மகாராஷ்டிராவின் தானேவில் உள்ள செல்வாக்கு மிக்க ஒரு குடும்பத்தில் ஏற்பட்ட குடும்பச் சண்டை, மூடநம்பிக்கை மற்றும் மாந்திரீகச் சடங்குகள் தொடர்பான குற்றச்சாட்டுகளால் மோசமான திருப்பத்தை எடுத்துள்ளது.
உத்தவ் தாக்கரேவின் கட்சியைச் சேர்ந்த முன்னாள் நாடாளுமன்ற உறுப்பினர் மற்றும் பிற குடும்ப உறுப்பினர்கள் மீது, அவரது மருமகள் மூடநம்பிக்கை சடங்குகளுக்காக தன்னை 'பசுவின் சிறுநீரை'க் குடிக்க வற்புறுத்தியதாகவும், தனது முடியைப் பிடுங்கியதாகவும் குற்றம் சாட்டியதைத் தொடர்ந்து வழக்கு பதிவு செய்யப்பட்டுள்ளது. அரசியல்வாதி விநாயக் ராவத், அவரது மனைவி மற்றும் கவுன்சிலர் மகனான கீதேஷ் ராவத் ஆகியோர் மீது மூடநம்பிக்கை எதிர்ப்புச் சட்டத்தின் கீழ் காவல்துறை தற்போது வழக்குப் பதிவு செய்துள்ளது. சூனியக்காரர்கள் எனக் கூறப்படும் ஃபெரோஸ் மற்றும் காசி ஆகிய இருவரின் பெயர்களும் முதல் தகவல் அறிக்கையில் குறிப்பிடப்பட்டுள்ளன.
தனது மாமியார் வீட்டினர் தன்னை மனரீதியாகத் துன்புறுத்தித் தாக்கியதாகவும், பலமுறை பட்டினி போடப்பட்டதாகவும் கிரிஜா ராவத் குற்றம் சாட்டியுள்ளார். இது குறித்து பேசிய அவர், "நான் ஏழு ஆண்டுகளாக சமூக, மன மற்றும் உணர்ச்சி ரீதியான துன்புறுத்தல்களை எதிர்கொண்டு வருகிறேன்," என்று அவர் செய்தியாளர்களிடம் தெரிவித்துள்ளார்.
மேலும், அவரது கணவருக்கு மலட்டுத்தன்மை பிரச்சனை இருப்பதாகக் கூறி, அவரது குடும்பத்தினர் தன்னை மாந்திரீகர்களிடம் அழைத்துச் சென்றதாக அவர் குற்றம் சாட்டியுள்ளார். குடும்பத்தின் தலைவராக இருந்தபோதிலும், விநாயக் ராவத் தனது தரப்பு வாதத்தை ஒருபோதும் ஏற்கவில்லை என்றும் அவர் குற்றம் சாட்டியுள்ளார். இந்த விவகாரம் குறித்து, விநாயக் ராவத் அனைத்து குற்றச்சாட்டுகளையும் நிராகரித்ததோடு, ஜீவனாம்சமாக ரூ.12 கோடி, மூன்று அறைகள் கொண்ட வீடு மற்றும் ஒரு கார் ஆகியவற்றை கொடுக்காதவறியதால் தனது மருமகள் இதுபோன்ற தந்திரத்தைக் கையாண்டதாகக் குற்றம் சாட்டியுள்ளார். மேலும், பேசிய அவர் "இந்தக் குற்றச்சாட்டுகளுக்குப் பின்னால் உள்ள உண்மையான காரணம் விவாகரத்து வழக்குதான். அவர்களின் வரம்பு மீறிய கோரிக்கைகளுக்கு நாங்கள் இணங்க மறுத்தபோது, அவர் இதுபோன்ற தந்திரங்களைக் கையாண்டு, பொய்க் குற்றச்சாட்டுகளை முன்வைத்தார்," என்று அவர் கூறியுள்ளார்.
இதனையடுத்து, அவருக்குப் பதிலளித்த அவரது மருமகள், "தாங்கள் ஒரு செல்வாக்கு மிக்க குடும்பத்தைச் சேர்ந்தவர்கள் என்பதால், முன்னதாகப் புகார் அளிக்கத் தனக்குத் தைரியம் வரவில்லை" என்று தெரிவித்துள்ளார். மேலும், ஊட்டியில் நடந்த தேனிலவின்போது, தன் கணவர் தன்னிடம் உடல்ரீதியான உறவை மறுத்ததாகவும் அவர் குற்றம் சாட்டியுள்ளார். தான் அவரிடம் நெருங்க முயன்றபோதெல்லாம், அவர் தன்னைத் தள்ளிவிட்டதாகவும், சர்வதேச இடங்களில் மட்டுமே தன்னால் நெருக்கமாக இருக்க முடியும் என்றும், இந்தியாவிற்குள் முடியாது என்றும் அவர் தன்னிடம் கூறியதாகவும் அவர் தெரிவித்துள்ளார்.
ஊட்டியில் இருந்து திரும்பிய பிறகு, தங்களது மூதாதையர் கிராமமான தல்காவ்னில் நடந்த வரவேற்பு நிகழ்ச்சிக்குச் செல்லும் வழியில், அவர் தன்னை பகிரங்கமாக அவமதித்ததாக அவர் தெரிவித்துள்ளார்.
இதுபோன்ற சண்டைகள் அடிக்கடி நடக்கும் என்றும், அவர் சுற்றுப்புறத்தைப் பற்றி ஒருபோதும் கவலைப்பட்டதில்லை என்றும் கிரிஜா ராவத் கூறினார். நேரத்தையும் இடத்தையும் பொருட்படுத்தாமல், அவரது கோபம் தணியும் வரை அவர் தொடர்ந்து வாக்குவாதம் செய்துகொண்டே இருப்பார் என்றும் அவர் குற்றம் சாட்டியுள்ளார்.
இதனையடுத்து, 2018-ல் அவர்கள் ஆஸ்திரேலியா சென்றிருந்தபோது, தன் கணவர் தன்னைத் தொடர்ந்து தவிர்த்து வந்ததாக கிரிஜா தெரிவித்துள்ளார். கிரிஜா இதுகுறித்துப் பேச முயன்றபோது, அவர் தாக்கப்பட்டதாகவும், இருவரும் உடல்ரீதியாக நெருக்கமாகப் பழகினால் அவர் இறந்துவிடுவார் என்று எச்சரிக்கப்பட்டதாகவும் கூறப்படுகிறது. குற்றச்சாட்டுகள் அவரது கணவர் மீது மட்டுமல்ல, அவரது குடும்பத்தைச் சேர்ந்த மற்றவர்கள் மீதும் இருந்தன என்பது குறிப்பிடத்தக்கது. அவர்கள் மனரீதியான துன்புறுத்தல், இழிவான நடத்தை, குடும்ப வன்முறை மற்றும் பலமுறை தன்னைக் கைவிட்டதாக அவர் குற்றம் சாட்டினார். அவரது குற்றச்சாட்டுகளின் அடிப்படையில் காவல்துறை வழக்குப் பதிவு செய்து விசாரணையைத் தொடங்கியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்