உடல் எடையை குறைக்க வேண்டும் என்றால் கடுமையான டயட், பட்டினி, விலை உயர்ந்த சப்பிள்மெண்ட்ஸ் அல்லது மணிக்கணக்கான ஜிம் பயிற்சிகள் அவசியம் என்று பலர் நினைக்கிறார்கள். ஆனால் இந்தியாவைச் சேர்ந்த உடற்பயிற்சி பயிற்சியாளர் ஷிகா சுரானா (Shikha Surana) தனது வாழ்க்கை அனுபவத்தின் மூலம் இந்த நம்பிக்கையை முற்றிலும் மாற்றியுள்ளார். 72 கிலோ எடையிலிருந்து 49 கிலோவாக குறைந்து 23 கிலோ எடையை வெற்றிகரமாக இழந்த அவர், தனது வெற்றியின் ரகசியம் என்னவென்றால் “நான் புதிய விஷயங்களை செய்யவில்லை; தவறான பழக்கங்களை நிறுத்தினேன்” என்பதுதான்.
சமீபத்தில் சமூக வலைதளத்தில் தனது எடை குறைப்பு பயணத்தை பகிர்ந்த ஷிகா சுரானா, “Crash Diet இல்லை, Detox Tea இல்லை, பட்டினி கிடக்கவில்லை. தவறான பழக்கங்களை மட்டும் நிறுத்தினேன்” என்று கூறியுள்ளார். இந்த பதிவு ஆயிரக்கணக்கான மக்களின் கவனத்தை ஈர்த்துள்ளது. ஏனெனில் அவரது பயணம் உடல் எடையை குறைக்க விரும்பும் சாதாரண மக்களுக்கும் எளிதாக பின்பற்றக்கூடியதாக உள்ளது.
அவரது பயணத்தின் முதல் முக்கிய மாற்றம் காலை உணவை தவிர்க்கும் பழக்கத்தை கைவிட்டது. பலர் உடல் எடை குறைக்க வேண்டும் என்ற எண்ணத்தில் காலை உணவை தவிர்க்கிறார்கள். ஆனால் இது எதிர்மறையான விளைவுகளை ஏற்படுத்தும் என்று ஷிகா கூறுகிறார். தானும் முன்பு காலை உணவை தவிர்த்து வந்ததால், இரவு நேரங்களில் அதிகமாக சாப்பிடும் பழக்கம் ஏற்பட்டதாகவும், உடலின் மெட்டபாலிசம் வேகம் குறைந்ததாகவும் அவர் கூறியுள்ளார். பின்னர் எழுந்த ஒரு மணி நேரத்திற்குள் ஆரோக்கியமான காலை உணவை சாப்பிடத் தொடங்கியபோது உடலில் நல்ல மாற்றங்கள் ஏற்பட்டதாக அவர் தெரிவித்துள்ளார்.
இரண்டாவது மாற்றம், கலோரிகளை பானங்கள் மூலமாக உட்கொள்வதை நிறுத்தியது. பழச்சாறு, அதிக சர்க்கரை சேர்க்கப்பட்ட தேநீர், குளிர்பானங்கள் மற்றும் காபி வகைகள் ஆரோக்கியமானவை என்று பலர் நினைத்தாலும், அவற்றில் மறைந்திருக்கும் கலோரிகள் உடல் எடையை அதிகரிக்கக் காரணமாகின்றன. ஷிகா இதை உணர்ந்த பிறகு தண்ணீர், சர்க்கரை இல்லாத தேநீர் மற்றும் பிளாக் காபி போன்றவற்றை தேர்வு செய்ததாக கூறுகிறார்.
மூன்றாவது முக்கியமான பழக்கம், “ஆரோக்கியமான ஸ்நாக்ஸ் என்பதால் எவ்வளவு வேண்டுமானாலும் சாப்பிடலாம்” என்ற எண்ணத்தை கைவிட்டது. பாதாம், வேர்க்கடலை, கிரனோலா, புரோட்டீன் பார்கள் போன்றவை ஆரோக்கியமானவை என்றாலும், அளவுக்கு அதிகமாக எடுத்துக்கொண்டால் அவையும் கூடுதல் கலோரிகளை வழங்கும். இதை உணர்ந்த பிறகே தனது உணவு அளவை கட்டுப்படுத்தத் தொடங்கியதாக அவர் கூறியுள்ளார்.
அடுத்ததாக அவர் கைவிட்ட பழக்கம், “வார இறுதியில் மட்டும் சுதந்திரமாக சாப்பிடலாம்” என்ற மனநிலை. பலர் வாரம் முழுவதும் டயட்டில் இருந்து, வார இறுதியில் அதிகமாக சாப்பிடுவார்கள். இது முழு வார முயற்சியையும் வீணாக்கிவிடும். ஷிகா தனது உணவு முறையை தினசரி சமநிலையுடன் பராமரிக்கத் தொடங்கியபோது எடை குறைப்பு வேகமடைந்ததாக கூறுகிறார்.
மேலும், போதுமான தூக்கம் இல்லாமல் வாழ்ந்த பழக்கத்தையும் அவர் மாற்றினார். மருத்துவ நிபுணர்களும் போதுமான தூக்கம் இல்லாதவர்கள் அதிக பசியை உணர்வதாகவும், உடல் எடை அதிகரிக்கும் அபாயம் உள்ளதாகவும் கூறுகின்றனர். தூக்கமின்மை உடலில் ஹார்மோன் சமநிலையை பாதித்து, அதிக உணவு உட்கொள்ள தூண்டுகிறது. ஷிகா தினசரி போதுமான தூக்கத்தை உறுதி செய்தது தனது எடை குறைப்பில் முக்கிய பங்காற்றியதாக கூறுகிறார்.
அதேபோல், உடனடி முடிவுகளை எதிர்பார்க்கும் மனநிலையையும் அவர் கைவிட்டார். பலர் சில நாட்களில் பெரிய மாற்றத்தை எதிர்பார்க்கிறார்கள். ஆனால் உடல் எடை குறைப்பு என்பது நீண்டகால செயல்முறை. சிறிய முன்னேற்றங்களையே வெற்றியாக பார்க்கத் தொடங்கியபோது தனது பயணம் சுலபமாக மாறியதாக ஷிகா தெரிவித்துள்ளார்.
மற்றொரு முக்கிய மாற்றம், உணவை “நல்லது” அல்லது “கெட்டது” என்று பிரித்து பார்க்கும் பழக்கத்தை நிறுத்தியது. ஒரு உணவை முழுமையாக தவிர்ப்பதற்குப் பதிலாக, அளவோடு எடுத்துக்கொள்வது சிறந்தது என்று அவர் வலியுறுத்துகிறார். இது மனஅழுத்தம் இல்லாமல் உணவு கட்டுப்பாட்டை கடைபிடிக்க உதவியதாக கூறப்படுகிறது.
இறுதியாக, தன்னை மற்றவர்களுடன் ஒப்பிடும் பழக்கத்தையும் அவர் கைவிட்டார். சமூக வலைதளங்களில் பிறரின் மாற்றங்களை பார்த்து மனம் தளராமல், தனது உடல் மற்றும் தனது இலக்கில் மட்டுமே கவனம் செலுத்தத் தொடங்கியபோது தன்னம்பிக்கை அதிகரித்ததாக அவர் கூறியுள்ளார்.
உடல் எடையை குறைப்பது என்பது வெறும் கலோரி குறைப்போ அல்லது ஜிம் பயிற்சியோ மட்டுமல்ல என்பதை ஷிகாவின் கதை காட்டுகிறது. வாழ்க்கை முறையில் உள்ள சிறிய தவறுகளை சரிசெய்வது, உணவு மற்றும் தூக்கத்தில் ஒழுங்கை கடைபிடிப்பது, பொறுமையுடன் தொடர்ந்து செயல்படுவது போன்ற அடிப்படை விஷயங்களே நீண்டகால வெற்றிக்கு காரணமாகின்றன. பலர் உடனடி தீர்வுகளை தேடிக்கொண்டிருக்கும் இந்த காலத்தில், 72 கிலோவிலிருந்து 49 கிலோவாக மாறிய ஷிகா சுரானாவின் பயணம், “சிறிய மாற்றங்கள் பெரிய வெற்றிகளை உருவாக்கும்” என்பதற்கான சிறந்த உதாரணமாக பார்க்கப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்