தெலுங்குத் திரையுலகின் 'ஸ்டைலிஷ் ஸ்டார்' அல்லு அர்ஜுன் மற்றும் பிளாக்பஸ்டர் இயக்குனர் அட்லீ கூட்டணியில் உருவாகும் புதிய படத்தின் அதிகாரப்பூர்வ அறிவிப்பு வெளியாகியுள்ளது. இதுவரை 'AA22xA6' என்று அழைக்கப்பட்டு வந்த இந்த பிரம்மாண்ட திரைப்படத்திற்கு தற்போது 'ராக்கா' (Raaka) என்று பெயரிடப்பட்டுள்ளது. அல்லு அர்ஜுனின் 44-வது பிறந்தநாளை முன்னிட்டு, இந்தப் படத்தின் மிரட்டலான ஃபர்ஸ்ட் லுக் போஸ்டரை படக்குழு வெளியிட்டுள்ளது. இது ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது.
இந்த ஃபர்ஸ்ட் லுக் போஸ்டரில் அல்லு அர்ஜுன் இதுவரை பார்த்திராத ஒரு பயங்கரமான கெட்டப்பில் காட்சியளிக்கிறார். நீண்ட நகங்கள், கண்களில் அடர்த்தியான மை மற்றும் கம்பளி உடையில் ஒரு 'டெவில்' போன்ற தோற்றத்தில் அவர் மிரட்டுகிறார். ஒரு முதியவர் போன்ற தோற்றத்திற்காக அவருக்கு பிரத்யேகமான மேக்கப் போடப்பட்டுள்ளது. "எல்லைகளுக்கு அப்பாற்பட்ட ஒரு கற்பனைக்கு உங்களைத் தயார்படுத்திக் கொள்ளுங்கள்" என்ற வாசகத்துடன் வெளியாகியுள்ள இந்த போஸ்டர், படம் ஒரு சைன்ஸ் ஃபிக்ஷன் ஆக்ஷன் டிராமாவாக இருக்கும் என்பதை உறுதிப்படுத்துகிறது.
சன் பிக்சர்ஸ் நிறுவனம் தயாரிக்கும் இந்தப் படம், இந்திய அளவில் மிகப்பெரிய பான்-இந்தியா படமாக உருவாகிறது. தமிழ், தெலுங்கு, இந்தி, கன்னடம், மலையாளம் உள்ளிட்ட ஒன்பது மொழிகளில் இந்தப் படத்தின் போஸ்டர் வெளியிடப்பட்டுள்ளது. அல்லு அர்ஜுன் மற்றும் அட்லீ இணையும் முதல் படம் இது என்பதால், படத்தின் பட்ஜெட் மற்றும் மேக்கிங் மீது இந்திய திரையுலகமே ஒரு கண் வைத்துள்ளது. கடந்த ஆண்டே இதற்கான அறிவிப்பு வெளியானாலும், தற்போதுதான் படத்தின் பெயர் மற்றும் அல்லு அர்ஜுனின் லுக் குறித்த ரகசியம் உடைக்கப்பட்டுள்ளது.
இந்தப் படத்தில் அல்லு அர்ஜுன் நான்கு விதமான கதாபாத்திரங்களில் நடிக்கப் போவதாகத் தகவல்கள் வெளியாகியுள்ளன. தாத்தா, அப்பா மற்றும் இரண்டு மகன்கள் என நான்கு வேடங்களில் அவர் அசத்தவுள்ளார். மேலும், இந்தப் படத்தின் கதை Parallel Universes பற்றியதாக இருக்கலாம் என்றும் சினிமா வட்டாரத்தில் கிசுகிசுக்கப்படுகிறது. இருப்பினும், இது குறித்த அதிகாரப்பூர்வ தகவலை படக்குழு இன்னும் உறுதிப்படுத்தவில்லை. இந்தப் படத்தில் பாலிவுட் நடிகை தீபிகா படுகோன் மிக முக்கியமான ஒரு கதாபாத்திரத்தில் நடிக்க ஒப்பந்தமாகியுள்ளார்.
படத்தின் பட்ஜெட் குறித்து வெளியாகியுள்ள தகவல்கள் அனைவரையும் தலைசுற்ற வைக்கின்றன. சுமார் 800 கோடி ரூபாய் செலவில் 'ராக்கா' திரைப்படம் உருவாகிறது. இதில் படத்தின் கிராபிக்ஸ் மற்றும் விஷுவல் எஃபெக்ட்ஸ் (VFX) பணிகளுக்காக மட்டுமே 250 கோடி ரூபாய் ஒதுக்கப்பட்டுள்ளது. தயாரிப்புச் செலவாக 200 கோடி ரூபாய் கணக்கிடப்பட்டுள்ளது. அட்லீ இயக்கத்தில் ஷாருக்கான் நடித்த 'ஜவான்' படம் மிகப்பெரிய வசூல் சாதனை படைத்ததால், இந்தப் படத்தின் மீதும் ஏகப்பட்ட எதிர்பார்ப்பு நிலவுகிறது.
சம்பள விஷயத்திலும் அல்லு அர்ஜுன் புதிய சாதனை படைத்துள்ளார். இந்தப் படத்திற்காக அவருக்கு 175 கோடி ரூபாய் சம்பளம் பேசப்பட்டுள்ளதாகவும், அதுமட்டுமின்றி லாபத்தில் 15 சதவீதம் பங்கு அவருக்குக் கொடுக்கப்பட உள்ளதாகவும் கூறப்படுகிறது. இயக்குனர் அட்லீ இந்தப் படத்திற்காக 100 கோடி ரூபாய் சம்பளம் வாங்குகிறார். இந்திய சினிமாவில் இவ்வளவு பெரிய பட்ஜெட்டில் ஒரு படம் உருவாவது இதுவே முதல்முறை என்பதால், 'ராக்கா' திரைப்படம் பாக்ஸ் ஆபீஸில் பல சாதனைகளை முறியடிக்கும் என எதிர்பார்க்கப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.