இளைஞர்களை ஏமாற்றி, திருமணம் செய்துக் கொண்டு, அவர்களது உறவினர்களை குறிவைத்து கோடிகளை குவித்த பெண்ணை காவல்துறையினர் கைது செய்துள்ளனர்.
கரூரை சேர்ந்த சுரேஷ் என்பவர், மணிமுத்தாறில் போலிஸ் அதிகாரியாக பணியாற்றி வருகிறார். இவரது காதல் மனைவி சவுமியா. இவர் தனது உறவினர்களுடன் சேர்ந்து இளைஞர்களிடம் வேலை வாங்கி தருவதாக கைவரிசையை காட்டி வந்துள்ளார்.
இளைஞர்களுடன் நெருக்கமாக பழகும் சவுமியா, அவர்களை தன்னோட வலையில் விழ வைத்து, அவர்களது உறவினர்களிடம் கரூரை சேர்ந்த மாஜி அமைச்சர் தனக்கு நல்ல பழக்கம் எனவும், அவரிடம் கூறினால் உடனே அரசு வேலை எனவும் கூறி பணத்தை கறந்து வந்துள்ளார்.
இந்த வலையில் விழுந்தவர் தான் விஜய். சவுமியாவின் உறவினரான விஜய், அரசு வேலைக்காக கிட்டத்தட்ட 15 சவரன் நகைகளை சவுமியாவிடம் கொடுத்துள்ளார். அதுமட்டுமின்றி தனது உறவினர்களிடம் இருந்து அதிகபட்சமாக 50 லட்சம் ரூபாய் வரை சுருட்டியுள்ளார் சவுமியா. இதனை தனி ஆளாக மட்டுமல்லாது, உறவினரான சதீஷ் என்பவருடன் சேர்ந்து செய்துள்ளார்.
பணம் கொடுத்து ஏமாந்தவர்கள் சவுமியாவின் கணவரும் போலிஸ் அதிகாரியுமான சுரேஷிடம் சென்று விசாரித்த போது, இருவரும் பிரிந்து விட்டதாக கூறியிருக்கிறார் சுரேஷ். இதனால் ஆத்திரமடைந்த ஏமாந்தவர்கள் காவல்நிலையத்தில், சவுமியா, சதீஷ், சுரேஷ் ஆகியோர் மீது புகார் அளித்தனர்.
அதனடிப்படையில் வழக்குப் பதிவு செய்த அதிகாரிகள், சேலத்தில் தனது 3-வது கணவர் வீட்டில் பதுங்கியிருந்த சவுமியாவை கையும், களவுமாக பிடித்து விசாரணை மேற்கொண்டனர். அப்போது சவுமியாவின் இத்தனை நாடகத்திற்கும் அவரது முதல் கணவர் சுரேஷ் தான் காரணம் என்ற திடுக்கிடும் உண்மை வெளிவந்தது. ஆக சுரேஷ் ஸ்கெட்ச் போட்டுக் கொடுக்க, கிட்டத்தட்ட 2 பேருடன் நெருக்கத்துடன் இருந்து அவர்களின் வங்கி கணக்கு வாயிலாக மோசடி செய்யப்படும் பணத்தை பதுக்கி வைத்தால் தன் மீது எவ்வித சந்தேகமும் வராது என செம பிளானை அரங்கேற்றியுள்ளார் சவுமியா.
ஒரு காவல் அதிகாரியான சுரேஷ் மீது துறை ரீதியான நடவடிக்கை எடுக்க வேண்டும் என பாதிக்கப்பட்டவர்கள் புகார் தெரிவித்துள்ளனர். மேலும் சவுமியா, சதீஷ் ஆகியோர் மீது கடும் நடவடிக்கை எடுக்க வேண்டும் எனவும் கோரிக்கை எழுந்துள்ளது.