தேனி மாவட்டம் கம்பம் நகரில் காந்தி சிலை உடைக்கப்பட்டதால் பரபரப்பு ஏற்பட்டுள்ளது.

தேனி மாவட்டம் கம்பம் நகரில் குமுளி தேனி தேசிய நெடுஞ்சாலையில் காந்தி சிலை அமைக்கப்பட்டு உள்ளது. முக்கிய தலைவர்கள் மற்றும் அரசியல்வாதிகள் காந்தி சிலையின் முன்பு அவ்வப்போது பல்வேறு விழாக்களை நடத்தி வருவது வழக்கம்.

இந்நிலையில் இன்று காலை  அப்பகுதிக்கு வந்த பொதுமக்கள் காந்தி சிலையின் வலது கை உடைக்கப்பட்டு சிலையில் ஒரு கை இல்லாமல் இருப்பதை பார்த்து அதிர்ச்சி அடைந்துள்ளனர்.

இதுகுறித்து கம்பம் தெற்கு காவல் நிலையத்திற்கு  அவர்கள் தகவல் தெரிவித்துள்ளனர்.  தகவல் அறிந்து வந்த  ஏராளமான போலீசார் சம்பவ இடத்தில் பாதுகாப்பு பணியில் ஈடுபட்டு வருகின்றனர்.

மேலும் சிலையில் இருந்த கையை அகற்றி அங்கிருந்து எடுத்துச் சென்ற மர்ம நபர்கள் யார் என்பது குறித்து தீவிர விசாரணை மேற்கொண்டு குற்றவாளிகளை தேடி வருகின்றனர்.

காந்தி சிலையை உடைத்து சேதப்படுத்தியது தெரிய வந்து காங்கிரஸ் மற்றும் பல்வேறு அரசியல் கட்சியினர் சிலையின் முன்பு அமர்ந்து காந்தியின் சிலையை அவமதித்த குற்றவாளிகளை விரைந்து கண்டுபிடிக்க வேண்டுமென வலியுறுத்தி தொடர் தர்ணா போராட்டத்தில் ஈடுபட்டு வருகின்றனர்.

காந்தி சிலை உடைக்கப்பட்டு அப்பகுதியில் ஏராளமான போலீசார் குவிக்கப்பட்டு  பல்வேறு அரசியல் கட்சி பிரமுகர்கள் தர்ணா போராட்டத்தில் ஈடுபட்டு வருவது கம்பம் நகர் பகுதியில் பெரிதும் பரபரப்பை ஏற்படுத்தி வருகின்றது.

திருச்சியில் ஆசிரியர் தாக்கியதில் பத்தாம் வகுப்பு மாணவர் மனநலம் பாதிக்கப்பட்டு சிகிச்சை பெற்று வரும் நிலையில், ஆசிரியர் மீது நடவடிக்கை எடுக்குமாறு பெற்றோர் கண்ணீர் மல்க கோரிக்கை விடுத்துள்ளனர்.

திருச்சி, காஜா நகரில் வசித்து வரும் இக்பால் என்பவரின் மூத்த மகன் தாமீர். அப்பகுதியில் உள்ள அரசு உதவி பெறும் காஜாமியான் பள்ளியில் பத்தாம் வகுப்பு பயின்று வருகிறார். 

இவர் நடந்து முடிந்த காலாண்டு தேர்வில் சமூக அறிவியல் பாடத்தில் குறைவான மதிப்பெண் எடுத்ததாக கூறப்படுகிறது. இதனால் ஆத்திரமடைந்த சமூக அறிவியல் ஆசிரியர் முருகதாஸ், தாமீரை பிரம்பால் சரமாரியாக அடித்து கொடுமை செய்துள்ளார்.

மேலும், "கொலை செய்து மண்ணில் புதைத்து விடுவேன், என்னை யாரும் கேட்க முடியாது " என மிரட்டியதாக கூறப்படுகிறது. இதனால் உடலளவிலும், மனதளவிலும் மாணவர் தாமீர் கடுமையாக பாதிக்கப்பட்டுள்ளார்.

இதுகுறித்து மாணவனின் தந்தை இக்பால் கூறுகையில், "இதுகுறித்து பலமுறை பள்ளியின் தலைமை ஆசிரியர்,  பள்ளியின் செயலாளர் மற்றும் தாளாளர் அவர்களிடமும் பல முறை பள்ளிக்கு நேரில் வந்தும் அந்த ஆசிரியர் மீது நடவடிக்கை எடுக்க வேண்டும் என கூறினேன். எனது மகனை எனது வீட்டிற்கு வந்து தலைமை ஆசிரியர் சந்தித்த போதும் முருகதாஸ் ஆசிரியர் மீது நடவடிக்கை எடுக்க வேண்டும் என வலியுறுத்தி கூறிவந்தேன். தலைமை ஆசிரியர் மற்றும் செயலாளர்& தாளாளரும் நடவடிக்கை எடுப்பதாக உறுதி அளித்தார்கள்.  ஆனால், ஒரு மாதம் கடந்தும் நடவடிக்கை எடுப்பதாக தெரியவில்லை" எனத் தெரிவித்துள்ளார்.

மேலும்,  "இறுதியாக கடந்த வெள்ளி கிழமை (24.11.23) அன்று என்னை பள்ளிக்கு நேரில் அழைத்த போதும் எனது மகனின் நிலை தொடர்ந்து சிகிச்சை எடுப்பதற்கு உரிய நிலை ஆகிவிட்டது என கூறினேன். ஆனால் தலைமை ஆசிரியரும், தாளாளரும் எனது மன வேதனையையும், எனது மகனின் நிலை இப்படி ஆகிவிட்டது என்றெல்லாம் கருதாமல் ரூ. 5000/- (ஐந்தாயிரம் ரூபாய்) வைத்துக்கொள் என்று என் சட்டைப்பாக்கெட்டில் திணித்ததைக் கண்டு அதிர்ச்சியும், கடும் மன வேதனையும் அடைந்தேன். பணத்தை திருப்பியும் கொடுத்துவிட்டேன். இதுவரை எந்த நடவடிக்கை வில்லை எனவே மாணவனை தாக்கிய ஆசிரியர் முருகதாஸ் மீது கடும்  நடவடிக்கை எடுக்க வேண்டும் என்று தாழ்மையுடன் கேட்டுக் கொள்கிறேன்" என மனவேதனையுடன் தெரிவித்துள்ளார்.

சொத்துகுவிப்பு வழக்கில் இருந்து அமைச்சர் தங்கம் தென்னரசு  விடுவிக்கப்பட்டது தொடர்பாக தாமாக முன்வந்து விசாரணைக்கு எடுத்த வழக்கின் விசாரணையை டிசம்பர் எட்டாம் தேதிக்கு சென்னை உயர் நீதிமன்றம் ஒத்திவைத்துள்ளது.

கடந்த தி.மு.க ஆட்சியில் அமைச்சர் தங்கம் தென்னரசு 2006 மே 15 முதல் 2010 மார்ச் 31 வரையிலான காலத்தில் 76 லட்சத்து 40 ஆயிரத்து 443 ரூபாய் சொத்து குவித்ததாக கடந்த 2012ஆம் ஆண்டு பிப்ரவரி 14 தேதி தங்கம் தென்னரசு, அவரது மனைவி மணிமேகலை ஆகியோர் மீது  விருதுநகர் மாவட்ட லஞ்ச ஒழிப்பு காவல்துறை வழக்கு பதிவு செய்தது.

இந்த வழக்கு விருதுநகர் மாவட்டம் ஸ்ரீவில்லிபுத்தூரில் உள்ள மாவட்ட முதன்மை அமர்வு நீதிமன்றத்தில் நடைபெற்று வந்தது.   இந்த வழக்கில் இருந்து விடுவிக்க வேண்டும் என தங்கம் தென்னரசு தாக்கல் செய்த மனுவை விசாரித்த முதன்மை அமர்வு நீதிமன்றம் சொத்து குவிப்பு வழக்கில் இருந்து தங்கம் தென்னரசு அவரின் மனைவி ஆகியோரை விடுவித்து உத்தரவிட்டது.

வழக்கிலிருந்து  தங்கம் தென்னரசு உள்ளிட்டோரை விடுவித்த ஸ்ரீவில்லிபுத்தூர் முதன்மை அமர்வு நீதிமன்ற உத்தரவை மறுஆய்வு செய்யும் வகையில் சென்னை உயர் நீதிமன்றம் தாமாக முன்வந்து வழக்கை விசாரணைக்கு எடுத்தது.  

இதையும் படிக்க: "10 ஆண்டுகளில் யானையை பார்க்க முடியாது" உயர்நீதிமன்றம் வேதனை! 

கோவை ஜோஸ் ஆலுக்காஸ் நகைக்கடையில் ஒரு நபர் மட்டுமே புகுந்து கொள்ளையடித்தது உறுதி செய்யப்பட்டுள்ளதாக, கோவை மாநகர காவல்துறை ஆணையர் பாலகிருஷ்ணன் தெரிவித்திருக்கிறார். 

கோவை நூறடி சாலையில் உள்ள ஜோஸ் ஆலுகாஸ் நகைக்கடை, வழக்கம் போல் திறக்கப்பட்டது. அப்போது கடையில் வைத்திருந்த விலை உயர்ந்த சில நகைகள் காணாமல் போயிருந்ததை கண்டு ஊழியர்கள் அதிர்ச்சி அடைந்தனர்.

இதையும் படிக்க : ED அனுப்பிய சம்மனுக்கு இடைக்கால தடை விதிப்பு - உயர்நீதிமன்றம் தீர்ப்பு!

உடனடியாக காவல்துறைக்கு தகவல் தெரிவிக்கப்பட்டதை அடுத்து நிகழ்வு இடத்திற்கு விரைந்து வந்த போலீசார், தடய அறிவியல் துறை அதிகாரிகள், மோப்பநாய் உதவியுடன் ஆய்வு செய்தனர்.  அப்போது கொள்ளையன் நகை கடைக்குள் வந்த வழி கண்டறியப்பட்டது. பின்னர் கடையில் பொருத்தப்பட்டிருந்த சிசிடிவி கண்காணிப்பு கேமராவை ஆய்வு செய்ததில் முகமூடி அணிந்த நபர் நகைகளை கொள்ளையடித்து சென்றது தெரிய வந்தது.

இச்சம்பவம் குறித்து செய்தியாளர்களிடம் பேசிய கோவை மாநகர காவல் துறை ஆணையர் பாலகிருஷ்ணன், இரவு ஒரு மணி அளவில் ஜோஸ் ஆலுக்காஸ் கடைக்கு வந்த ஒரு நபர், ஏசி தட்டு வழியாக உள்ளே புகுந்து கொள்ளையடித்து சென்றதாக தெரிவித்தார். நகைக்கடையில் இருந்து 26 கிலோ எடையுள்ள தங்க நகைகள் கொள்ளையடிக்கப்பட்டுள்ளதாகவும், 5 தனி படைகள் அமைக்கப்பட்டுள்ள நிலையில் விரைவில் குற்றவாளியை பிடித்துவிடுவோம் என்றும் பாலகிருஷ்ணன் உறுதிப்பட தெரிவித்தார். 

அதிமுக ஆட்சி காலத்தில் சுடுகாட்டு கூரை அமைத்ததில் ஊழல் செய்ததாக சிபிஐ பதிவுசெய்த வழக்கில் விதிக்கப்பட்ட 2 ஆண்டுகள் சிறைதண்டனையை எதிர்த்து முன்னாள் அமைச்சர் செல்வகணபதி தாக்கல் செய்த மேல்முறையீட்டு வழக்கில் தண்டனையை ரத்து செய்து சென்னை உயர்நீதிமன்றம் தீர்ப்பளித்துள்ளது.

1991 முதல் 1996 வரையிலான அதிமுக ஆட்சி காலத்தில், 1995 மற்றும் 1996ஆம் ஆண்டுகளில் உள்ளாட்சித் துறை அமைச்சராக பதவி வகித்த T.M.செல்வகணபதி, தமிழகம் முழுவதும் சுடுகாடுகளுக்கு கூரை அமைக்கும் திட்டத்தில் 23 லட்சம் ரூபாய் அரசுக்கு இழப்பு ஏற்படுத்தியதாக சிபிஐ வழக்குப்பதிவு செய்தது.

இந்த வழக்கை விசாரித்த சென்னை சிபிஐ சிறப்பு நீதிமன்றம், செல்வகணபதி, ஐஏஎஸ் அதிகாரிகள் ஜெ.டி.ஆச்சார்யலு, எம்.சத்தியமூர்த்தி உள்பட 5 பேருக்கும் தலா 2 ஆண்டுகள் சிறை தண்டனை விதித்து கடந்த 2014ம் ஆண்டு தீர்ப்பளித்தது. அதேசமயம், கூட்டுச் சதி குற்றச்சாட்டில் இருந்து இவர்களை விடுதலை செய்தும் தீர்ப்பளித்தது.

இந்த தீர்ப்பிற்கு பிறகு, கூட்டுசதி குற்றச்சாட்டில் விடுதலை செய்யப்பட்டதை எதிர்த்து சிபிஐ தரப்பிலும், இரண்டாண்டு சிறை தண்டனையை எதிர்த்து முன்னாள் அமைச்சர் செல்வகணபதி உள்ளிட்டோர் தரப்பிலும் சென்னை உயர் நீதிமன்றத்தில் 2014ஆம் ஆண்டில் மேல்முறையீடு மனுக்கள் தாக்கல் செய்யப்பட்டன.

இந்த வழக்குகள் நீதிபதி ஜி.  ஜெயச்சந்திரன் முன்பு விசாரணைக்கு வந்தது. அப்போது மனுதாரர் (குற்றவாளிகள்) தரப்பில், பணிகள் முடிந்து 3 ஆண்டுகள் கழித்து ஆய்வு செய்யப்பட்டதாகவும், அதன்பின்னர் ஒன்றரை ஆண்டிற்கு பிறகே அறிக்கை தாக்கல் செய்யப்பட்டதாகவும், சுடுகாடுகளுக்கு சுற்றுச்சுவர் இல்லாததாலும், திறந்தவெளி அமைந்திருந்ததாலும், அப்பகுதியில் உள்ளவர்களாலேயே கட்டடங்கள் சேதப்படுத்தப்பட்டதாகவும் வாதிடப்பட்டது. அதேபோல், புகார் அளித்த வழக்கறிஞர் ரவிச்சந்திரனிடம் விசாரிக்கவில்லை என்றும், உரிய ஆய்வு நடத்தாமல் இருந்த சிபிஐ திடீரென அறிக்கை தாக்கல் செய்ததை சிறப்பு நீதிமன்றம்  ஏற்றுக்கொண்டதும், தண்டனை வழங்கியதும் தவறு என்பதால், தீர்ப்பை ரத்து செய்து தங்களை விடுதலை செய்ய வேண்டுமெனவும் வாதம் முன்வைக்கப்பட்டது.

இதையும் படிக்க : ED எதிரான வழக்கில் சென்னை உயர்நீதிமன்றம் இன்று தீர்ப்பு!

தொடர்ந்து சிபிஐ தரப்பில், மத்திய அரசின் திட்ட நிதி தவறாக பயன்படுத்தப்பட்டுள்ளது எனவும், 100 சுடுகாடுகளுக்கு மேற்கூரை அமைக்க ஒப்புதல் அளித்துவிட்டு 96 சுடுகாடுகாடுகளுக்கு மட்டுமே முடிக்கப்பட்டுள்ளது எனவும், அதிலும் தலா 23 லட்சம் ரூபாய் தொகையை பெற்றுக்கொண்டுள்ள நிலையில் 17 லட்ச ரூபாய் அளவிற்கு மட்டுமே பணிகள் மேற்கொள்ளப்பட்டுள்ளதாகவும் ஆய்வில் தெரியவந்துள்ளது என வாதிடப்பட்டது. எனவே சிறப்பு நீதிமன்ற தண்டனையை உறுதிசெய்வதுடன், கூட்டுச்சதி குற்றச்சாட்டிலும் அனைவரையும் தண்டிக்க வேண்டுமெனவும் வாதிடப்பட்டது.

இதனைத்தொடர்ந்து அனைத்து தரப்பு வாதங்களும் கடந்த நவம்பர் 9ஆம் தேதி முடிவடைந்த நிலையில், வழக்குகளின் மீதான தீர்ப்பை நீதிபதி ஜி.ஜெயச்சந்திரன் தேதி குறிப்பிடாமல் தள்ளிவைத்திருந்தார். 

இந்நிலையில், அதிமுக ஆட்சி காலத்தில் சுடுகாட்டு கூரை அமைத்ததில் 23 லட்சம் ரூபாய் ஊழல் செய்ததாக சிபிஐ பதிவுசெய்த வழக்கில் விதிக்கப்பட்ட 2 ஆண்டுகள் சிறைதண்டனையை எதிர்த்து, முன்னாள் அமைச்சர் செல்வகணபதி தாக்கல் செய்த மேல்முறையீட்டு வழக்கில் 2 ஆண்டுகள் சிறை தண்டனையை ரத்து செய்து சென்னை உயர்நீதிமன்ற நீதிபதி ஜெயச்சந்திரன் தீர்ப்பளித்துள்ளார்.