மகாராஷ்டிரா மாநில சாலை மேம்பாட்டுக் கழகத்துடன் (MSRDC) தொடர்புடைய 45 கோடி ரூபாய் பணப் பரிவர்த்தனைகளில் உள்நாட்டு விசாரணை நடத்தப்பட்டதாக வெளியான செய்திகளால், எச்டிஎப்சி வங்கி பெரும் பரபரப்பைச் சந்தித்துள்ளது. இந்த விவகாரத்தில் முறைகேடு எதுவும் நடக்கவில்லை என்று எச்டிஎப்சி வங்கி திட்டவட்டமாக மறுத்துள்ளது. வங்கியின் உள்நாட்டு நடைமுறைகள் மிகவும் வலுவாக இருப்பதாகவும், அனைத்து விவகாரங்களும் முறையான செயல்முறைகளின் படியே கையாளப்படுவதாகவும் வங்கி நிர்வாகம் தரப்பில் விளக்கம் அளிக்கப்பட்டுள்ளது. இந்தச் செய்தி வெளியானதைத் தொடர்ந்து, பங்குச்சந்தையில் எச்டிஎப்சி வங்கியின் பங்குகள் புதன்கிழமை வர்த்தகத்தில் சுமார் 2.6 சதவீதம் சரிந்து, என்எஸ்இ (NSE) சந்தையில் 758.75 ரூபாயாக விற்பனையானது.
இந்த விவகாரம் குறித்து தி இந்தியன் எக்ஸ்பிரஸ் வெளியிட்ட செய்தியின்படி, மகாராஷ்டிரா சாலை மேம்பாட்டுக் கழகத்திற்கு சுமார் 45 கோடி ரூபாய் வரை "வேறுபட்ட வட்டி" (Differential Interest) என்ற பெயரில் கூடுதல் பணம் வழங்கப்பட்டதாகக் கூறப்படுகிறது. அதிக வைப்புத் தொகைகளை ஈர்ப்பதற்காகவே இந்தத் தொகை கூடுதல் பலனாக வழங்கப்பட்டதாகவும், ஆனால் இந்தத் தொகை வங்கியின் கணக்குகளில் "மார்க்கெட்டிங் செலவுகள்" (Marketing Expenses) என்று தவறாகக் காட்டப்பட்டதாகவும் அந்த அறிக்கையில் குறிப்பிடப்பட்டுள்ளது. மேலும், வங்கியின் உள்நாட்டு விசாரணையில், நிர்வாக இயக்குனர் மற்றும் தலைமை செயல் அதிகாரி சசிதர் ஜெகதீசன் உட்பட பல உயர் அதிகாரிகளுக்கு இதில் பொறுப்பு இருப்பதாகவும் அந்த அறிக்கை குற்றம் சாட்டியிருந்தது. வங்கி விதிகளின்படி, வைப்புதாரர்களுக்குத் தனித்தனியாக வெவ்வேறு வட்டி விகிதங்களை வழங்க அனுமதி இல்லை என்பது குறிப்பிடத்தக்கது.
இந்தக் குற்றச்சாட்டுகளுக்குப் பதிலளித்துள்ள எச்டிஎப்சி வங்கி, தங்களுக்குத் தெளிவான உள்நாட்டு கண்காணிப்பு மற்றும் ஆய்வு முறைகள் இருப்பதாகக் கூறியுள்ளது. வங்கியின் செய்தித் தொடர்பாளர் கூறுகையில், "எந்தவொரு விஷயத்திலும் இறுதி முடிவை எடுப்பதற்கு முன்பு, முறையான ஆய்வு செயல்முறைகளைப் பின்பற்றுவதே வங்கியின் வழக்கம். விதிமுறைகளுக்கு உட்பட்டே அனைத்து விஷயங்களும் கையாளப்படுகின்றன" என்று தெரிவித்துள்ளார். மேலும், வங்கியின் மீதான தவறான அனுமானங்களையும், சில குறிப்பிட்ட தகவல்களை மட்டும் வைத்துச் சொல்லப்படும் குற்றச்சாட்டுகளையும் வங்கி கடுமையாக மறுத்துள்ளது.
இந்த விவகாரம் முதலீட்டாளர்கள் மத்தியில் கவலையை ஏற்படுத்தியுள்ளது. இதனால், எச்டிஎப்சி வங்கி இந்த விவகாரத்தில் என்ன மாதிரியான கூடுதல் விளக்கங்களை அளிக்கப்போகிறது மற்றும் இந்திய ரிசர்வ் வங்கி போன்ற ஒழுங்குமுறை அமைப்புகள் இது குறித்து என்ன நடவடிக்கை எடுக்கப்போகின்றன என்பதை பங்குச்சந்தை முதலீட்டாளர்கள் உன்னிப்பாகக் கவனித்து வருகின்றனர். தற்போதைக்கு, வங்கி தன் மீதான குற்றச்சாட்டுகளை முழுமையாக நிராகரித்து, தனது செயல்பாடுகள் வெளிப்படையானவை என்ற நிலைப்பாட்டிலேயே உறுதியாக இருக்கிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.