தென்னிந்திய உணவுகளில் தோசைக்கு எப்போதும் தனி வேல்யூ உண்டு. அதிலும் குறிப்பாக ஹோட்டல்களில் கிடைக்கும் அந்த பொன்னிறமான, மொறுமொறுப்பான தோசையைச் சாப்பிட குழந்தைகள் முதல் பெரியவர்கள் வரை அனைவரும் விரும்புவார்கள். ஆனால், பல வீடுகளில் தோசை ஊற்றும்போது அது மென்மையாக மாறிவிடும் அல்லது கல்லில் ஒட்டிக்கொள்ளும். சிலர் ஊற்றும் தோசைகள் பனியன் துணி போல் இருக்கும். ஹோட்டல் மாஸ்டர்கள் பயன்படுத்தும் அந்த சின்ன சின்ன ரகசியங்களை மட்டும் நாம் தெரிந்துகொண்டால், நம் வீட்டிலும் அதே சுவையில் கிரிஸ்பி தோசையை அசத்தலாகச் செய்ய முடியும். ஒரு தரமான மொறுமொறு தோசைக்கு மாவு அரைக்கும் முறையும், அதில் சேர்க்கப்படும் பொருட்களுமே மிக முக்கியக் காரணியாக இருக்கின்றன.
முதலில் தோசை மாவு அரைக்கும்போது அரிசி மற்றும் உளுந்தின் அளவு சரியாக இருக்க வேண்டும். பொதுவாக நான்கு பங்கு புழுங்கல் அரிசிக்கு ஒரு பங்கு உளுந்து சேர்ப்பது வழக்கம். ஆனால், ஹோட்டல் ஸ்டைலில் தோசை வரவேண்டும் என்றால், அரிசியுடன் ஒரு கைப்பிடி அளவு பச்சரிசியையும் சேர்த்துக்கொள்ளுங்கள். இது தோசைக்கு நல்ல மொறுமொறுப்பைத் தரும். அதோடு, ஒரு ஸ்பூன் வெந்தயத்தை ஊறவைத்து அரைப்பது தோசைக்கு நல்ல வாசனையையும், பொன்னிறத்தையும் கொடுக்கும். உளுந்து அரைக்கும்போது ஐஸ் வாட்டர் சேர்த்து அரைத்தால் மாவு நன்றாகப் பொங்கி வரும், இது தோசையை மிருதுவாகவும் அதே சமயம் கிரிஸ்பியாகவும் மாற்றும்.
மாவோடு சேர்க்கப்படும் ஒரு ரகசியப் பொருள் 'துவரம் பருப்பு' அல்லது 'கடலைப் பருப்பு'. அரிசி ஊறவைக்கும்போதே இரண்டு ஸ்பூன் துவரம் பருப்பு அல்லது கடலைப் பருப்பைச் சேர்த்து ஊறவைத்து அரைத்தால், தோசை நல்ல சிவந்த நிறத்தில் வரும். அதேபோல், மாவு புளித்த பிறகு தோசை ஊற்றுவதற்குச் சற்று முன்பு ஒரு ஸ்பூன் சர்க்கரையைச் சேர்த்து நன்றாகக் கலக்குங்கள். சர்க்கரை சேர்ப்பதால் தோசை இனிப்பாகாது, மாறாகத் தோசை கல்லில் பட்டவுடன் கேரமலைஸ் ஆகி ஹோட்டல் தோசை போன்ற அடர் சிவந்த நிறத்தைத் தரும். இது பலருக்கும் தெரியாத ஒரு முக்கியமான ரகசியம்.
தோசை ஊற்றும் கல்லும் மிக முக்கியமானது. நான்-ஸ்டிக் கல்லை விட இரும்புத் தோசை கல்லைப் பயன்படுத்துவது உடலுக்கும் நல்லது, தோசைக்கும் ருசி தரும். கல் சூடானதும் சிறிது எண்ணெய் தடவி, அதன் மேல் தண்ணீர் தெளித்து ஒரு துணியால் துடைக்க வேண்டும். இது கல்லின் வெப்பத்தைச் சீராக்கி தோசை ஒட்டாமல் வர உதவும். மாவை மெல்லியதாகத் தேய்த்து, சுற்றிலும் எண்ணெய் அல்லது நெய் விட்டு மிதமான தீயில் வேகவிட வேண்டும். அவசரமாக அதிக தீயில் வைத்தால் தோசை கருகிவிடுமே தவிர, மொறுமொறுப்பாக வராது.
மேலும், தோசை மாவு அரைக்கும்போது ஒரு சிறிய கிண்ணம் அளவு பழைய சாதம் அல்லது அவல் சேர்த்து அரைத்தால் தோசை கல்லில் ஒட்டாமல் மல்லிகைப் பூ போல வரும். மாவு ரொம்ப கெட்டியாகவும் இருக்கக் கூடாது, ரொம்பத் தண்ணீராவும் இருக்கக் கூடாது. சரியான பதத்தில் மாவு இருந்தால் மட்டுமே தோசை மெல்லியதாக வரும். இந்த எளிய முறைகளைப் பின்பற்றிப் பாருங்கள், உங்கள் வீட்டுத் தோசையும் இனி ஹோட்டல் தோசையை விடச் சுவையாகவும், மொறுமொறுப்பாகவும் இருக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.