பிரியாணி என்ற சொல்லே பலருக்கு உத்வேகத்தைத் தரும். அதிலும் முஸ்லிம் திருமணங்களில் பரிமாறப்படும் அந்த வாசனை மிகுந்த பிரியாணிக்கு எப்போதுமே தனி மவுசு உண்டு. அந்தச் சுவையை வீட்டிலேயே கொண்டு வருவது பலருக்கும் ஒரு சவாலாக இருக்கும். ஆனால் சில நுணுக்கங்களைப் பின்பற்றினால் நம்மாலும் அந்த அபாரமான ருசியைப் பெற முடியும். பாய் வீட்டு பிரியாணியில் முக்கியமானது அவர்கள் பயன்படுத்தும் பாசுமதி அரிசி அல்லது சீரகச் சம்பா அரிசி. அரிசியை அரை மணி நேரம் ஊறவைப்பது அவசியம். அதேபோல் இறைச்சியை (சிக்கன் அல்லது மட்டன்) இஞ்சி பூண்டு விழுது மற்றும் தயிர் சேர்த்து ஊறவைத்தால் அது மிகவும் மென்மையாக வேகும்.
பிரியாணி செய்ய ஒரு பெரிய பாத்திரத்தை அடுப்பில் வைத்து நெய் மற்றும் எண்ணெய் சரிபாதியாக ஊற்ற வேண்டும். எண்ணெய் காய்ந்ததும் பட்டை, கிராம்பு, ஏலக்காய் ஆகியவற்றைச் சேர்க்க வேண்டும். இதனுடன் நீளமாக நறுக்கிய வெங்காயத்தைச் சேர்த்து நன்கு வதக்க வேண்டும். வெங்காயம் பொன்னிறமாக மாறுவது தான் பிரியாணியின் நிறத்தைத் தீர்மானிக்கும். பின்னர் பச்சை மிளகாய், புதினா மற்றும் மல்லித்தழை சேர்த்து வதக்க வேண்டும். புதினா இலைகள் பிரியாணிக்கு அந்தத் தனித்துவமான நறுமணத்தைத் தரும். இஞ்சி பூண்டு விழுது சேர்த்து அதன் மணம் வந்ததும் தக்காளியைச் சேர்த்து வதக்க வேண்டும். தக்காளி மசிய வதங்கியதும் மிளகாய்த் தூள் மற்றும் தயிர் சேர்த்து நன்கு கிளற வேண்டும்.
இப்போது ஊறவைத்துள்ள இறைச்சியைச் சேர்த்து மசாலாவோடு நன்கு வேக விட வேண்டும். இறைச்சி அரைப்பதம் வெந்ததும், தேவையான அளவு தண்ணீர் ஊற்ற வேண்டும் (ஒரு பங்கு அரிசிக்கு ஒன்றரை பங்கு தண்ணீர் என்பது சரியான அளவு). தண்ணீர் நன்கு கொதிக்கும் போது ஊறவைத்த அரிசியைப் போட்டு, எலுமிச்சை சாறு மற்றும் உப்பு சேர்க்க வேண்டும். தண்ணீர் சுண்டி அரிசி மேலாக வரும்போது, பாத்திரத்தை ஒரு தட்டு போட்டு மூடி அதன் மேல் ஒரு கனமான பொருளை வைத்து 'தம்' (Dum) போட வேண்டும். 20 நிமிடங்கள் குறைந்த தீயில் வைத்திருந்து பின்னர் அடுப்பை அணைத்துவிட வேண்டும். பிரியாணியை மெதுவாகக் கிளறிப் பார்த்தால் மணம் வீசும் பாய் வீட்டு பிரியாணி தயாராக இருக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.