தீபாவளி உள்ளிட்ட பண்டிகைக் காலங்களில் சொந்த ஊர்களுக்குச் செல்ல விமானப் பயணத்தைத் தேர்வு செய்யும் மக்களுக்கு, விமானக் கட்டண உயர்வு பெரும் சுமையாக மாறியுள்ளது. வழக்கமான கட்டணத்தைவிட சில வழித்தடங்களில் பல மடங்கு அதிகமாக டிக்கெட் விலை உயர்ந்துள்ளதாக உச்சநீதிமன்றத்தில் முறையிடப்பட்டுள்ளது. குறிப்பாக, விமானக் கட்டணம் 700 சதவீதம் வரை அதிகரித்துள்ளதாகக் கூறி அவசர விசாரணை கோரப்பட்ட நிலையில், நீதிபதிகள் தெரிவித்த ஒரு கருத்து தற்போது நாடு முழுவதும் கவனத்தைப் பெற்றுள்ளது.
தீபாவளி பண்டிகையை முன்னிட்டு பலரும் குடும்பத்துடன் சொந்த ஊர்களுக்குச் செல்லத் திட்டமிடுவது வழக்கம். ரயில் டிக்கெட்டுகள் முன்கூட்டியே முடிந்துவிடும் சூழலில், கடைசி நேரத்தில் பயணம் செய்ய வேண்டியவர்கள் விமானப் பயணத்தைத் தேர்வு செய்கிறார்கள். இதனைப் பயன்படுத்தி விமான நிறுவனங்கள் அதிகக் கட்டணம் வசூலிப்பதாகப் புகார் எழுந்துள்ளது. இதுதொடர்பாக உச்சநீதிமன்றத்தில் தாக்கல் செய்யப்பட்ட மனுவில், பண்டிகைக் காலங்களில் விமானக் கட்டணத்தைக் கட்டுப்படுத்த மத்திய அரசு உரிய நடவடிக்கை எடுக்க வேண்டும் என்று கோரப்பட்டுள்ளது.
இந்த மனு தொடர்பான அவசரக் கோரிக்கை நவம்பர் 2ஆம் தேதி உச்சநீதிமன்றத்தில் முன்வைக்கப்பட்டது. நீதிபதிகள் விக்ரம் நாத், சந்தீப் மேத்தா மற்றும் அபரேஷ் சிங் ஆகியோர் அடங்கிய அமர்வு முன்பு வழக்கறிஞர் ஆஜராகி, விமானக் கட்டணம் வழக்கமான விலையைவிட 700 சதவீதம் வரை அதிகரித்துள்ளதாகத் தெரிவித்தார். இதற்குப் பதிலளித்த நீதிபதி விக்ரம் நாத், “விமானத்தில் பயணம் செய்ய வேண்டாம்” என்று குறிப்பிட்டார். இதையடுத்து, விமானப் பயணம் தற்போது அத்தியாவசியமான சேவையாக மாறிவிட்டதாகவும், இத்தகைய கட்டண உயர்வு அரசியலமைப்புச் சட்டத்தின் 14ஆவது பிரிவுக்கு எதிரானது என்றும் வழக்கறிஞர் வாதிட்டார். இருப்பினும், அந்த மனுவை அவசரமாக விசாரணைக்கு எடுத்துக்கொள்ள நீதிமன்றம் மறுத்துவிட்டது.
இந்த விவகாரத்தில் மனுதாரர் முன்வைத்துள்ள புள்ளிவிவரங்கள் விமானக் கட்டண உயர்வின் தீவிரத்தை வெளிப்படுத்துகின்றன. டெல்லியில் இருந்து கொல்கத்தாவுக்குச் செல்ல வழக்கமாக ரூ.10,000 முதல் ரூ.11,000 வரை இருக்கும் டிக்கெட் விலை, நவம்பர் 6ஆம் தேதி பயணத்திற்கு ரூ.78,694 வரை உயர்ந்துள்ளதாக மனுவில் குறிப்பிடப்பட்டுள்ளது. அதேபோல், பெங்களூருவிலிருந்து டெல்லிக்குச் செல்லும் ஒரே நாளுக்கான விமானங்களில் காலை 5 மணிப் பயணத்திற்கு சுமார் ரூ.15,901 கட்டணம் இருந்த நிலையில், பிற்பகல் 3.45 மணிப் பயணத்திற்கு ரூ.40,506 வரை கட்டணம் நிர்ணயிக்கப்பட்டதாகக் கூறப்பட்டுள்ளது.
மும்பை - டெல்லி வழித்தடத்தில் ரூ.11,531 ஆக இருந்த கட்டணம் ரூ.60,577 ஆகவும், டெல்லி - மும்பை வழித்தடத்தில் ரூ.5,223 ஆக இருந்த கட்டணம் ரூ.26,793 ஆகவும் உயர்ந்துள்ளதாக மனுவில் சுட்டிக்காட்டப்பட்டுள்ளது. ஒரே வழித்தடத்தில் ஒரே நாளில் இயக்கப்படும் விமானங்களுக்கு இவ்வளவு பெரிய கட்டண வேறுபாடு ஏன் ஏற்படுகிறது என்பதே மனுதாரரின் முக்கியக் கேள்வியாக உள்ளது.
விமான நிறுவனங்கள் பொதுவாக விமான எரிபொருள் விலை உயர்வு, இயக்கச் செலவு மற்றும் பயணிகளின் தேவை ஆகியவற்றைக் காரணங்களாகக் கூறுகின்றன. ஆனால், ஒரே நாளில் ஒரே வழித்தடத்தில் இயக்கப்படும் விமானங்களுக்கு எரிபொருள் பயன்பாட்டில் பெரிய வேறுபாடு இருக்காது என்பதால், கட்டணத்தில் இவ்வளவு அதிகமான வித்தியாசம் ஏற்படுவதை ஏற்றுக்கொள்ள முடியாது என்று மனுதாரர் வாதிட்டுள்ளார். விமான டிக்கெட் விலையைத் தேவைக்கு ஏற்ப தானாக மாற்றும் Dynamic Pricing முறையில் வெளிப்படைத்தன்மை தேவை என்றும் அவர் கோரியுள்ளார்.
மேலும், உள்நாட்டு விமானப் பயணங்களில் பொருள்களைக் கொண்டு செல்ல வழங்கப்பட்ட இலவசப் பதிவு செய்யப்பட்ட பயணப்பொதி அளவு 25 கிலோவிலிருந்து 15 கிலோவாகக் குறைக்கப்பட்டிருப்பதையும் மனு சுட்டிக்காட்டுகிறது. பண்டிகைக் காலங்களில் குடும்பத்தினருக்குப் பரிசுப் பொருட்கள் மற்றும் பிற தேவையான பொருட்களை எடுத்துச் செல்லும் பயணிகளுக்கு இது கூடுதல் செலவை ஏற்படுத்துவதாகக் கூறப்பட்டுள்ளது. எனவே, கட்டணக் கட்டுப்பாட்டுடன் இலவசப் பயணப்பொதி அளவையும் மீண்டும் 25 கிலோவாக உயர்த்த வேண்டும் எனக் கோரப்பட்டுள்ளது.
இந்த விவகாரம் தொடர்பாக ஏற்கெனவே சமூக ஆர்வலர் எஸ். லட்சுமிநாராயணன் உச்சநீதிமன்றத்தில் பொதுநல மனு தாக்கல் செய்துள்ளார். விமானக் கட்டண நிர்ணயத்தில் வெளிப்படைத்தன்மையை உறுதி செய்யவும், பயணிகளின் நலனைப் பாதுகாக்கவும் தனித்துவமான ஒழுங்குமுறை அமைப்பை உருவாக்க வேண்டும் என்பது அவரது கோரிக்கையாகும். இந்த முக்கிய வழக்கின் அடுத்தகட்ட விசாரணை நவம்பர் 16ஆம் தேதி நடைபெறவுள்ளது.
மத்திய அரசு பாரதிய வாயுயான் நியமங்கள் 2026 என்ற புதிய விமானப் போக்குவரத்து விதிமுறைகளை அறிவித்துள்ளது. இவை 2027 ஜனவரி 1ஆம் தேதி முதல் நடைமுறைக்கு வர உள்ளன. அசாதாரண சூழ்நிலைகளில் பொதுநலனைக் கருத்தில் கொண்டு விமானக் கட்டண விவகாரத்தில் அரசு தலையிடுவதற்கான அதிகாரமும் இந்த விதிகளில் இடம்பெற்றுள்ளது. விமானப் பயணம் என்பது வசதி படைத்தவர்களுக்கு மட்டுமே உரியதாக மாறிவிடக்கூடாது என்பதே இந்த விவாதத்தின் முக்கிய நோக்கமாக உள்ளது. குறிப்பாக, அவசர மருத்துவத் தேவைகள், குடும்ப நிகழ்வுகள் மற்றும் பண்டிகைக் காலப் பயணங்களுக்காக விமானத்தை நம்பியிருப்பவர்களுக்கு நியாயமான கட்டணம் கிடைக்க வேண்டும் என்ற கோரிக்கை வலுத்துள்ளது. விமானக் கட்டணத்திற்கு அரசு நேரடியாக உச்சவரம்பு நிர்ணயிக்குமா அல்லது புதிய விதிமுறைகள் மூலம் கட்டண உயர்வைக் கட்டுப்படுத்துமா என்பது இனிவரும் விசாரணைகளில் தெரியவரும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.