பொறியியல் கல்வியில் புகழ்பெற்ற IIT நிறுவனங்கள் மருத்துவத் துறையிலும் தடம் பதிக்கத் தொடங்கியுள்ளன. அந்த வகையில், இந்தியாவின் முன்னணி கல்வி நிறுவனமான IIT காரக்பூர் தற்போது மருத்துவ முதுநிலைப் படிப்புகளை அறிமுகப்படுத்தியுள்ளது. இதன் மூலம் தேசிய மருத்துவ ஆணையத்தின் (NMC) அங்கீகாரம் பெற்ற முதுநிலை மருத்துவப் படிப்புகளை வழங்கும் முதல் IIT என்ற பெருமையை இந்த நிறுவனம் பெறுகிறது. மருத்துவம் மற்றும் பொறியியல் தொழில்நுட்பத்தை இணைத்து புதிய தலைமுறை மருத்துவ நிபுணர்களை உருவாக்குவதே இந்த முயற்சியின் முக்கிய நோக்கமாகும்.
2026–27 கல்வியாண்டு முதல் இந்தப் புதிய படிப்புகளுக்கான மாணவர் சேர்க்கை நடைபெற உள்ளது. மொத்தம் ஆறு மருத்துவப் பிரிவுகளில் 12 இடங்கள் ஒதுக்கப்பட்டுள்ளன. ஒவ்வொரு பிரிவுக்கும் தலா இரண்டு இடங்கள் வழங்கப்பட்டுள்ளன. பொது மருத்துவம் (General Medicine), கதிரியக்கவியல் (Radiology), உடலியல் (Physiology), நோயியல் (Pathology), சமூக மருத்துவம் (Community Medicine), உயிர்வேதியியல் (Biochemistry) ஆகியவை அந்த ஆறு பிரிவுகளாகும். இதன் மூலம் மருத்துவத்தில் மேற்படிப்பு படிக்க விரும்பும் எம்பிபிஎஸ் மருத்துவர்களுக்கு மற்றொரு கல்வி வாய்ப்பு உருவாகியுள்ளது.
இந்தப் படிப்புகளுக்கான மாணவர் சேர்க்கை நீட் முதுநிலைத் தேர்வு (NEET-PG) மதிப்பெண் மற்றும் அதனைத் தொடர்ந்து நடைபெறும் இணையவழி கலந்தாய்வு மூலம் மேற்கொள்ளப்படும். 2026ஆம் ஆண்டுக்கான நீட் முதுநிலை இரண்டாம் சுற்றுக் கலந்தாய்வில் தகுதியுள்ள மாணவர்கள் விண்ணப்பிக்க வேண்டும். கலந்தாய்வுப் பட்டியலில் 'Dr B C Roy Multi-Speciality Medical Research Centre, Kharagpur, under the aegis of IIT Kharagpur' என்ற பெயரில் இந்த நிறுவனம் இடம்பெறும் என அறிவிக்கப்பட்டுள்ளது. எனவே, தமிழகத்தில் எம்பிபிஎஸ் முடித்துவிட்டு முதுநிலை மருத்துவப் படிப்புக்காகக் காத்திருக்கும் மாணவர்களும் இதற்கான தகுதி மற்றும் கலந்தாய்வு விதிமுறைகளைச் சரிபார்த்துக் கொள்ளலாம்.
சிறப்பம்சம் என்னவென்றால், வழக்கமான மருத்துவப் பயிற்சியுடன் நவீன தொழில்நுட்ப ஆராய்ச்சிக்கும் முக்கியத்துவம் அளிக்கப்படுவதுதான். மருத்துவத் துறையில் செயற்கை நுண்ணறிவு (AI) வேகமாக வளர்ந்து வரும் நிலையில், நோய்களைக் கண்டறிதல், மருத்துவப் பரிசோதனை முடிவுகளை ஆய்வு செய்தல், நோயாளிகளுக்கான சிகிச்சை முடிவுகளை எடுப்பதில் மருத்துவர்களுக்கு உதவுதல் போன்ற பணிகளில் தொழில்நுட்பம் முக்கியப் பங்கு வகிக்கிறது. இதைக் கருத்தில் கொண்டு, IIT காரக்பூர் தனது மருத்துவப் படிப்புகளில் தொழில்நுட்ப ஆராய்ச்சியையும் இணைக்கத் திட்டமிட்டுள்ளது.
மாணவர்களுக்கு செயற்கை நுண்ணறிவு உதவியுடன் மருத்துவ முடிவுகளை எடுக்கும் முறைகள், மருத்துவப் படங்களை ஆய்வு செய்யும் தொழில்நுட்பம், கணினி வழி நோயியல் ஆய்வு, நவீன மருத்துவக் கருவிகள், மூலக்கூறு அடிப்படையிலான நோய் கண்டறிதல் மற்றும் தனிநபருக்கு ஏற்ற சிகிச்சை முறைகள் போன்ற ஆராய்ச்சித் துறைகளில் ஈடுபடும் வாய்ப்புகள் கிடைக்கும் என நிறுவனம் தெரிவித்துள்ளது. இதன் மூலம் மருத்துவ அறிவையும் பொறியியல் சிந்தனையையும் ஒருங்கிணைத்துப் பணியாற்றக்கூடிய மருத்துவ நிபுணர்களை உருவாக்க முடியும் என எதிர்பார்க்கப்படுகிறது.
இந்தப் படிப்புகளுக்கான பயிற்சி IIT வளாகத்தில் அமைந்துள்ள டாக்டர் பி.சி. ராய் பல்துறை மருத்துவ ஆராய்ச்சி மையம் மற்றும் ஷியாமா பிரசாத் முகர்ஜி சூப்பர் ஸ்பெஷாலிட்டி மருத்துவமனை ஆகியவற்றை மையமாகக் கொண்டு நடைபெறுகிறது. மருத்துவப் பயிற்சியுடன் ஆராய்ச்சிக்கும் முக்கியத்துவம் அளிக்கும் வகையில் இந்தக் கட்டமைப்பு உருவாக்கப்பட்டுள்ளது. மருத்துவக் கல்வி, செயற்கை நுண்ணறிவு, உயிரி மருத்துவ அறிவியல் மற்றும் பொறியியல் ஆகிய துறைகளை ஒரே சூழலில் இணைப்பதே நிறுவனத்தின் நோக்கமாகும்.
IIT காரக்பூர் இயக்குநர் பேராசிரியர் சுமன் சக்ரவர்த்தி கூறுகையில், சிறந்த மருத்துவர்களை உருவாக்குவது மட்டுமல்லாமல், மருத்துவத் துறையில் புதிய கண்டுபிடிப்புகளை உருவாக்கக்கூடிய ஆராய்ச்சியாளர்களையும் உருவாக்குவதே தங்களது இலக்கு எனத் தெரிவித்துள்ளார். எதிர்கால மருத்துவத் துறையில் மருத்துவ அறிவுடன் தொழில்நுட்பத் திறனும் அவசியமாக இருக்கும் என்றும் அவர் குறிப்பிட்டுள்ளார்.
மொத்தம் 12 இடங்கள் மட்டுமே இருப்பதால் இந்த வாய்ப்பு எண்ணிக்கையில் சிறியதாக இருந்தாலும், இந்திய மருத்துவக் கல்வியில் முக்கியமான மாற்றமாகப் பார்க்கப்படுகிறது. குறிப்பாக நீட் முதுநிலைத் தேர்வில் பங்கேற்கும் தமிழக மருத்துவர்கள், இந்தப் புதிய படிப்புகள் மற்றும் கலந்தாய்வு விவரங்களைக் கவனிப்பது அவசியம். இனி மருத்துவக் கல்வி என்பது நோய்களுக்குச் சிகிச்சை அளிப்பதோடு மட்டும் நின்றுவிடாமல், தொழில்நுட்பத்தின் உதவியுடன் புதிய சிகிச்சை முறைகளையும் உருவாக்கும் திசையில் நகர்கிறது என்பதற்கு இந்த முயற்சி ஒரு முக்கிய உதாரணமாக அமைந்துள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.