இன்றைய போட்டி மிகுந்த தொழில் உலகில், ஒரு நபரின் தகுதி மற்றும் ஆற்றலை ஒரு நிறுவனத்திற்கு எடுத்துச் சொல்லும் முதல் படிவம், அவருடைய பயோடேட்டா ஆகும். நுணுக்கமான வடிவமைப்பும், வலிமையான உள்ளடக்கமும் கொண்ட சுயவிவரக் குறிப்பு மட்டுமே, மனிதவள அதிகாரியின் (HR) கவனத்தை ஈர்த்து, முதல் நேர்காணலிலேயே வேலையைப் பெறுவதற்கான வாய்ப்பை அதிகரிக்கிறது. ஒரு சராசரி மனிதவள அதிகாரி உங்கள் பயோடேட்டாவை பார்க்கச் செலவிடும் நேரம் சில விநாடிகள் மட்டுமே என்பதால், அதில் கவனிக்க வேண்டிய ரகசியங்களை ஆய்வுகளின் அடிப்படையில் இங்கே பார்க்கலாம்.
வடிவமைப்பில் உள்ள நுணுக்கங்கள்:
ஒரு பயோடேட்டா' குறிப்பு, நீளமாக இருப்பதை விடத் துல்லியமாகவும், தெளிவாகவும் இருக்க வேண்டும். பொதுவாக, ஒரு பக்கத்திற்குள் முடிப்பது சிறந்தது. ஃபான்ட் அளவும், வகையும் எளிதாகப் படிக்கக்கூடிய விதத்தில் இருக்க வேண்டும். முக்கியமாக, நீங்கள் விண்ணப்பிக்கும் பதவிக்கு ஏற்ற வகையில், பயோடேட்டாவை திருத்தி அமைப்பது மிக அவசியம். ஒரே குறிப்பைப் பல நிறுவனங்களுக்கு அனுப்புவது, நிறுவனத்திற்கு உங்கள்மீது இருக்கும் ஆர்வத்தைக் குறைக்கும்.
மிக முக்கியமான ரகசியம்: உங்கள் அனுபவங்களைப் பட்டியலிடுவதற்குப் பதிலாக, நீங்கள் கடந்த காலப் பணிகளில் நிறுவனத்திற்கு ஏற்படுத்திய சாதகமான விளைவுகளின் அடிப்படையில் எழுத வேண்டும். அதாவது, வெறும் கடமைகளைச் சொல்லாமல், எண்கள் மற்றும் அளவீடுகள் மூலம் உங்கள் சாதனைகளை வெளிப்படுத்துவது கூடுதல் மதிப்பை அளிக்கும்.
திறமைகளின் சரியான வெளிப்பாடு:
பொதுவாக, 'திறமைகள்' என்ற பகுதியில் பலர் தாங்கள் அறிந்த மென்பொருள்கள் அல்லது மொழிகளைப் பட்டியலிடுவதுண்டு. ஆனால், மனிதவள அதிகாரிகள் எதிர்பார்ப்பது, நீங்கள் அப்பணியில் வெற்றிபெறத் தேவையான மென்திறன்கள் (Soft Skills) ஆகும். குழுவாகச் செயல்படும் திறன், சிக்கலைத் தீர்க்கும் ஆற்றல், தலைமைப் பண்பு மற்றும் கால மேலாண்மை போன்ற திறன்களுக்கு அதிக முக்கியத்துவம் கொடுக்கப்பட வேண்டும். இவற்றைப் பட்டியலாகக் கொடுப்பதை விட, உங்கள் பழைய பணி அனுபவங்கள் அல்லது திட்டங்கள் மூலம் அந்தத் திறமைகளை எவ்வாறு நிரூபித்தீர்கள் என்பதைக் கதை போலச் சுருக்கமாகச் சொல்வது அதிக தாக்கத்தை ஏற்படுத்தும்.
நேர்காணலுக்கானத் தயார்நிலை:
ஒரு சுயவிவரக் குறிப்பு உங்களுக்கு நேர்காணலை மட்டுமே பெற்றுத் தரும். வேலையைப் பெற நேர்காணலில் வெற்றி பெறுவது அவசியம். நேர்காணலுக்குச் செல்லும் முன், நீங்கள் விண்ணப்பிக்கும் நிறுவனம், அதன் இலக்குகள், சமீபத்திய சாதனைகள் மற்றும் அதன் போட்டியாளர்கள் குறித்துத் தீவிரமாக ஆய்வு செய்ய வேண்டும். இது நேர்காணல் செய்பவரிடம், நீங்கள் வேலைமீது உண்மையிலேயே ஆர்வம் கொண்டிருக்கிறீர்கள் என்பதை உணர்த்தும். மேலும், உங்கள் சுயவிவரக் குறிப்பில் நீங்கள் குறிப்பிட்டுள்ள ஒவ்வொரு தகவலுக்கும், ஆழமான விளக்கத்தை அளிப்பதற்கானத் தயார்நிலையுடன் செல்ல வேண்டும். ஒரு கேள்வியை எதிர்கொள்ளும்போது, வெறும் வாய்மொழி பதில்களைத் தவிர்த்து, உங்கள் கடந்த கால அனுபவங்களை உதாரணமாகச் சொல்லிப் பதிலளிப்பது, உங்களின் கூற்றுகளுக்கு வலிமை சேர்க்கும்.
இறுதியாக, சுயவிவரக் குறிப்பில் பொய்யான தகவல்கள் அல்லது மிகைப்படுத்திய தகவல்களைத் தவிர்ப்பது மிக முக்கியம். நேர்காணலின் போது, சிறிய தவறான தகவல்கூட உங்கள் மீதான நம்பிக்கையை முழுமையாகக் குலைத்துவிடும். துல்லியமான, தெளிவான சுயவிவரக் குறிப்பு மற்றும் தன்னம்பிக்கையான நேர்காணல் அணுகுமுறை ஆகியவை, முதல் வாய்ப்பிலேயே வேலையைப் பெறுவதற்கான வாய்ப்பை அதிகரிக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.