விமானப் பயணத்தின் போது நமது உடைமைகள் (Baggage) காணாமல் போவது அல்லது வேறு இடத்திற்கு மாறிச் செல்வது என்பது பயணிகளுக்கு மிகப்பெரிய மன உளைச்சலைத் தரும் விஷயம். இந்தத் துயரத்திற்கு முற்றுப்புள்ளி வைக்கும் வகையில், கூகுள் நிறுவனம் தனது 'Find Hub' செயலியில் ஒரு அதிரடி புதிய வசதியை அறிமுகப்படுத்தியுள்ளது. இதன் மூலம், தொலைந்த உங்களது பேக் எங்கே இருக்கிறது என்கிற நேரடித் தகவலை (Live Location) நீங்களே நேரடியாக விமான நிறுவன அதிகாரிகளுடன் பகிர்ந்து கொள்ள முடியும்.
தற்போது துருக்கி ஏர்லைன்ஸ் (Turkish Airlines) இந்த வசதியை அதிகாரப்பூர்வமாகப் பயன்படுத்தத் தொடங்கியுள்ளது. இது பயணிகளுக்கும், ஏர்போர்ட் ஊழியர்களுக்கும் இடையேயான தகவல் இடைவெளியைக் குறைத்து, மிக விரைவாக உடைமைகளை மீட்க வழிவகை செய்கிறது.
இந்தப் புதிய வசதியை எப்படிப் பயன்படுத்துவது?
விமான நிலையத்தில் உங்களது பேக் வரவில்லை என்பதை உணர்ந்த உடனே, நீங்கள் செய்ய வேண்டியவை மிக எளிமையானவை:
உங்களது பேக்கில் கூகுளின் 'Find Hub' வசதிக்கு இணையான ஒரு சிறிய ட்ராக்கர் (Tracker) சாதனம் இருக்க வேண்டும்.
'Find Hub' செயலியைத் திறந்து, தொலைந்த உங்களது பேக்கைத் தேர்ந்தெடுக்கவும்.
அதில் உள்ள "Share Item Location" என்கிற பட்டனை அழுத்தினால், ஒரு பாதுகாப்பான இணைய முகவரி (URL) உருவாகும்.
அந்த லிங்கை (Link), சம்பந்தப்பட்ட விமான நிறுவனத்தின் 'பேக்கேஜ் க்ளைம்' (Baggage Claim) படிவத்தில் பதிவிட வேண்டும்.
இப்போது அந்த லிங்க் மூலம் விமான நிறுவன ஊழியர்கள் உங்களது பேக் எந்த இடத்தில் இருக்கிறது என்பதைத் துல்லியமாகப் பார்த்து மீட்டுக் கொடுப்பார்கள்.
பாதுகாப்பு மற்றும் ரகசியத்தன்மை
கூகுள் இந்த வசதியைப் பாதுகாப்பான முறையில் வடிவமைத்துள்ளது. நீங்கள் பகிரும் அந்த லொகேஷன் லிங்க் 7 நாட்களில் தானாகவே காலாவதியாகிவிடும். மேலும், உங்களது பேக் உங்களுக்கு அருகில் வந்ததை உங்களது போன் கண்டறிந்ததும், இந்த லொகேஷன் பகிர்வு வசதி தானாகவே நின்றுவிடும். நீங்கள் நினைக்கும் போது எப்போது வேண்டுமானாலும் இந்த லொகேஷன் பகிர்வை ரத்து செய்யவும் முடியும். அனைத்துத் தகவல்களும் குறியாக்க முறையில் (Encrypted) இருப்பதால் மற்றவர்கள் இதனைத் தவறாகப் பயன்படுத்த முடியாது.
எந்தெந்த விமான நிறுவனங்களில் இந்த வசதி உண்டு?
தற்போது சுமார் 10-க்கும் மேற்பட்ட சர்வதேச விமான நிறுவனங்கள் கூகுளுடன் கைகோர்த்துள்ளன. அந்தப் பட்டியலில் உள்ள முக்கிய நிறுவனங்கள்:
ஏர் இந்தியா (Air India)
லுஃப்தான்சா (Lufthansa)
துருக்கி ஏர்லைன்ஸ் (Turkish Airlines)
சுவிஸ் ஏர் (Swiss)
ஆஸ்திரியன் ஏர்லைன்ஸ் (Austrian Airlines)
சவூதியா (Saudia)
ஸ்காண்டிநேவியன் ஏர்லைன்ஸ் (SAS)
விரைவில் குவாண்டாஸ் (Qantas) உள்ளிட்ட பல முன்னணி நிறுவனங்களும் இதில் இணையவுள்ளன.
பயணிகளுக்குக் கிடைக்கும் நன்மைகள்
இதற்கு முன்பு பேக் தொலைந்தால், அது எங்கே இருக்கிறது என்று விமான நிறுவன ஊழியர்கள் மேனுவலாகத் தேடும் வரை பயணிகள் காத்திருக்க வேண்டியிருந்தது. ஆனால், இனி ஊழியர்களுக்கு நீங்களே லொகேஷனைக் காட்டுவதால், தேடுதல் வேட்டை மிக வேகமாக நடக்கும். உலகளவில் பயன்படுத்தப்படும் 'WorldTracer' போன்ற அமைப்புகளுடன் இது இணைக்கப்படுவதால், பேக்குகள் நிரந்தரமாகக் காணாமல் போகும் அபாயம் இனி மிகக் குறைவு. அடிக்கடி பயணம் செய்பவர்களுக்கு இது ஒரு மிகப்பெரிய வரப்பிரசாதமாகும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்