நேபாளத்தை சேர்ந்த டோர் பகதூர் கபாங்கி என்பவர், உலகின் மிக குள்ளமான இளைஞர் என கின்னஸ் உலக சாதனை அமைப்பால் அங்கீகரிக்கப்பட்டுள்ளார்.

2004ஆம் ஆண்டு நேபாளத்தில் பிறந்த இவர், 2 அடி 5 அங்குலம் உயரம் மட்டுமே வளர்ந்துள்ளார். இந்த நிலையில், டோர் பகதூர் உலகின் மிக குள்ளமான இளைஞர் என்று கின்னஸ் உலக சாதனை புத்தகத்தில் இடம்பெற்றுள்ளார்.

கின்னஸ் உலக சாதனை நிறுவனத்தால் ஏற்பாடு செய்யப்பட்ட விழாவில், அவருக்கு சான்றிதழ் வழங்கப்பட்டது. மேலும், உலகிலேயே உயரம் குறைந்த பெண் என்ற கின்னஸ் சாதனையை இந்தியாவை சேர்ந்த ஜோதி அம்கே தக்கவைத்துக் கொண்டுள்ளார். 

Handmaid’s tale என்னும் புத்தகத்தின் எரிக்க முடியாத பிரதி, அமெரிக்காவில் ஏலம் விடப்பட உள்ளதாக தெரிவிக்கப்பட்டுள்ளது.

கனடாவை சேர்ந்த பிரபல பெண் எழுத்தாளர் மார்கரெட் அட்வுட் எழுதிய இப்புத்தகம் 1985ஆம் ஆண்டு வெளியானது. பாலியல் வெளிப்படைத்தன்மை மற்றும் கிறிஸ்தவர்களை புண்படுத்தும் வகையில் எழுதப்பட்டு இருந்ததால் போர்டுகல், ஸ்பெயின் உள்ளிட்ட பல நாடுகளில் இப்புத்தகம் தடை செய்யப்பட்டது. 

இதனிடையே நெருப்பை எதிர்க்கும் பூச்சு கொண்ட தாளில் அச்சடிக்கப்பட்டு, நிக்கல் கம்பியால் தைக்கப்பட்டு எரிக்க முடியாத வகையில் தயாரிக்கப்பட்ட Handmaid’s tale புத்தகத்தின் பிரதி ஏலம் விடப்பட உள்ளதாக தெரிவிக்கப்பட்டுள்ளது. இந்த புத்தகம் 50 ஆயிரம் முதல் ஒரு லட்சம் டாலருக்கு விற்பனையாகும் என எதிர்பார்ப்பதாக ஏல நிறுவனம் தெரிவித்துள்ளது.

கந்த்வா மாவட்டத்துக்கு உட்பட்ட கல்வா பகுதியில், யாசகம் எடுத்து கொண்டிருந்த சாது ஒருவருடன் ஓட்டலில் வேலை பார்க்கும் பிரவீன் கவுர் என்பவர் வாக்குவாதம் செய்ததாக கூறப்படுகிறது.

இதில் ஆத்திரமடைந்த  பிரவீன் கவுர், சாதுவை தர தர வென முடிவெட்டும் கடைக்குள் இழுத்து சென்று, அவரை தகாத வார்த்தைகளால் திட்டி,  முடியை வெட்டி அகற்றியுள்ளார்.

இதனை கண்ட மக்கள், உடனடியாக சாதுவை மீட்டு விடுவித்துள்ளனர். இந்தநிலையில் இதுதொடர்பான வீடியோ வைரலாகி பெரும் அதிர்வலையை ஏற்படுத்தியதை அடுத்து,  பிரவீன் கவுர் கைது செய்யப்பட்டார்.

A Sadhu was assaulted in Khandwa, he was abused and his hair was chopped off. The accused Praveen Gaur has been arrested @ndtv @ndtvindia pic.twitter.com/drqGzbf4ih

— Anurag Dwary (@Anurag_Dwary) May 24, 2022

டெக்சாஸ் மாகாணத்துக்கு உட்பட்ட உவல்டே பகுதியில் தொடக்கப்பள்ளி ஒன்று உள்ளது. இங்கு கோடை விடுமுறையை ஒட்டி நாளையுடன் பள்ளி வகுப்புகள் நிறைவடைய இருந்தது. இந்தநிலையில் திடீரென வாகனத்தில் பள்ளிக்கு வந்த நபர், கையில் இருந்த துப்பாக்கியுடன் வகுப்பறையில் இருந்த மாணவர்கள் மற்றும் அதனை தடுக்க வந்த ஆசிரியர்கள் மீது சரமாரி துப்பாக்கி சூடு நடத்தியுள்ளார். இதனிடையே குழந்தைகளின் அலறல் சத்தம் கேட்டு, காவல் துறைக்கு பள்ளி நிர்வாகம் தகவல் கொடுத்துள்ளது.

இதைத்தொடர்ந்து சம்பவ இடம் விரைந்த போலீசார், மர்ம நபர் மீது பதில் தாக்குதல் நடத்தி அவரை சுட்டு வீழ்த்தியுள்ளனர். கண்ணிமைக்கும் நேரத்தில் நடந்து முடிந்த இந்த துப்பாக்கிச்சூட்டில் 18 மாணவர்கள் உள்பட 21 பேர் பலியானதாக தகவல் வெளியாகியுள்ளது. மேலும் 13க்கு மேற்பட்ட மாணவர்கள் படுகாயமுற்றுள்ளனர்.  இந்தநிலையில் படுகொலை சம்பவத்தை உறுதி செய்துள்ள மாகாண ஆளுநர், இதுகுறித்து விசாரணைக்கு உத்தரவிட்டுள்ளதாக தெரிவித்துள்ளார். 

இதனிடையே கொடூர சம்பவத்தை அரங்கேற்றுவதற்கு முன், அந்த நபர் தனது  பாட்டியை படுகொலை செய்து விட்டு வந்ததாகவும் கூறப்படுகிறது. இனவெறி தாக்குதலா அல்லது மனநிலை பாதிப்பு காரணமாக அந்த நபர் படுகொலை சம்பவத்தை அரங்கேற்றினாரா என போலீசார் விசாரிக்கின்றனர். இந்தநிலையில் சம்பவத்துக்கு கடும் கண்டனம் தெரிவித்துள்ள அதிபர் ஜோ பைடன், துப்பாக்கி சூடு சம்பவங்கள் தொடர்பாக கடும் நடவடிக்கை எடுக்கப்படும் என எச்சரித்துள்ளார். துப்பாக்கி சூட்டில் மாணவர்கள் உயிரிழந்தநிலையில், அமெரிக்காவில் உள்ள தூதரகங்கள், அரசு அலுவலகங்களில் கொடி அரைக்கம்பத்தில் பறக்கவிடப்பட்டுள்ளது. 

லண்டனுக்கு சுற்றுப்பயணம் மேற்கொண்டுள்ள ராகுல் காந்தி, ‘75ல் இந்தியா’ என்ற தலைப்பில் கேம்பிரிட்ஜ் பல்கலைக்கழகத்தின் உறுப்பு கல்லூரியில் நடைபெற்ற  நேர்காணல் நிகழ்ச்சியில் கலந்து கொண்டார்.

அப்போது தந்தையின் மரணம் பற்றி பேசிய அவர், மன்னிப்பு என்ற வார்த்தை மட்டுமே நினைவுக்கு வருவதாகவும், அவரது மரணம் மூலம் வாழ்க்கை பற்றிய மிக முக்கிய பாடத்தை கற்றுக்கொண்டதாகவும் தெரிவித்தார். 

தொடர்ந்து பேசிய அவர், மாநிலங்களை ஒன்றிணைத்ததே பாரதம் என்றும், ஆனால் மோடி அரசு அனைத்து மக்களையும் உள்ளடக்காத கண்ணோட்டத்தை உருவாக்கி வருவதாகவும், இது இந்தியாவின் சித்தாந்தத்துக்கு எதிரானது எனவும் கூறியுள்ளார்.