என் பக்கம் யார் இருக்கிறார்கள் என்பது பரம ரகசியம் - ஓ.பன்னீர்செல்வம்

அ.தி.மு.க.வின் நலன் கருதி சசிகலா மற்றும் டிடிவி தினகரனை நேரில் சந்தித்து நானே அழைப்பு விடுப்பேன் என ஓ.பன்னீர்செல்வம் தெரிவித்துள்ளார்.

என் பக்கம் யார் இருக்கிறார்கள் என்பது பரம ரகசியம் - ஓ.பன்னீர்செல்வம்

சென்னை பசுமை வழி சாலையில் உள்ள ஓ.பன்னீர்செல்வம் இல்லத்தில் அவரை நேரில் சந்தித்து அ.தி.மு.க. உசிலம்பட்டி சட்டமன்ற உறுப்பினர் ஐயப்பன் ஆதரவு தெரிவித்தார். அதைத்தொடர்ந்து ஓ.பன்னீர்செல்வம், சட்டமன்ற உறுப்பினர் ஐயப்பன், வைத்திலிங்கம் உள்ளிட்டோர் கூட்டாக செய்தியாளர்களை சந்தித்தனர்.

அப்போது பேசிய, ஓ.பன்னீர்செல்வம், அனைவரும் இணைந்து செயல்பட வேண்டும் என ஏற்கனவே சொல்லிவிட்டேன். இரு தரப்பையும் இணைக்க வலியுறுத்தி தமிழகம் முழுவதும் விரைவில் புரட்சி பயணம் மேற்கொள்ள உள்ளேன். மேலும், பலர் தன் பக்கம் வர உள்ளார்கள் அது யார் என்பது பரம ரகசியம் என ஓ.பன்னீர்செல்வம் தெரிவித்தார். ஆறுமுகசாமி ஆணைய அறிக்கையை முழுமையாக படித்த  பின்பு தான் கருத்து சொல்ல முடியும் எனக்கூறிய அவர், கட்சியின் நலன் கருதி சசிகலா, டி.டி.வி. தினகரன் ஆகியோரை நேரில் சந்தித்து அழைப்பு விடுப்பேன் என ஓ.பன்னீர்செல்வம் என கூறினார்.

மேலும் படிக்க : முதல் கணவருக்கு தெரியாமல் இரண்டாவது திருமணம் செய்த பெண் : வாட்ஸ்அப்பில் போட்டோ அனுப்பி ஷாக் !!

பின்னர் பேசிய வைத்திலிங்கம், கட்சிக்கு உழைக்க வில்லை என்றால், ஓ.பன்னீர்செல்வத்தை, ஜெயலலிதா எப்படி முதலமைச்சராக்கினார் என எடப்பாடி பழனிசாமிக்கு பதில் கூறினார். மேலும், ஒன்றரை கோடி தொண்டர்களின் விருப்பத்தை நிறைவேற்றவில்லை என்றால் எடப்பாடி  பழனிச்சாமி அரசியலில் அனாதையாகி விடுவார் என வைத்திலிங்கம் காட்டமாக விமர்சித்தார்.

முன்னதாக பேசிய, உசிலம்பட்டி சட்டமன்ற உறுப்பினர் ஐயப்பன், தனக்கு ஏற்பட்ட அவமானங்களை தாங்கி கொண்டு அனைவரும் ஒன்றாக இருக்க வேண்டும் என தெரிவித்தவர் ஓ.பன்னீர்செல்வம். ஆகவே, ராமருக்கு பாலம் கட்ட உதவிய அணில் போல் நானும் அவருக்கு உதவியாக இருப்பேன். மக்களை ஏமாற்றி கொண்டிருக்கும் தி.மு.க.வை அகற்ற அ.தி.மு.க. ஒன்றிணைந்து பயணிக்க வேண்டும் என ஐயப்பன் தெரிவித்தார்.