இன்றைய நவீன உலகில் நாம் அனைவரும் ஒரு இயந்திரத்தனமான வாழ்க்கையைத்தான் வாழ்ந்து கொண்டிருக்கிறோம். எதை நோக்கி ஓடுகிறோம் என்று தெரியாமலே, அவசர கதியில் பயணிக்கும் நமக்கு, உண்மையான நிம்மதி மற்றும் மகிழ்ச்சி எங்கே இருக்கிறது என்பதை உணரக் கூட நேரமில்லை. நாம் தேடும் மகிழ்ச்சி வேறு எங்கேயோ இல்லை, அது இந்தத் தருணத்தில் நம்மிடமே உள்ளது என்பதை உணர்த்துகிறது ஜப்பானிய ஜென் தத்துவம். ஜப்பானிய ஜென் துறவி ஷன்மையோ மசூனோ எழுதிய "ஜென்: தி ஆர்ட் ஆஃப் சிம்பிள் லிவிங்" (Zen: The Art of Simple Living) என்ற புத்தகத்தில், மகிழ்ச்சியான வாழ்விற்கான எளிய வழிமுறைகள் விளக்கப்பட்டுள்ளன. அதில் குறிப்பிடப்பட்டுள்ள பத்து முக்கியமான பழக்கங்களை கடைபிடித்தாலே, எப்பேர்ப்பட்ட மன அழுத்தத்தில் இருப்பவர்களுக்கும் நிச்சயம் நிம்மதி கிடைக்கும் என்று கூறப்படுகிறது.
முதலாவதாக, நமக்குள் இருக்கும் உண்மையான சுயத்தை நாம் கண்டறிய வேண்டும். சமூகத்தில் நமக்கென பல அடையாளங்கள், முத்திரைகள் குத்தப்பட்டிருக்கலாம். "நான் திறமையானவன்", "நான் சோம்பேறி" என நாமே நம்மை ஒரு எல்லைக்குள் சுருக்கி வைத்திருக்கிறோம். ஆனால், உண்மையில் நமது ஆன்மா எல்லையற்றது. தியானம் மற்றும் சுய விழிப்புணர்வு மூலம் அந்த எல்லையற்ற சுயத்தை கண்டறிவதே வாழ்வின் நோக்கமாக இருக்க வேண்டும். இரண்டாவதாக, நடக்காத விஷயங்களை நினைத்து கவலைப்படுவதை நிறுத்த வேண்டும். ஜென் மதத்தை தோற்றுவித்த போதிதர்மரிடம் அவரது சீடர் ஒருவர் தனது மன பதட்டம் குறித்து கேட்டபோது, "உன் பதட்டத்தை என் முன் கொண்டு வா, நான் தீர்வு சொல்கிறேன்" என்றார். அப்போதுதான் அந்த சீடருக்கு புரிந்தது, பதட்டம் என்பது உண்மையில் இல்லை, அது நம் மனமே உருவாக்கும் ஒரு மாயை என்று. எனவே, கற்பனையான பயங்களை நினைத்து வருந்துவதை தவிர்ப்பது மன அமைதிக்கு வழிவகுக்கும்.
அடுத்ததாக, நாம் செய்யும் வேலையில் மகிழ்ச்சியைத் தேட வேண்டும். வேலை சிறிதோ பெரிதோ, அதில் முழு ஈடுபாட்டுடன் செயல்பட வேண்டும். இன்றைய வேலையை மகிழ்ச்சியுடன் செய்தால், அதுவே நாளை பெரிய வாய்ப்புகளை உருவாக்கிக்கொடுக்கும். அதேபோல், நமக்கு முன்னால் இருக்கும் வேலைகளைக் கண்டு மலைக்காமல், அவற்றை நம்மை வளர்த்துக்கொள்ளும் வாய்ப்புகளாக கருத வேண்டும். ஒவ்வொரு பணியையும் ஒரு ஆத்மார்த்தமான பயிற்சியாக நினைத்து செய்தால், வேலைப்பளு தெரியாது. மேலும், செய்யும் வேலைக்கு முழு பொறுப்பேற்க வேண்டும். ஒரே வேலையைச் செய்யும் இருவரில், யார் அதை ஒரு வாய்ப்பாகக் கருதி முழு மனதுடன் செய்கிறாரோ, அவரே சிறந்த முடிவுகளைத் தருவார். ஜென் மடாலயங்களில் தோட்டத்தை சுத்தம் செய்வது கூட ஒரு பயிற்சியாகவே பார்க்கப்படுகிறது.
எந்நேரமும் எதையாவது சிந்தித்துக்கொண்டே இருப்பதை நிறுத்துவது ஆறாவது பழக்கமாகும். அவ்வப்போது வானத்தைப் பார்ப்பது, இயற்கையை ரசிப்பது என சிந்தனையற்ற தருணங்களை உருவாக்கிக்கொள்ள வேண்டும். இது மனதிற்கு ஒரு இடைவேளையைக் கொடுக்கும். ஏழாவதாக, மூளையால் சிந்திப்பதை விட, ஐம்புலன்களால் உணரத் தொடங்க வேண்டும். மீனவர்கள் எப்படி இயற்கையின் அறிகுறிகளை வைத்து கடலுக்கு செல்கிறார்களோ, அதுபோல நாமும் தொடு உணர்வு, நுகரும் திறன் போன்ற புலன்களுக்கு வேலை கொடுக்க வேண்டும். ஒரு கல்லைத் தொட்டு அதன் தன்மையை உணர்வது, அதன் வாசனையை அறிவது போன்ற எளிய பயிற்சிகள் நமது விழிப்புணர்வை அதிகரிக்கும்.
எட்டாவது விஷயம், ஆழமான உறவுகளை வளர்த்துக்கொள்வதாகும். 'இச்சிகோ இச்சியே' (Ichigo Ichie) என்ற ஜப்பானிய தத்துவத்தின்படி, நாம் ஒருவரைச் சந்திக்கும் தருணம் வாழ்நாளில் ஒருமுறை மட்டுமே நிகழக்கூடியது. அடுத்த முறை அதே நபரைச் சந்தித்தாலும், இருவரும் மாறியிருப்போம். எனவே, எண்ணிக்கையை விட உறவுகளின் தரத்திற்கு முக்கியத்துவம் கொடுத்து, ஆழமான பிணைப்பை ஏற்படுத்திக்கொள்ள வேண்டும். ஒன்பதாவதாக, குடும்பத்துடன் தரமான நேரத்தை செலவிட வேண்டும். வெளிஉலகில் நாம் எப்படி இருந்தாலும், குடும்பத்தினர் முன்புதான் நாம் நாமாக இருக்கிறோம். எனவே, வாரத்திற்கு ஒருமுறையாவது டிவி, செல்போன் இல்லாமல் குடும்பத்துடன் மனம் விட்டுப் பேசுவது நம்மை புத்துணர்ச்சியடையச் செய்யும். இறுதியாக, ஒவ்வொரு நாளையும் ஒரு நல்ல நாளாகக் கருத வேண்டும். நடக்கும் சம்பவங்களை நம்மால் கட்டுப்படுத்த முடியாவிட்டாலும், அதற்கு நாம் எப்படி எதிர்வினையாற்றுகிறோம் என்பது நம் கையில்தான் உள்ளது. இந்த மனப்பான்மையை வளர்த்துக்கொண்டால், ஒவ்வொரு நாளுமே பொக்கிஷம்தான்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்