கோழிக்கறியை இப்படி சமைச்சு பாருங்க வயிறு வலியே வராது...

கோழி இறைச்சி வெறும் சுவைக்காக மட்டும் சாப்பிடப்படுவதில்லை. அதில் ஏராளமான ஊட்டச்சத்துகள் நிறைந்துள்ளன.

கோழிக்கறியில் புரதம், பாஸ்பரஸ், நியாசின், இரும்புச்சத்து, செலினியம் போன்ற உடலுக்கு தேவையான ஊட்டச்சத்துகள் உள்ளன.

நம் உடலில் உள்ள தசைகள் மற்றும் திசுக்களை உருவாக்கவும், அவற்றை சீரமைக்கவும் புரதச்சத்து அதிக அளவில் தேவைப்படுகிறது.

நம் எலும்புகள் மற்றும் பற்கள் வலுவாக வைத்திருக்க பாஸ்பரஸ் தேவைக்கப்படுகிறது.

உடலில் உள்ள நரம்பு மண்டலம் சீரான நிலையில் இயங்க நியாசின் என்ற ஊட்டச்சத்து தேவைப்படுகிறது.

ரத்த சோகையைத் தடுத்து நம்மை சுறுசுறுப்பாக இயங்க வைக்க இரும்புச்சத்து அவசியம்.

இப்படி உடலுக்கு தேவையான ஊட்டச்சத்துகள் கோழி இறைச்சியில் நிறைந்துள்ளன.

இத்தனை சத்துகள் இருந்தாலும், அசைவம் உண்ணும் சிலரே கோழிக்கறியை தவிர்த்து வருகின்றனர்.

இதற்கு அவர்கள் கூறும் காரணம், கோழிக்கறி சூடு; வயிறு வலிக்கும் என்பதுதான்.

உண்மைதான்... ஏற்கனவே சூட்டு உடம்புக்காரர்களுக்கு, கோழிக்கறி சாப்பிட்டால், உடனடியாக வயிற்று வலி ஏற்படுவது உண்டு.

ஆனால் அதற்காக, இத்தனை சத்துகள் நிறைந்த கோழிக்கறியை தவிர்க்கத்தான் வேண்டுமா...?

தேவையில்லை. கோழிக்கறியில் உள்ள சூட்டை, உணவுப் பொருட்கள் மூலமே சரிசெய்துவிட முடியும்.

பொதுவாகவே நம் முன்னோர்கள் வகுத்து வைத்த உணவு முறைகளை கவனித்தால் இது நன்றாகவே தெரியவரும்.

அசைவ உணவு வகைகளை தயார் செய்ய சின்ன வெங்காயம், புதினா, கொத்தமல்லி, எலுமிச்சை பழச்சாறு போன்றவற்றையும் சேர்த்து சமைப்பார்கள்.

இதனால் சிக்கனில் உள்ள சூட்டு தன்மை குறைந்து, வயிற்று வலி தவிர்க்கப்படும்.

அந்த வகையில் தயாரானதுதான் இந்த புதினா சிக்கன்...

கண்ணை பறிக்கும் பச்சை நிறத்துடன் காணப்படும் இந்த சிக்கன், பார்ப்பதற்கு மட்டுமல்ல, சாப்பிடவும் மிகவும் ருசியாக இருக்கும்.

புதினா சிக்கன் செய்ய தேவையான பொருட்கள்

1. கோழிக்கறி - அரைக்கிலோ

2. புதினா - ஒரு கட்டு

3. கொத்தமல்லி - ஒரு கட்டு

4. இஞ்சி - சிறிய துண்டு

5. பூண்டு - 10 பல்

6. தயிர் - அரை கப்

7. உப்பு - தேவையான அளவு

செய்முறை

கோழிக்கறியை நன்கு சுத்தம் செய்து, எடுத்து வைக்கவும்.

ஒரு கடாயில், சிறிதளவு எண்ணெய் ஊற்றி அதில் புதினா, கொத்தமல்லி, பச்சை மிளகாய், தோல் சீவிய இஞ்சி, பூண்டு கருவேப்பிலை அனைத்தையும் சேர்த்து, பச்சை வாசனை போகும் வரை நன்கு வதக்க வேண்டும்.

பின்னர் வதக்கிய பொருளை ஒரு தட்டில் கொட்டி ஆற வைத்து, பின் மிக்ஸியில் விழுதாக அரைக்க வேண்டும்.

இவ்வாறு அரைத்து எடுத்த விழுதை, சுத்தம் செய்து வைத்துள்ள கோழிக்கறியில் கலந்து அதனுடன் தேவையான அளவு உப்பு மற்றும் தயிர் சேர்த்து அரை மணி நேரம் ஊற வைக்க வேண்டும்.

பின்னர் கடாயில் எண்ணெய் ஊற்றி, கலந்து வைத்துள்ள கோழிக்கறி கலவையை சேர்ந்து, தண்ணீர் விடாமல், அடுப்பை சிம்மில் வைத்து கிளற வேண்டும்.

இந்த கலவையில் இருந்து வரும் தண்ணீரிலேயே கோழிக்கறி நன்கு வெந்து வரும் வரை மூடி போட்டு சிம்மில் வைத்து வேக விட வேண்டும்.

அவ்வப்போது திறந்து கிளறி விட வேண்டும். இல்லையென்றால் அடிபிடித்துவிடும். கறி, புதினா கலவையுடன் சேர்ந்து நன்கு வெந்து வந்ததும், இறக்கி பறிமாறினால், புதினா மசாலாவுடன் கோழிக்கறி சாப்பிட சுவையாக இருக்கும். அதேநேரம், புதினா, கொத்தமல்லி, தயிர் உள்ளிட்டவை சேர்ந்திருப்பதால், சிக்கனின் சூட்டை தணிக்கும். இதனால் சிக்கன் சாப்பிட்டால் வயிறு வலிக்கும் என்ற பயம் இல்லாமல் சாப்பிடலாம்.

எனவே சிக்கன் வாங்கினால் இப்படி ஒருமுறை செய்து பாருங்கள். இந்த புதினா சிக்கன் சுவை அசத்தலாக இருக்கும்.

V.ஷீபா ஜெனட்

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.