பாலிவுட் நட்சத்திரம் ரன்வீர் சிங் மற்றும் மேற்கு இந்திய திரைப்பட ஊழியர்கள் கூட்டமைப்பு (FWICE) ஆகியோருக்கு இடையிலான மோதல் இப்போது பெரிய விவாதமாக மாறியிருக்கிறது. டான் 3 படத்தில் இருந்து ரன்வீர் சிங் விலகிய பிறகு, அந்தப் படத்தின் இயக்குனர் ஃபர்ஹான் அக்தர் மற்றும் தயாரிப்பாளர்கள் நிதி இழப்பு மற்றும் ஒப்பந்த மீறல் குறித்து புகார் அளித்தனர். இந்த விவகாரத்தில் ரன்வீர் சிங்கின் தரப்பு விளக்கத்தைக் கேட்க முயன்றதாகச் சங்கம் கூறுகிறது. ஆனால், இந்த விவகாரம் சட்டப்பூர்வமானது என்றும், இதில் தலையிடச் சங்கத்திற்கு அதிகாரம் இல்லை என்றும் ரன்வீர் சிங் மின்னஞ்சல் மூலம் பதிலளித்ததாகச் சங்கத் தலைவர் அசோக் பண்டிட் தெரிவித்துள்ளார். இந்தச் சூழலில் தான், ரன்வீர் சிங்கிற்கு எதிராக 'ஒத்துழையாமை உத்தரவு' (Non-Cooperation Directive) பிறப்பிக்கப்பட்டுள்ளது.
இந்தச் சங்கம் என்பது இந்தித் திரையுலகில் உள்ள 38 தொழிற்சங்கங்களின் கூட்டமைப்பு ஆகும். இதில் தொழில்நுட்ப வல்லுநர்கள், கேமராமேன்கள், லைட் மேன்கள் மற்றும் நடிகர்கள் எனப் பலரும் உறுப்பினர்களாக உள்ளனர். ஒரு நபருக்கு எதிராக இந்தச் சங்கம் ஒத்துழையாமை உத்தரவைப் பிறப்பித்தால், அந்த நபருடன் யாரும் பணியாற்றக்கூடாது என்று அர்த்தம். மேக்கப் கலைஞர் முதல் லைட் மேன் வரை யாரும் வேலை செய்ய மாட்டார்கள் என்பதால், சம்பந்தப்பட்ட நடிகரின் படப்பிடிப்புப் பணிகள் முற்றிலுமாக முடங்கிவிடும். இது ஒரு வகை தொழிற்சங்கப் புறக்கணிப்பு என்றே சொல்லலாம்.
சட்ட ரீதியாகப் பார்த்தால், இது சற்று சிக்கலான விஷயம். ஒரு நடிகருக்கும் தயாரிப்பாளருக்கும் இடையிலான ஒப்பந்தப் பிரச்சினை என்பது சிவில் நீதிமன்றங்கள் அல்லது நடுவர் மன்றம் மூலம் தீர்க்கப்பட வேண்டிய ஒன்று. இதில் தலையிடச் சங்கத்திற்கு முழுமையான அதிகாரம் இல்லை என்பது ரன்வீர் சிங்கின் வாதம். சட்டப்படி பார்த்தால், இந்த வாதத்தில் உண்மை இருக்கிறது. ஆனால், சங்கம் தன்னை ஒரு தொழில்துறை நடுவராகக் கருதி, இதுபோன்ற பிரச்சினைகளைத் தீர்க்க முயல்கிறது. இந்த விவகாரத்தைப் பொறுத்தவரை, ஒப்பந்தத்தை மீறியதற்காக ரன்வீர் சிங்கிற்குத் தண்டனை வழங்குவது சங்கத்தின் அதிகார வரம்பிற்குள் வராது என்பதுதான் சட்ட வல்லுநர்களின் கருத்து.
இதற்குப் பதிலளிக்கும் வகையில் ரன்வீர் சிங்கின் தரப்பு ஒரு அறிக்கையை வெளியிட்டிருந்தது. அதில் அவர் திரையுலகம் மற்றும் டான் படக்குழு மீது மிகுந்த மரியாதை வைத்திருப்பதாகவும், இந்த விஷயத்தில் கண்ணியத்துடனும் முதிர்ச்சியுடனும் நடந்துகொள்ளவே விரும்புவதாகவும் குறிப்பிட்டுள்ளார். எவருடனும் மோத விரும்பவில்லை என்பதையும் அந்த அறிக்கை உறுதிப்படுத்தியது. இருப்பினும், சங்கம் தனது உத்தரவை வாபஸ் வாங்கியதாகத் தெரியவில்லை. ஒருவேளை இந்த விவகாரம் நீடித்தால், ரன்வீர் சிங் சட்டப்பூர்வமாகச் சங்கத்தின் இந்த உத்தரவை எதிர்த்து நீதிமன்றத்தில் வழக்கு தொடர வாய்ப்புள்ளது. தொழிலாளர்களின் சங்கத்தின் இந்த நடவடிக்கை தன் வேலை செய்யும் உரிமையைப் பாதிப்பதாக அவர் வாதிட முடியும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.