கணவரின் சொந்தத் தங்கையையே 'இரண்டாவது மனைவி' ஆக்கிய மனைவி - நீதிமன்றமே அதிர்ந்து போன விசித்திர வழக்கு!

மத்திய பிரதேச மாநிலத்தில் குடும்ப நீதிமன்றத்தில் விவாகரத்து கோரி தாக்கல் செய்யப்பட்ட ஒரு விசித்திரமான வழக்கு தற்பொழுது அம்மாநில உயர்நீதிமன்றம் வரை சென்று பெரும் பரபரப்பை ஏற்படுத்தியுள்ளது. பொதுவாக கணவன் மற்றும் மனைவிக்கு இடையே ஏற்படும் கருத்து வேறுபாடுகள், வரதட்சணை கொடுமை அல்லது குடும்ப வன்முறை போன்ற காரணங்களால் தான் விவாகரத்து கோரப்படும். ஆனால் இந்த வழக்கில் ஒரு பெண் தனது கணவரிடமிருந்து விவாகரத்து பெறுவதற்காக, தனது கணவரின் சொந்த சகோதரியையே அவருக்கு இரண்டாவது மனைவி என்று நீதிமன்றத்தில் அடையாளப்படுத்தியுள்ளார்.

மத்திய பிரதேச மாநிலம் குவாலியரைச் சேர்ந்த அந்த பெண்ணிற்கு கடந்த 1998-ஆம் ஆண்டு ஒரு தனியார் நிறுவனத்தில் பணியாற்றும் நபருடன் திருமணம் நடந்துள்ளது. திருமணத்திற்கு பிறகு வேலை நிமித்தமாக அந்த நபர் அடிக்கடி வெளியூர் சென்று தங்கியதால் தம்பதியினருக்கு இடையே அவ்வப்போது மோதல்கள் ஏற்பட்டு வந்துள்ளன. இதன் காரணமாக கடந்த 2015-ஆம் ஆண்டு முதல் அந்த பெண் தனது கணவரை பிரிந்து தனியாக வாழத் தொடங்கினார். எப்படியாவது விவாகரத்து பெற்றுவிட வேண்டும் என்பதில் உறுதியாக இருந்த அந்த பெண், கடந்த 2021-ஆம் ஆண்டு குடும்ப நீதிமன்றத்தில் விவாகரத்து கோரி விண்ணப்பித்தார். அப்போது தனது கணவர் தனக்குத் தெரியாமல் இரண்டாவது திருமணம் செய்து கொண்டதாக ஒரு அதிர்ச்சிகரமான புகாரை முன்வைத்தார்.

தனது புகாரை நிரூபிப்பதற்காக அந்த பெண் நீதிமன்றத்தில் ஒரு குடும்ப புகைப்படத்தை ஆதாரமாக சமர்ப்பித்தார். அந்த புகைப்படத்தில் தனது கணவருக்கு அருகில் நின்றுகொண்டிருந்த பெண்ணை அவருடைய இரண்டாவது மனைவி என்று அவர் நீதிமன்றத்தில் தெரிவித்தார். உண்மையில் அந்த புகைப்படத்தில் இருந்தது கணவரின் சொந்த சகோதரி என்பது குறிப்பிடத்தக்கது. ஆனால் அந்த பெண் கொடுத்த தவறான தகவலை உண்மை என்று நம்பிய குடும்ப நீதிமன்றம், கணவர் தரப்பு விளக்கத்தை கேட்காமலேயே அந்த பெண்ணிற்கு ஆதரவாக ஒருதலைப்பட்சமாக விவாகரத்து வழங்கி தீர்ப்பளித்தது.

இந்த விவகாரம் கடந்த ஏப்ரல் மாதம் முதல் வாரத்தில் அந்த நபருக்கு தெரியவந்தபோது அவர் பெரும் அதிர்ச்சி அடைந்தார். நீதிமன்ற ஆவணங்களை சரிபார்த்தபோது, தனது சொந்த தங்கையை தனது இரண்டாவது மனைவி என்று கூறி தனது மனைவி நீதிமன்றத்தை ஏமாற்றியதை அவர் கண்டுபிடித்தார். இதனையடுத்து தவறான ஆதாரங்களை சமர்ப்பித்து விவாகரத்து பெற்ற அந்த பெண்ணின் செயலை எதிர்த்து, பாதிக்கப்பட்ட கணவர் தற்போது மத்திய பிரதேச உயர்நீதிமன்றத்தின் குவாலியர் கிளையில் மேல்முறையீடு செய்துள்ளார்.

இந்த வழக்கினை விசாரித்த அரசு தரப்பு வழக்கறிஞர் தர்மேந்திர சர்மா, தனது மனைவி நீதிமன்றத்தை தவறாக வழிநடத்தி பொய்களை கூறி இந்த விவாகரத்தைப் பெற்றுள்ளதாக அந்த நபர் குற்றம் சாட்டியுள்ளதாகத் தெரிவித்தார். தவறான தகவலின் அடிப்படையில் வழங்கப்பட்ட இந்த விவாகரத்து உத்தரவை ரத்து செய்ய வேண்டும் என்று அந்த நபர் உயர்நீதிமன்றத்தில் கோரிக்கை விடுத்துள்ளார். இந்த வழக்கை ஏற்றுக்கொண்ட உயர்நீதிமன்றம் தற்போது விரிவான விசாரணைக்கு உத்தரவிட்டுள்ளது. சொந்த சகோதரியையே இரண்டாவது மனைவி என்று கூறி விவாகரத்து பெற்ற இந்த சம்பவம் அந்த பகுதியில் பெரும் அதிர்வலைகளை ஏற்படுத்தியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.