதுவரை ஒரு குழந்தை உட்பட 3 பேர் உயிரிழந்துள்ளனர். லக்கிம்பூர் மற்றும் நாகோன் மாவட்டங்களில் பல சாலைகள், பாலங்கள் மற்றும் நீர்ப்பாசன கால்வாய்கள் சேதமடைந்துள்ளன.   

இடைவிடாத மழையால் திமா ஹசாவ் மாவட்டத்தில் 12 கிராமங்களில் நிலச்சரிவு ஏற்பட்டுள்ளது. இதனால் ரயில் பாதை, பாலங்கள் மற்றும் சாலை தகவல் தொடர்புகளுக்கு பெரும் சேதம் ஏற்பட்டுள்ளது. வெள்ளத்தால் பாதிக்கப்பட்ட பகுதிகளில் ராணுவம், துணை ராணுவப் படைகள், தேசிய பேரிடர் மீட்பு படையினர், தீயணைப்பு மற்றும் அவசர சேவைகள் மீட்பு படையினர் நிவாரண பணிகளில் ஈடுபட்டுள்ளனர். டிடோக்செரா ரயில் நிலையத்தில் சிக்கித் தவித்த சுமார் ஆயிரத்து 245 பயணிகள் பதர்பூர் மற்றும் சில்சார் வரை அழைத்து வரப்பட்டுள்ளனர்.  119 பயணிகள் விமானப்படை விமானம் மூலம் அனுப்பப்பட்டதாக ரயில்வேத்துறை அறிக்கையில் தெரிவித்துள்ளது.

டெல்லி உள்ளிட்ட வடமாநிலங்களில் இன்று முதல் அடுத்த சில தினங்களுக்கு வெப்பம் படிப்படியாக குறையும் என கூறப்பட்டுள்ளது.

இந்தநிலையில் டெல்லியின் முங்கேஷ்பூர், நஜப்கர், உத்தரபிரதேசத்தின் பண்டல்கந்த் மண்டலத்தில் 49 டிகிரி செல்சியஸை கடந்து வெப்பம் பதிவாகியுள்ளது. இதனால் வறட்சி, தோல் நோய்களுக்கு ஆளாகும் நிலை ஏற்பட்டுள்ளது. 

இந்த வெப்பம் மேலும் நீடிக்க வாய்ப்புள்ளதால், முடிந்தவரை வெளியே செல்வதை தவிர்க்கவும், வெளியே செல்லும் போது தண்ணீர் உள்ளிட்ட முன்னெச்சரிக்கை பாதுகாப்புடன் செல்லவும் வானிலை மையம் அறிவுறுத்தியுள்ளது.