வருமானத்துக்கு அதிகமாக சொத்து குவித்த வழக்கில் குற்றவாளியான ஹரியானா மாநில முன்னாள் முதல்வர் ஓம் பிரகாஷ் சவுதாலாவுக்கு டெல்லி ரோஸ் அவெனியூ நீதிமன்றம் இன்று தண்டனை விவரம் அறிவித்தது. முன்னாள் துணை பிரதமர் தேவிலாலின் மகன் ஓம் பிரகாஷ் சவுதலா, இந்திய தேசிய லோக்தளம் கட்சியின் தலைவரான இவர்  கடந்த 1999ம் ஆண்டு முதல் 2004 வரை ஹரியானா மாநில முதல்வராக பதவி வகித்தார். 

அப்போது, தனது பதவியை துஷ்பிரயோகம் செய்து, வருமானத்துக்கு அதிகமாக ரூ 6.10 கோடி சொத்து குவித்ததாக சிபிஐ வழக்குப் பதிவு செய்தது. இந்த வழக்கு டெல்லி சிறப்பு சிபிஐ நீதிமன்றத்தில் நடைபெற்று வந்த நிலையில் கடந்த 2010ம் ஆண்டு குற்றப் பத்திரிகை தாக்கல் செய்யப்பட்டது. அதன் அடிப்படையில் இந்த வழக்கில் நீதிமன்றம் கடந்த வாரம் தீர்ப்பு அளித்தது. 

அதில், ஓம் பிரகாஷ் சவுதாலா உள்ளிட்டோர் குற்றவாளிகளாக அறிவிக்கப்பட்டனர். தீர்ப்பு விவரம் பின்னர் அறிவிக்கப்படும் என அறிவித்திருந்த நிலையில் இன்று தீர்ப்பு விவரங்கள் அறிவிக்கப்பட்டது. அதன்படி ஹரியானா முன்னாள் முதலமைச்சர் ஓம் பிரகாஷ் சவுதாலாவுக்கு 4 ஆண்டுகள் சிறை தண்டனையும் 50 லட்சம் ரூபாய் அபராதமும் விதித்து நீதிபதிகள் அறிவித்தனர். அதே நேரத்தில்  வருமானத்திற்கு அதிகமாக சொத்து குவித்த வழக்கில் ஓம் பிரகாஷ் சவுதலாவுக்கு சொந்தமான 4 சொத்துக்களை பறிமுதல் செய்யவும் நீதிபதிகள் உத்தரவிட்டனர். 

சிபிஐ சிறப்பு நீதிமன்றத்தின் தீர்ப்பு விவரங்கள் அறிவிக்கப்பட்டதை தொடர்ந்து வயது முதிர்வை மேற்கோள் காட்டி ஓம் பிரகாஷ் சவுதாலா தரப்பில் மேல்முறையீடு செல்லலாம் என தகவல்கள் வெளியாகி உள்ளது.

சீனப் பிரதிகளுக்கு இந்தியாவில் பணிபுரிவதற்காக முறைகேடாக விசா பெற்று தருவதற்கு பணம் பெற்ற வழக்கில் இரண்டாவது நாளாக டெல்லியில் உள்ள சிபிஐ தலைமையகத்தில் கார்த்திக் சிதம்பரம் ஆஜரானார்.  விசாரணைக்கு பிறகு செய்தியாளர்களை சந்தித்த கார்த்திக் சிதம்பரம்,

விசாரணை என்ற பெயரில் தன்னுடைய நேரத்தை வீணடிப்பதாகவும் நேற்றைப் போலவே இன்றைய தினமும் வெத்து பட்டாசாக விசாரணை இருந்தது என கருத்து தெரிவித்தார். மேலும் சிபிஐ ஆக்கப்பூர்வமாக விசாரணை நடத்தவில்லை எனவும் அவர்களிடம் போலியான வழக்கிற்கு கேள்விகள் கேட்பதற்கு எதுவும் இல்லை,  அதே போல தன்னிடமும் எந்த பதிலும் இல்லை என தெரிவித்தார்.   

மேலும், கார்த்தி  சிதம்பரம் கைது செய்யப்படலாம் என தகவல்கள் வெளியாகி இருக்கும் நிலையில் அதற்கான நோட்டீஸ் வழங்கப்பட்டுள்ளதா? என செய்தியாளர்கள் கேள்வி எழுப்பினர்.  அதற்கு இப்போது வரை எந்த நோட்டீஸும் தன்னிடம் சிபிஐ வழங்கவில்லை என தெரிவித்தார்.

மேற்குவங்க ஆளுநராக இருக்கும் ஜக்தீப் தன்கர், பல்கலைக்கழக வேந்தராக இருந்து அதன் நிர்வாக பொறுப்புகளை கவனித்து வருகிறார்.

இதனால் துணைவேந்தர்கள் நியமனம் செய்வது தொடர்பாக ஆளுநருக்கும் மம்தா அரசுக்கும் இடையே மோதல் போக்கு நீடிப்பதோடு, மாநில அதிகாரத்தில் ஆளுநர் தலையிடுவதாக குற்றஞ்சாட்டப்பட்டு வருகிறது.

இந்தநிலையில் மாநில பல்கலைக்கழகங்கள் மீது ஆளுநருக்கு உள்ள அதிகாரத்தை முதலமைச்சருக்கு மாற்றுவது குறித்து நேற்று அமைச்சரவை கூட்டத்தில் விவாதிக்கப்பட்டது. 

இது தொடர்பான அறிவிப்பை கல்வித்துறை அமைச்சர் பிரத்யா பாசு கூட்டத்தில் தெரிவித்த நிலையில், இறுதியில் மம்தாவை பல்கலைக்கழங்களின் வேந்தராக ஆக்குவதற்கு சட்டத்திருத்தத்தை மேற்கொள்ள முடிவு செய்யப்பட்டுள்ளது. 
 

டெல்லி முதன்மை வருவாய் செயலாளராக இருக்கும் சஞ்சீவ் கிர்வார் என்பவர் அண்மையில் தியாகராஜ் மைதானத்தில் தனியாக மனைவி மற்றும் வளர்ப்பு நாயுடன் நடைப்பயிற்சி சென்ற வீடியோ வெளியானது.

மேலும் விளையாட்டு வீரர்கள் முறையான பயிற்சியை மேற்கொள்ள விடாதபடி, அவருக்காக தான் மைதானங்கள் 7 மணிக்கே மூடப்படுவதாக குற்றஞ்சாட்டப்பட்டது. இதையடுத்து விளையாட்டு மைதானங்களை இரவு 10 மணி வரை திறந்து வைக்க டெல்லி முதல்வர் கெஜ்ரிவால் உத்தரவிட்டார். 

இந்தநிலையில் ஐஏஎஸ் அதிகாரியின் இந்த விவகாரம் தொடர்பாக அறிக்கை சமர்பிக்கப்பட்டதை  அடுத்து, உள்துறை அமைச்சகம் அவரை லடாக்கிற்கும், அவரது மனைவியை அருணாச்சல பிரதேசத்திற்கும் பணிமாற்றம் செய்து உத்தரவிட்டுள்ளது. 

பிரதமர் மோடி தலைமையில் மத்தியில் பாஜக ஆட்சிப்பொறுப்பேற்று நேற்றுடன் 8 ஆண்டுகள் ஆகிறது. இதைெயாட்டி மத்திய அரசின் தோல்விகளை பட்டியலிட்டு காங்கிரஸ் கட்சி அறிக்கை ஒன்றை வெளியிட்டு உள்ளது. 

அதில் இந்தியாவில் லட்சக்கணக்கான காலிப்பணியிடங்கள் உள்ளதாக சுட்டிக்காட்டியுள்ள காங்கிரஸ், அவற்றை நிரப்ப மத்திய அரசு எந்த நடவடிக்கையும் எடுக்கவில்லை என சாடியுள்ளது.  குறிப்பாக மத்திய அமைச்சகங்கள் மற்றும் துறைகளில் 9 லட்சத்துக்கு அதிகமான பணியிடங்கள் காலியாக உள்ளதாக கூறப்பட்டு உள்ளது. 

மேலும் பொதுத்துறை வங்கிகளில் 2 லட்சம் காலியிடங்களும், 1.68 லட்சம் சுகாதார ஊழியர் பணியிடங்கள் மற்றும் 1.76 அங்கன்வாடி பணியாளர் பணியிடங்கள் காலியாக இருப்பதாகவும் தகவல் வெளியிட்டுள்ளது.

இதேப்போல் ராணுவத்தில் 2.  55 லட்சம் பணியிடங்களும், மத்திய ஆயுதப்படைகளில் 91,929 பணியிடங்களும், மாநில போலீஸ் துறையில் 5.31 லட்சம் பணியிடங்களும், பல்வேறு நீதிகளில் 5 ஆயிரம் பணியிடங்களும் நிரப்பப்படாமல் காலியாக இருப்பதாக சாடியுள்ள காங்கிரஸ் மாநில அரசுகளின் பல்வேறு துறைகளில் 30 லட்சத்துக்கு மேற்பட்ட காலியிடங்கள் இருப்பதாகவும் சுட்டிக்காட்டியுள்ளது. 

மேலும் இப்பட்டியலை வெளியிட்ட கட்சியின் முதன்மை செய்தி தொடர்பாளர் ரந்தீப் சுர்ஜேவாலா, இளைஞர்கள் பணிக்காக ஏங்குவதாகவும், ஆனால் அரசுகள் காலியிடங்களை நிரப்ப ஆர்வம் காட்டவில்லை எனவும் குற்றம் சாட்டியுள்ளார்.

அதேவேளையில்  மோடி அரசு பதவியேற்ற 8 ஆண்டுகளில் மத மோதல்கள் தான் அதிகரித்து இருப்பதாகவும் அவர் விமர்சித்துள்ளார். அந்தவகையில் கடந்த 2016-2020-ம் ஆண்டு காலத்தில் 3,400 மதக்கலவரங்கள் நடந்திருப்பதாக உள்துறை அமைச்சகம் கூறியிருப்பதை சுட்டிக்காட்டிய அவர், மோடியின் 8 ஆண்டுகால ஆட்சியில் இதன் எண்ணிக்கை 10 ஆயிரத்தை தாண்டும் என்றும் கூறியுள்ளார். 

கடந்த 2015 முதல் 2020 வரையிலான காலகட்டத்தில், தலித் பிரிவினர் மீதான வன்முறை 12 சதவீதம் அதிகரித்து இருப்பதாகவும் தெரிவித்துள்ளார். கடந்த 8 ஆண்டுகளில் காஷ்மீரில் 548 பாதுகாப்பு படையினர், 324 பொதுமக்கள் கொல்லப்பட்டு இருப்பதாகவும், இந்திய-சீன எல்லை தொடர்ந்து பதற்றத்தில் இருப்பதாகவும் அறிக்கையில் குறிப்பிட்டுள்ளார்.