கொரோனா தொற்று நாட்டின் பல்வேறு மாநிலங்களில் அதிகரித்து வருகின்றது.  தமிழகத்தை பொறுத்தவரை சென்னை, செங்கல்பட்டு, திருவள்ளூர், காஞ்சிபுரம், கோயம்புத்தூர் மற்றும் கன்னியாகுமரி போன்ற மாவட்டங்களில் குறிப்பாக நகர்ப்புறங்களில் அதிகரித்து வருகின்றது.

தமிழகம் முழுவதும் இன்று ஒரே நாளில் 1472 நபர்களுக்கு கொரோனா தொற்று உறுதி செய்யப்பட்டுள்ளதாக சுகாதாரத்துறை தெரிவித்துள்ளது. 7500 க்கும் மேற்பட்டோர் தொற்றுக்கு  சிகிச்சை பெற்று வருவதாகவும் சுகாதாரத்துறை வெளியிட்டுள்ள அறிக்கையில் கூறப்பட்டுள்ளது. 

கோவிட் தடுப்பு வழிமுறைகளை கடைபிடிக்காமல் கவனக்குறைவாக இருப்பதே தொற்று அதிகரித்து வருவதற்கு  காரணம் என கூறப்படும் நிலையில்  கொரனோ வழிகாட்டு நெறிமுறைகளை பின்பற்றாதவர்களுக்கு அபராதம் விதிக்கப்படும் என தமிழ்நாடு அரசு உத்தரவிட்டுள்ளது.

முகக் கவசம் அணியாமல் இருப்பவர்கள் மற்றும் கொரோனா வழிகாட்டு நெறிமுறைகளை பின்பற்றாதவர்களிடம், தற்போது நடைமுறையில் உள்ள பொது சுகாதார சட்டத்தின்படி அபராதம் விதிக்க அரசு ஆணை பிறப்பிததிருக்கிறது.

அதிமுகவில் ஒற்றைத் தலைமை விவகாரத்தால் ஓபிஎஸ், ஈபிஎஸ் இடையே உச்சகட்ட மோதல் நிலவுகிறது.

இந்நிலையில் அதிமுகவில் தொண்டர்களை ஒருங்கிணைக்க உள்ளதாக கூறி, புரட்சி பயணம் என்ற அரசியல் சுற்று பயணத்தை சசிகலா தொடங்கியுள்ளார்.

சென்னை தியாகராயர் நகரில் உள்ள தனது இல்லத்தில் இருந்து புறப்பட்டு சென்ற அவர், முதல்முறையாக திருவள்ளூர் மாவட்டத்தில் அதிமுக தொண்டர்களை சந்தித்தார். பின்னர் திருத்தணி சென்ற அவருக்கு,  முன்னாள் சட்டமன்ற உறுப்பினர் நரசிம்மன் ஏற்பாட்டில் 500 க்கும் மேற்பட்ட பெண்கள், தொண்டர்கள், கலந்து கொண்டு மலர்கள் தூவி, பட்டாசு வெடித்து, மோட்டார் சைக்கிள் பேரணி யுடன் வரவேற்பு அளித்தனர்.

பின்பு ஊர்வலமாக அழைத்துச் செல்லப்பட்ட சசிகலா, திருத்தணி முருகன் கோவிலில்  சாமி தரிசனம் செய்தார். அவருக்கு திருக்கோயில் சார்பில் பிரசாதங்கள் வழங்கப்பட்டன.  மேலும் திருக்கோயில் சாமி தரிசனம் செய்துவிட்டு வந்த அவருக்கு, நரிக்குறவ பெண்கள் பாசி மாலையை அன்பளிப்பாக வழங்கினர்.

அதனை கழுத்தில் அணிந்துகொண்ட சசிகலா, தொண்டர்களுக்கும் நரிக்குறவ குழந்தைகளுக்கும் சாக்லெட்டுகளை வாரி வழங்கினார்.

பின்னர் செய்தியாளர்களை சந்தித்து பேசிய அவர், சுற்றுப் பயணத்தில் தன்னை சந்தித்த மக்கள் இந்த திமுக ஆட்சியில் எந்த நன்மையும் கிடைக்கவில்லை என குற்றம் சாட்டியதாக குறிப்பிட்டார். அதிமுகவில் தற்போதைய நிலை கவலை அளிப்பதாக குறிப்பிட்ட சசிகலா, தமிழக மக்களுக்கு அதிமுக ஆட்சியை நிச்சயம் அளிக்கப் போவதாக நம்பிக்கை தெரிவித்தார்.

நாளை காலை 9 மணிக்கு எடப்பாடி பழனிச்சாமி இல்லத்தில் முக்கிய நிர்வாகிகள் ஆலோசனை கூட்டம் நடைபெறுகிறது, சொந்த ஊர்களுக்கு சென்ற மூத்த தலைவர்கள் அவசரமாக வரவழைக்கப்பட்டுள்ளனர்.

அதிமுகவில் இருந்து ஓரம் கட்டப்பட்ட ஓ.பி.எஸ் மற்றும், சசிகலா தனித்தனியாக சுற்றுபயணம் துவங்கிய நிலையில் ஆலோசனை கூட்டத்திற்கு ஏற்பாடு செய்யப்பட்டுள்ளது. மேலும் ஓ.  பி எஸ் ஆதரவாளர்களை கணக்கெடுப்பு நடத்தி நடவடிக்கைகள் மேற்க்கொள்ள ஆலோசனை கூட்டத்தில் விவாதிக்கப்படும் என எதிர்பார்க்கப்படுகிறது.

ஏற்கனவே  ஓபிஎஸ் மீது நடவடிக்கை தொடங்கி இருக்கிறது. நமது அம்மா  நாளிதழின் நிறுவனர் பதவியில் இருந்து  ஓபிஎஸ் நீக்கப்பட்டுள்ள நிலையில் அவருக்கு ஆதரவானவர்களை கட்சியில் கட்டம் கட்ட ஈபிஎஸ் தரப்பு  முடிவு செய்துள்ளது.

நெல்லையில் நடைபெற்ற மக்கள் நீதிமன்றத்தில் எடுத்துக் கொள்ளப்பட்ட 6 ஆயிரம் வழக்குகளில் 1,500 வழக்குகளுக்கு உடனடி தீர்வு காணப்பட்டதாக மாவட்ட முதன்மை நீதிபதி குமரகுரு தெரிவித்துள்ளார்.

நாடு முழுவதும் நீதிமன்றங்களில் வழக்குகள் தேங்குவதை தடுக்கவும் பாதிக்கப்பட்ட மக்களுக்கு தாமதமின்றி நீதி கிடைக்கவும், தேசிய சட்டப்பணிகள் மூலம் மக்கள் நீதிமன்றங்கள் நடத்தப்பட்டு வருகிறது.

அந்த வகையில், நெல்லைக்கு உட்பட 9 தாலுகாவில் 25 அமர்வுகளில் வழக்குகள் விசாரணைக்கு எடுத்துக்கொள்ளப்பட்டன. 

நெல்லை மாவட்ட முதன்மை நீதிபதியும், மாவட்ட சட்டப்பணிகள் ஆணைக் குழு தலைவருமான குமரகுரு தலைமையில், நிலுவையில் உள்ள மோட்டார் வாகன விபத்து, குடும்ப நல வழக்குகள், காசோலை மோசடி உள்ளிட்ட வழக்குகளில் உடனடி தீர்வு காணப்பட்டது.

சென்னை அடுத்த மாங்காடு பத்மாவதி நகர் 1-வது தெருவில் அடுக்குமாடி குடியிருப்பின் கீழ் வீட்டில் மோகன் என்பவர் குடும்பத்துடன் வசித்து வருகிறார். இதே குடியிருப்பின் மேல்வீட்டில் நித்யா என்பவர் தனியாக வசித்து வருகிறார்.

இருவருக்கும் தனித்தனியே கார் பார்க்கிங் இடம் இருக்கும் நிலையில், வேறு ஒரு நபர் மோகன் அனுமதியுடன் பைக்கை பார்க்கிங் செய்ததாக கூறப்படுகிறது. இதுதொடர்பாக நித்யா- மோகன் இருவருக்கும் இடையே வாக்குவாதம் ஏற்பட்ட நிலையில்  ஒருவர்மீது ஒருவர் காலணியை வீசி தாக்கிக் கொண்டனர். 

ஒரு கட்டத்தில் ஆத்திரமடைந்த மோகன்,படிக்கட்டில் ஏறி சென்று நித்யாவின் தலைமுடியை பிடித்து தரதரவென கீழே இழுத்து வந்து தாக்கிய காட்சி இணையத்தில் வைரலாகி வருகிறது. இது தொடர்பாக விசாரணை நடத்திய மாங்காடு காவல்துறையினர் இருவரிடம் சமரச பேச்சு நடத்தி அனுப்பி வைத்ததாக கூறப்படுகிறது.