காலை எழுந்ததும் சூடாக ஒரு காபி அல்லது டீ குடித்தால்தான் பலருக்குப் பொழுதே விடியும். ஆனால், அந்தப் பழக்கத்தை மாற்றி, வெறும் வயிற்றில் ஒரு டம்ளர் வெதுவெதுப்பான நீர் குடித்துப் பாருங்கள், உங்கள் உடலில் நடக்கும் மாற்றங்களை நீங்களே நம்ப மாட்டீர்கள். இது ஏதோ பாட்டி வைத்தியம் என்று அலட்சியப்படுத்த வேண்டாம்; ஜப்பானியர்கள் நீண்ட காலம் ஆரோக்கியமாக வாழ்வதற்கு இதுவும் ஒரு முக்கியக் காரணம் என்று அறிவியல்பூர்வமாக நிரூபிக்கப்பட்டுள்ளது. நம் உடல் 70% நீரால் ஆனது. இரவு முழுவதும் நாம் தூங்கும்போது உடலில் நீர்ச்சத்து குறைந்திருக்கும். காலையில் எழுந்ததும் வெதுவெதுப்பான நீர் குடிக்கும்போது, அது குடலைச் சுத்தம் செய்வது மட்டுமல்லாமல், உடலின் மெட்டபாலிசத்தை (Metabolism) 25% வரை அதிகரிக்கிறது. இதனால் உடல் எடை குறைவது வெகு வேகமாக நடக்கும்.
பலரும் அவதிப்படும் மலச்சிக்கல் பிரச்சனைக்கு இது ஒரு நிரந்தரத் தீர்வு. காலையில் வெதுவெதுப்பான நீர் குடலுக்குள் செல்லும்போது, அது இறுகிப்போன மலத்தை இளகச் செய்து, உடலில் உள்ள கழிவுகளை எளிதாக வெளியேற்ற உதவுகிறது. வயிறு சுத்தமானாலே பாதி நோய்கள் குணமாகிவிடும். குறிப்பாக, செரிமானக் கோளாறு, நெஞ்செரிச்சல் மற்றும் வாயுத் தொல்லை உள்ளவர்கள், சாப்பிட்ட பிறகு குளிர்ந்த நீர் குடிப்பதற்குப் பதிலாக வெதுவெதுப்பான நீர் குடித்து வந்தால், உணவு எளிதில் செரிமானமாகும். குளிர்ந்த நீர் உணவில் உள்ள எண்ணெய்ப் பசையை உறைய வைத்துவிடும், இது செரிமானத்தைத் தாமதப்படுத்தும். ஆனால் சுடுநீர் அதைத் தடுத்து, உடலில் கொழுப்பு சேராமல் பார்த்துக்கொள்ளும்.
பெண்கள் மாதவிடாய் காலங்களில் ஏற்படும் வலி மற்றும் தசைப்பிடிப்புகளுக்கு வெதுவெதுப்பான நீர் ஒரு இயற்கை வலி நிவாரணி. இது கருப்பைத் தசைகளைத் தளர்த்தி, ரத்த ஓட்டத்தைச் சீராக்குவதால் வலி குறையும். மேலும், இது நரம்பு மண்டலத்தை அமைதிப்படுத்தி, மன அழுத்தத்தைக் குறைக்கவும் உதவுகிறது. முகத்தில் பருக்கள் வருவது, தோல் வறட்சி மற்றும் விரைவில் முதுமைத் தோற்றம் ஏற்படுவது போன்ற பிரச்சனைகளுக்கும் இது ஒரு சிறந்த தீர்வு. வெதுவெதுப்பான நீர் உடலில் உள்ள நச்சுகளை (Toxins) வியர்வை மற்றும் சிறுநீர் மூலம் வெளியேற்றுவதால், சருமம் பொலிவு பெறும். முகத்தில் உள்ள துளைகள் அடைக்கப்படாமல் சுவாசிக்க முடியும்.
தொண்டை வலி, சளி, இருமல் இருப்பவர்களுக்கு இது ஒரு அமிர்தம் போன்றது. சுவாசப் பாதையில் உள்ள சளியைக் கரைத்து வெளியேற்ற இது உதவும். ஆனால் நினைவில் கொள்ளுங்கள், நீர் மிகவும் சூடாக இருக்கக்கூடாது; இதமான சூட்டில் இருக்க வேண்டும். அதிக சூடு குடலைப் பாதிக்கும். தினமும் காலையில் பல் துலக்கியதும், உணவு உண்பதற்கு 30 நிமிடங்களுக்கு முன்பு ஒரு டம்ளர் வெதுவெதுப்பான நீர் அருந்துவதை வழக்கமாக்கிக் கொள்ளுங்கள். இது உங்கள் ரத்த ஓட்டத்தை அதிகரித்து, நாள் முழுவதும் உங்களைச் சுறுசுறுப்பாக வைக்கும். காபி, டீயில் உள்ள காஃபின் உடலுக்குத் தரும் தற்காலிக உற்சாகத்தை விட, வெதுவெதுப்பான நீர் தரும் ஆரோக்கியம் நிரந்தரமானது. முயற்சியை இன்றே தொடங்குங்கள், மாற்றத்தை உணருங்கள்!
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.