காலை உணவு என்பது ஒரு நாளின் மிக முக்கியமான உணவு. ஆனால், இன்றைய அவசர உலகில் பலரும் காலையில் சமைக்க நேரமில்லாமல் உணவைத் தவிர்த்து விடுகிறார்கள் அல்லது கடையிலுள்ள துரித உணவுகளைச் சாப்பிடுகிறார்கள். இது உடல் நலத்திற்குப் பெரும் கேடு விளைவிக்கும். குறிப்பாகச் சர்க்கரை நோய் மற்றும் ரத்த அழுத்தம் இருப்பவர்கள் காலை உணவைத் தவிர்க்கவே கூடாது. வெறும் 10 நிமிடத்தில் மிக எளிதாக, அதே சமயம் அதிகச் சத்துக்கள் நிறைந்த காலை உணவுகளை எப்படிச் செய்யலாம் என்று இங்கே பார்ப்போம்.
முதலாவதாக, 'சத்து மாவு கஞ்சி'. கிராமப்புறங்களில் இன்றும் இது மிகவும் பிரபலம். கேழ்வரகு, கம்பு, சோளம் போன்ற தானியங்கள் கலந்த சத்து மாவை முன்னதாகவே தயார் செய்து வைத்துக்கொள்ளலாம். காலையில் இரண்டு ஸ்பூன் மாவை எடுத்துத் தண்ணீரில் கரைத்து, அடுப்பில் வைத்துக் கிளறினால் 5 நிமிடத்தில் கஞ்சி தயாராகிவிடும். இதில் சிறிது உப்பு, மோர் மற்றும் சின்ன வெங்காயம் சேர்த்துச் சாப்பிட்டால் உடல் குளிர்ச்சியாகவும், நாள் முழுவதும் தெம்பாகவும் இருக்கும். இனிப்பு வேண்டுபவர்கள் வெல்லம் மற்றும் பால் சேர்த்துக்கொள்ளலாம். இது வளரும் குழந்தைகளுக்கு மிகச்சிறந்த ஊட்டச்சத்து பானமாகும்.
இரண்டாவதாக, 'கோதுமை ரவை கிச்சடி'. சாதாரண ரவையை விடக் கோதுமை ரவையில் நார்ச்சத்து அதிகம். ஒரு குக்கரில் சிறிது எண்ணெய் ஊற்றி கடுகு, உளுந்து, கடலைப்பருப்பு, பச்சை மிளகாய், இஞ்சி மற்றும் நறுக்கிய கேரட், பீன்ஸ் சேர்த்து வதக்கவும். ஒரு பங்கு ரவைக்கு இரண்டரை பங்கு தண்ணீர் ஊற்றி, கொதித்ததும் ரவையைப் போட்டு இரண்டு விசில் விட்டால் போதும். 10 நிமிடத்தில் சுவையான கிச்சடி தயார். இது சர்க்கரை நோயாளிகளுக்கு ஏற்ற ஒரு நிறைவான காலை உணவு. வெள்ளை ரவையில் இருக்கும் மாவுச்சத்தை விட இது உடலுக்கு நல்லது.
மூன்றாவதாக, 'முளைகட்டிய பயறு சாலட்'. அடுப்பையே பயன்படுத்தாமல் செய்யக்கூடிய உணவு இது. முந்தைய நாள் இரவே பச்சைப்பயறு அல்லது கொண்டைக்கடலையை ஊறவைத்து முளைகட்டச் செய்ய வேண்டும். காலையில் அதனுடன் பொடியாக நறுக்கிய வெங்காயம், தக்காளி, வெள்ளரிக்காய், துருவிய கேரட், சிறிது மிளகுத் தூள் மற்றும் எலுமிச்சை சாறு சேர்த்தால் ஒரு சூப்பரான புரோட்டீன் நிறைந்த உணவு தயார். இது உடல் எடையைக் குறைக்க நினைப்பவர்களுக்கும், ஜிம்முக்குச் செல்பவர்களுக்கும் மிகச்சிறந்த உணவாகும்.
நான்காவதாக, 'ஓட்ஸ் அல்லது அவல் உப்புமா'. வெள்ளை அவலை விடச் சிவப்பு அவல் சத்துக்கள் நிறைந்தது. அவலைத் தண்ணீரில் நனைத்து ஒரு 5 நிமிடம் வைத்தாலே மென்மையாகிவிடும். பிறகு ஒரு வாணலியில் தாளித்து அவலைச் சேர்த்தால் உடனடியாகச் சாப்பிடலாம். இது லேசான உணவு என்பதால் செரிமானத்திற்கு மிகவும் நல்லது. இந்த 10 நிமிட உணவுகள் உங்கள் நேரத்தைச் சேமிப்பதோடு, உங்கள் ஆரோக்கியத்தையும் பாதுகாக்கும். காலையில் சமைக்க நேரமில்லை என்ற காரணத்தைச் சொல்லி இனி யாரும் உணவைத் தவிர்க்கத் தேவையில்லை.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.