கல்லூரியில் படித்து முடித்த பிறகு நல்ல வேலை கிடைக்க வேண்டும் என்பது ஒவ்வொரு மாணவரின் கனவாக இருக்கும். ஆனால், இன்றைய தொழில்நுட்ப வேலைவாய்ப்பு சந்தையில் பட்டப்படிப்பு மட்டும் போதுமானதாக இருக்காது என்ற நிலை உருவாகி வருகிறது. குறிப்பாக செயற்கை நுண்ணறிவு எனப்படும் AI வேகமாக வளர்ந்து வரும் நிலையில், மாணவர்களிடம் கூடுதல் தொழில்நுட்பத் திறன்களை நிறுவனங்கள் எதிர்பார்க்கத் தொடங்கியுள்ளன. அதனால், AI தொடர்பான சான்றிதழ்களும் மாணவர்களின் வேலைவாய்ப்பு பயணத்தில் முக்கிய இடத்தைப் பெற ஆரம்பித்துள்ளன.
ஒரு மாணவர் கணினி அறிவியல், தகவல் தொழில்நுட்பம், மின்னணுவியல் அல்லது வேறு பொறியியல் படிப்பை முடித்திருக்கலாம். ஆனால், அவர் எந்த கூடுதல் திறன்களை கற்றுள்ளார் என்பதை நிறுவனங்கள் தெரிந்துகொள்ள விரும்புகின்றன. “AI பற்றி தெரியும்” என்று ஒரு மாணவர் தனது ரெசியூமில் எழுதுவது மட்டும் போதாது. அதை முறையாக கற்றிருக்கிறார் என்பதற்கு ஒரு அங்கீகரிக்கப்பட்ட சான்றிதழ் இருந்தால், அது அவருடைய திறனை வெளிப்படுத்துவதற்கான கூடுதல் ஆதாரமாக இருக்கும். இதுதான் தற்போது சான்றிதழின் முக்கியத்துவத்தை அதிகரிக்கிறது.
ஒரு சான்றிதழ் என்றால் வெறும் ஒரு காகிதம் அல்லது இணையத்தில் பதிவேற்றக்கூடிய ஒரு பதக்கம் என்று மாணவர்கள் நினைக்கக் கூடாது. ஒரு குறிப்பிட்ட தொழில்நுட்பத்தை முறையாக கற்றிருக்கிறோம் என்பதை வெளிப்படுத்தும் ஆதாரமாக அதை பார்க்க வேண்டும். குறிப்பாக தேர்வு எழுதி, பயிற்சி பெற்று, நடைமுறைப் பணிகளை செய்து பெறப்படும் சான்றிதழ்களுக்கு அதிக மதிப்பு இருக்கலாம். AI துறையில் மட்டும் பார்த்தாலும் பல்வேறு வகையான திறன்கள் உள்ளன. செயற்கை நுண்ணறிவின் அடிப்படைகள், இயந்திரக் கற்றல், உருவாக்கும் AI, தகவல் பகுப்பாய்வு, AI கருவிகளை பயன்படுத்துவது, AI மூலம் மென்பொருள் உருவாக்குவது என பல பிரிவுகள் உள்ளன. எல்லாவற்றையும் ஒரே நேரத்தில் கற்றுக்கொள்ள வேண்டிய அவசியமில்லை. மாணவர் எந்தத் துறையில் வேலை செய்ய விரும்புகிறார் என்பதை முதலில் முடிவு செய்து, அதற்கு தேவையான AI திறனை தேர்வு செய்வது நல்லது.
உதாரணமாக, மென்பொருள் துறையில் வேலை செய்ய விரும்பும் மாணவர் கணினி நிரலாக்கத்துடன் AI கருவிகளை பயன்படுத்த கற்றுக்கொள்ளலாம். மேகக் கணினி (cloud computing) துறையில் செல்ல விரும்புபவர், கிளவுட் சேவைகளுடன் AI தொழில்நுட்பத்தை எவ்வாறு பயன்படுத்துவது என்பதை கற்றுக்கொள்ளலாம். இணைய பாதுகாப்பு துறையில் ஆர்வம் உள்ளவர், AI மூலம் சந்தேகத்திற்கிடமான செயல்பாடுகளை கண்டறிவது மற்றும் பாதுகாப்பு பணிகளை தானியங்கியாக்குவது போன்றவற்றை கற்றுக்கொள்ளலாம். மின்னணுவியல் மற்றும் தொலைத்தொடர்பு மாணவர்களுக்கும் AI மிக முக்கியமானதாக மாறி வருகிறது. தகவல் தொடர்பு வலையமைப்பில் ஏற்படும் பிரச்சினைகளை முன்கூட்டியே கண்டறிதல், வலையமைப்பின் செயல்திறனை கண்காணித்தல், தரவுகளை பகுப்பாய்வு செய்தல், தானியங்கி பராமரிப்பு போன்ற பல பணிகளில் AI பயன்படுத்தப்படுகிறது. எனவே, தங்கள் அடிப்படை பொறியியல் அறிவுடன் AI திறனையும் சேர்த்துக்கொள்ளும் மாணவர்களுக்கு புதிய வேலை வாய்ப்புகளை நோக்கி செல்லும் வாய்ப்பு உருவாகிறது.
ஆனால் இங்கு மாணவர்கள் மிகவும் கவனமாக இருக்க வேண்டிய ஒரு விஷயம் உள்ளது. இணையத்தில் கிடைக்கும் எந்த ஒரு சான்றிதழையும் வாங்கிப் பெற்றுவிட்டால் வேலை கிடைத்துவிடும் என்று நினைக்கக்கூடாது. நிறுவனங்கள் உண்மையான திறனை பார்க்கின்றன. சான்றிதழ் இருந்தாலும், ஒரு நேர்முகத் தேர்வில் “நீங்கள் என்ன கற்றுக்கொண்டீர்கள்?”, “அதை வைத்து என்ன செய்தீர்கள்?”, “ஒரு பிரச்சினையை எப்படி தீர்ப்பீர்கள்?” என்று கேட்கும்போது பதில் சொல்ல முடியாவிட்டால் அந்த சான்றிதழால் மட்டும் பயன் இருக்காது. அதனால் சான்றிதழுடன் நடைமுறைப் பயிற்சியும் அவசியம்.
ஒரு AI பயிற்சியை முடித்த மாணவர், அதில் கற்றதை வைத்து ஒரு சிறிய திட்டத்தை உருவாக்கலாம். உதாரணமாக மாணவர்களின் கேள்விகளுக்கு பதில் சொல்லும் ஒரு உதவி கருவி, ஆவணங்களை சுருக்கிக் கொடுக்கும் கருவி, தரவுகளை பகுப்பாய்வு செய்யும் சிறிய செயலி அல்லது தன்னுடைய பொறியியல் துறைக்கு பயன்படும் AI திட்டம் போன்றவற்றை உருவாக்கலாம். இப்படி ஒரு சான்றிதழுடன் உண்மையான திட்டத்தையும் காட்டும்போது மாணவரின் திறன் இன்னும் தெளிவாக தெரியும். மேலும், எல்லா மாணவர்களும் பல சான்றிதழ்களை சேகரிப்பதற்கு பதிலாக, தங்களுக்கு தேவையான இரண்டு அல்லது மூன்று நல்ல சான்றிதழ்களை தேர்வு செய்து ஆழமாக கற்றுக்கொள்வது நல்லது. “எத்தனை சான்றிதழ்கள் இருக்கின்றன?” என்பதை விட “அதில் நான் உண்மையில் என்ன கற்றுக்கொண்டேன்?” என்பதுதான் முக்கியம்.
இப்போது நிறுவனங்களும் தொழில்நுட்பத்தை வேகமாக மாற்றிக்கொண்டு வருகின்றன. முன்பு ஒரு வேலையை செய்ய ஒரு குறிப்பிட்ட மென்பொருள் தெரிந்திருந்தால் போதுமானதாக இருந்திருக்கலாம். ஆனால் தற்போது அதே வேலையை AI உதவியுடன் வேகமாகவும் திறமையாகவும் செய்யத் தெரிந்தவர்களை நிறுவனங்கள் எதிர்பார்க்கின்றன. இதனால் மாணவர்கள் கல்லூரிப் படிப்புடன் சேர்த்து புதிய தொழில்நுட்பங்களையும் தொடர்ந்து கற்றுக்கொள்ள வேண்டிய சூழல் உருவாகியுள்ளது. எனவே, மாணவர்களுக்கு இப்போது ஒரு முக்கியமான செய்தி இருக்கிறது. பட்டப்படிப்பை நன்றாக முடிக்க வேண்டும். அதோடு தங்கள் துறைக்கு தேவையான AI திறனையும் கற்றுக்கொள்ள வேண்டும். கற்றதை நிரூபிக்க பொருத்தமான சான்றிதழைப் பெற வேண்டும். அதைவிட முக்கியமாக, கற்ற தொழில்நுட்பத்தை பயன்படுத்தி ஒரு நடைமுறைத் திட்டத்தை உருவாக்க வேண்டும். சான்றிதழ் வேலைக்கான நேரடி உத்தரவாதம் அல்ல. ஆனால், சரியான சான்றிதழ் ஒரு மாணவர் கற்றிருக்கும் திறனை நிறுவனத்தின் கவனத்திற்கு கொண்டு செல்லும் ஒரு முக்கியமான கருவியாக இருக்க முடியும். AI வளர்ச்சி வேகமாக இருக்கும் காலத்தில், “படித்திருக்கிறேன்” என்பதைவிட “கற்றிருக்கிறேன், செய்து பார்த்திருக்கிறேன், அதை நிரூபிக்க முடியும்” என்று சொல்லக்கூடிய மாணவர்களாக மாறுவது தான் முக்கியம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்