ஒவ்வொரு மாதமும் வரும் மின்சாரக் கட்டணத்தைச் சமாளிப்பது ஏழை மற்றும் நடுத்தரக் குடும்பங்களுக்கு கூடுதல் சுமையாகவே இருந்து வருகிறது. உணவு, மருத்துவம், குழந்தைகளின் கல்வி என பல்வேறு செலவுகளுக்கு இடையே மின்சாரக் கட்டணத்திற்கும் பணம் ஒதுக்க வேண்டிய கட்டாயம் உள்ளது. ஆனால், ஒரு கிராமத்தில் வசிக்கும் குடும்பங்கள் இந்தப் பிரச்சினைக்கு வித்தியாசமான தீர்வைக் கண்டுள்ளன. தங்களது வீட்டின் கூரையிலேயே சூரிய மின்சாரப் பலகைகளைப் பொருத்தி, தேவையான மின்சாரத்தைத் தாங்களே உற்பத்தி செய்யும் நிலையை உருவாக்கியுள்ளனர். இதன் மூலம் மின்சாரச் செலவைக் குறைப்பதுடன், சுற்றுச்சூழலுக்கும் நன்மை அளிக்கும் புதிய முயற்சியைச் செயல்படுத்தியுள்ளனர்.
சத்தீஸ்கர் மாநிலத்தின் ராஜ்நந்த்கான் மாவட்டத்தில் அமைந்துள்ள கைரா என்ற கிராமம்தான் தற்போது இந்தச் சாதனையைப் படைத்துள்ளது. சுமார் 889 பேர் வசிக்கும் இந்தக் கிராமத்தில் மொத்தம் 141 குடும்பங்கள் உள்ளன. இந்த 141 வீடுகளிலும் சூரிய மின்சாரப் பலகைகள் பொருத்தப்பட்டுள்ளன. ஒவ்வொரு வீட்டிலும் 2 கிலோவாட் திறன் கொண்ட சோலார் மின்சார அமைப்பு நிறுவப்பட்டுள்ளது. இதன் மூலம் ஒட்டுமொத்த கிராமத்தின் சூரிய மின்சார உற்பத்தித் திறன் சுமார் 282 கிலோவாட்டாக உயர்ந்துள்ளது. பிரதமர் சூரிய வீடு இலவச மின்சாரத் திட்டத்தின் கீழ் அனைத்து வீடுகளுக்கும் சோலார் வசதி கிடைத்துள்ள முதல் கிராமம் என்ற பெருமையையும் கைரா பெற்றுள்ளது.
இந்தத் திட்டத்தின் மிக முக்கியமான சிறப்பு என்னவென்றால், சோலார் அமைப்புகளைப் பொருத்துவதற்காக எந்தக் குடும்பமும் தங்களது சொந்தப் பணத்தைச் செலவிடவில்லை. பொதுவாக, வீட்டில் சோலார் மின்சாரப் பலகைகளை நிறுவுவதற்கு கணிசமான தொகை தேவைப்படும். இதனால் பொருளாதார வசதி குறைந்த குடும்பங்கள் இத்தகைய திட்டங்களில் பங்கேற்கத் தயங்குவார்கள். ஆனால், கைரா கிராமத்தில் அந்தப் பிரச்சினைக்கு மாற்று ஏற்பாடு செய்யப்பட்டுள்ளது. மத்திய மற்றும் மாநில அரசுகளின் மானியங்கள் மூலம் திட்டத்தின் பெரும்பகுதி செலவு ஈடுசெய்யப்பட்டது. மீதமிருந்த தொகையை நிறுவனங்களின் சமூகப் பொறுப்பு நிதி எனப்படும் சிஎஸ்ஆர் (CSR) நிதி மூலம் ஏற்பாடு செய்துள்ளனர். இதனால் கிராம மக்கள் எவ்வித ஆரம்ப முதலீடும் இல்லாமல் சோலார் மின்சார வசதியைப் பெற்றுள்ளனர்
இந்தத் திட்டத்தின் பலன் சமூகத்தின் அனைத்து தரப்பு மக்களுக்கும் கிடைத்துள்ளது. 141 வீடுகளில் 93 வீடுகள் பிரதமர் ஆவாஸ் யோஜனா கிராமப்புற வீட்டுவசதித் திட்டத்தின் கீழ் கட்டப்பட்டவை. அதாவது, அரசு வீடு வழங்கும் திட்டத்தின் மூலம் பயன்பெற்ற குடும்பங்களுக்கும் சூரிய மின்சார வசதி கிடைத்துள்ளது. மேலும், கிராமத்தில் வசிக்கும் 21 பழங்குடியின குடும்பங்கள் மற்றும் நான்கு பட்டியலினக் குடும்பங்களும் இந்தத் திட்டத்தின் மூலம் பயனடைந்துள்ளன. இதனால் பொருளாதாரத்தில் பின்தங்கிய மக்களுக்கும் நவீன மின்சாரத் தொழில்நுட்பம் சென்றடைந்துள்ளது.
சோலார் மின்சார அமைப்பு எவ்வாறு செயல்படுகிறது என்பதும் கவனிக்க வேண்டிய விஷயமாகும். பகல் நேரங்களில் சூரிய ஒளியின் உதவியுடன் வீட்டின் கூரையில் உள்ள பலகைகள் மின்சாரத்தை உற்பத்தி செய்கின்றன. அந்த மின்சாரத்தை குடும்பத்தினர் தங்களது அன்றாடத் தேவைகளுக்குப் பயன்படுத்திக்கொள்ளலாம். பயன்படுத்தியது போக மீதமுள்ள மின்சாரத்தை மின் பகிர்மானக் கட்டமைப்புக்கு அனுப்பும் வசதியும் உள்ளது. இதற்கு நெட் மீட்டரிங் (Net Metering) முறை பயன்படுத்தப்படுகிறது. இதன் மூலம் வீட்டில் உற்பத்தி செய்யப்பட்ட மின்சாரத்திற்கும் பயன்படுத்தப்பட்ட மின்சாரத்திற்கும் இடையிலான அளவு கணக்கிடப்படுகிறது. இதனால் வழக்கமான மின்சார விநியோகத்தைச் சார்ந்திருக்கும் தேவை குறைவதுடன், மின்சாரக் கட்டணத்தையும் கணிசமாகக் குறைக்க முடியும். பயன்பாடு மற்றும் உற்பத்தியைப் பொறுத்து சில குடும்பங்களுக்கு மின்சாரக் கட்டணம் பூஜ்ஜியமாகவும் அமைய வாய்ப்புள்ளது.
இந்த மாற்றத்தை ஏற்படுத்துவதில் கிராமத்தைச் சேர்ந்த பெண்களின் பங்களிப்பு மிகவும் முக்கியமானதாக இருந்துள்ளது. பிரதமர் சூரிய சகி என்ற பெயரில் செயல்பட்ட உள்ளூர் பெண்கள் குழுவினர் வீடு வீடாகச் சென்று திட்டத்தின் நன்மைகளை மக்களிடம் எடுத்துரைத்துள்ளனர். சோலார் பலகைகளைப் பொருத்துவதற்கான நடைமுறைகள், செலவுகள், பராமரிப்பு மற்றும் அரசின் மானியங்கள் குறித்து மக்களுக்கு விளக்கியுள்ளனர். ஆரம்பத்தில் சில குடும்பங்கள் சோலார் அமைப்புகளைப் பயன்படுத்துவதில் தயக்கம் காட்டியதாகவும், தொடர்ந்து விழிப்புணர்வு ஏற்படுத்தியதன் மூலம் அவர்களைத் திட்டத்தில் இணைக்க முடிந்ததாகவும் தெரிவிக்கப்பட்டுள்ளது. சுயஉதவிக் குழுக்களும் இந்த முயற்சியில் முக்கியப் பங்காற்றியுள்ளன.
கிராமத்தில் வசிக்கும் விதவைப் பெண்ணான ஷோகில் கோண்ட், ஓய்வூதியத்தை மட்டுமே நம்பி வாழ்ந்து வருகிறார். இனி மின்சாரக் கட்டணம் குறித்த கவலை இல்லாமல் இருக்க முடியும் என்று அவர் மகிழ்ச்சி தெரிவித்துள்ளார். அதேபோல், குறைந்த வருமானத்தில் குடும்பத்தை நடத்தும் கார்த்திக் யாதவ் உள்ளிட்ட பயனாளிகளுக்கும் இந்தத் திட்டம் நிம்மதியை அளித்துள்ளது. மாதந்தோறும் சிறிய தொகையைச் சேமிப்பதுகூட குடும்பத்தின் மற்ற தேவைகளுக்குப் பயன்படும் என்பதால், இந்தத் திட்டம் அவர்களுக்கு முக்கியமானதாக அமைந்துள்ளது.
இந்த முயற்சி குறித்து ராஜ்நந்த்கான் மாவட்ட ஆட்சியர் ஜிதேந்திர யாதவ் கூறுகையில், கிராம மக்கள் தற்போது மின்சாரத்தைப் பயன்படுத்துபவர்களாக மட்டுமின்றி, உற்பத்தி செய்பவர்களாகவும் மாறியுள்ளதாகக் குறிப்பிட்டுள்ளார். அரசுத் திட்டங்கள், உள்ளூர் மக்களின் ஒத்துழைப்பு, வங்கிகள் மற்றும் நிறுவனங்களின் நிதியுதவி ஆகியவை ஒருங்கிணைந்தால் கிராமப்புறங்களிலும் பெரிய மாற்றங்களை ஏற்படுத்த முடியும் என்பதற்கு கைரா கிராமம் சிறந்த எடுத்துக்காட்டாக இருப்பதாக அவர் தெரிவித்துள்ளார்.
சூரிய மின்சாரத்தை அதிக அளவில் பயன்படுத்துவதன் மூலம் நிலக்கரி போன்ற மரபுவழி எரிபொருட்களைச் சார்ந்திருக்கும் தேவையைக் குறைக்க முடியும். இதனால் சுற்றுச்சூழல் மாசுபாட்டைக் கட்டுப்படுத்தவும் உதவுகிறது. அதேநேரத்தில், மின்சாரச் செலவைக் குறைப்பதால் குடும்பங்களின் பொருளாதார நிலையும் மேம்பட வாய்ப்புள்ளது. இருப்பினும், சோலார் பலகைகளின் முறையான பராமரிப்பு, மின்சார உற்பத்தி மற்றும் பயன்பாட்டைக் கண்காணித்தல் ஆகியவை தொடர்ந்து கவனிக்கப்பட வேண்டியவை.
ஒரு சிறிய கிராமத்தில் தொடங்கிய இந்த முயற்சி, இந்தியாவின் மற்ற கிராமங்களுக்கும் ஒரு புதிய வழியைக் காட்டியுள்ளது. சூரிய ஒளியைப் பயன்படுத்தி மின்சாரத் தேவையைப் பூர்த்தி செய்ய முடியும் என்பதை கைரா மக்கள் நடைமுறையில் நிரூபித்துள்ளனர். இதேபோன்ற திட்டங்கள் நாடு முழுவதும் விரிவுபடுத்தப்பட்டால், கிராமப்புறக் குடும்பங்களின் மின்சாரச் செலவைக் குறைப்பதுடன், இந்தியாவின் தூய்மையான எரிசக்தி இலக்குக்கும் பெரும் உதவியாக இருக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.