சில வருடங்களுக்கு முன்பு ஒரு மாணவர் 12-ம் வகுப்பு முடித்த பிறகு எந்த படிப்பை தேர்வு செய்வது என்று யோசிக்கும் போது, மருத்துவம், பொறியியல், வணிகவியல் அல்லது அரசு வேலைக்கான படிப்புகள் போன்ற வழிகள்தான் அதிகமாக பேசப்பட்டன. ஆனால் இன்று நிலைமை மாறிவிட்டது. செயற்கை நுண்ணறிவு (AI) உலகம் முழுவதும் வேகமாக வளர்ந்து வரும் நிலையில், சில படிப்புகளின் மதிப்பு எதிர்பாராத அளவுக்கு உயர்ந்து வருகிறது.
பல மாணவர்கள் ஒரு தவறான எண்ணத்தில் இருக்கிறார்கள். "AI வந்துடுச்சு... இனிமேல் எல்லா வேலைகளையும் AI பண்ணிடும்" என்று. ஆனால் நிபுணர்கள் சொல்வது வேறு. AI வேலைகளை முழுமையாக எடுத்துக்கொள்ளவில்லை. மாறாக, AI-ஐ பயன்படுத்த தெரிந்தவர்களுக்கு புதிய வாய்ப்புகளை உருவாக்குகிறது. அதனால்தான் இன்று சில குறிப்பிட்ட படிப்புகளுக்கு நிறுவனங்கள் அதிக முக்கியத்துவம் கொடுக்க ஆரம்பித்துள்ளன.
முதலில் அதிக மதிப்பு பெற்றிருக்கும் துறை Data Science. இன்று உலகம் முழுவதும் தினமும் கோடிக்கணக்கான தகவல்கள் உருவாகின்றன. இந்த தகவல்களை ஆய்வு செய்து, அதிலிருந்து பயனுள்ள முடிவுகளை எடுக்கும் நிபுணர்களின் தேவை அதிகரித்து வருகிறது. அதனால்தான் Data Science மற்றும் Business Analytics போன்ற படிப்புகள் பல கல்வி நிறுவனங்களில் புதிதாக அறிமுகப்படுத்தப்படுகின்றன.
அடுத்ததாக Artificial Intelligence மற்றும் Machine Learning தொடர்பான படிப்புகள். முன்பு சில பெரிய நிறுவனங்களில் மட்டுமே இருந்த இந்த துறை, இன்று மருத்துவம் முதல் விவசாயம் வரை பல துறைகளில் பயன்படுத்தப்படுகிறது. அதனால் AI Engineer, Machine Learning Engineer போன்ற பணிகளுக்கான தேவை தொடர்ந்து அதிகரித்து வருகிறது. Cloud Computing என்ற துறையும் வேகமாக வளர்ந்து வருகிறது. இன்று பல நிறுவனங்கள் தங்களுடைய தகவல்களையும் சேவைகளையும் இணைய அடிப்படையிலான சேமிப்பு அமைப்புகளுக்கு மாற்றி வருகின்றன. இதனால் Cloud Engineer, DevOps Engineer போன்ற பணிகளுக்கு அதிக தேவை உருவாகியுள்ளது. பல புதிய படிப்புகளிலும் Cloud Computing முக்கிய பகுதியாக சேர்க்கப்பட்டு வருகிறது.
Cyber Security அல்லது இணைய பாதுகாப்பு துறையும் AI காலத்தில் மிகப்பெரிய முக்கியத்துவம் பெற்றுள்ளது. இணைய மோசடிகள், தரவு திருட்டு மற்றும் டிஜிட்டல் தாக்குதல்கள் அதிகரித்து வரும் நிலையில், நிறுவனங்கள் தங்களது தகவல்களை பாதுகாக்க நிபுணர்களை தேடி வருகின்றன. அதனால்தான் சமீபத்தில் சில முன்னணி கல்வி நிறுவனங்கள் Cyber Security-க்கென தனிப்பட்ட பட்டப்படிப்புகளையும் அறிமுகப்படுத்தியுள்ளன.
AI வளர்ச்சி காரணமாக Software Development துறையின் மதிப்பு குறையவில்லை. மாறாக புதிய வடிவம் பெற்றுள்ளது. இன்று நிரலாக்கம் தெரிந்தவர்கள் மட்டுமல்ல, AI கருவிகளை பயன்படுத்தி மென்பொருள் உருவாக்க தெரிந்தவர்கள் அதிக வாய்ப்புகளை பெறுகின்றனர். Python, SQL மற்றும் தரவு பகுப்பாய்வு திறன்கள் மிகவும் முக்கியமானதாக மாறியுள்ளன.
மாணவர்கள் இன்னொரு முக்கியமான விஷயத்தை புரிந்து கொள்ள வேண்டும். AI காலத்தில் வெறும் தொழில்நுட்ப படிப்புகள் மட்டுமே முக்கியம் என்று இல்லை. AI மற்றும் Business இணைந்த படிப்புகளுக்கும் அதிக வரவேற்பு கிடைக்கிறது. அதனால்தான் AI மற்றும் Business Analytics இணைந்த புதிய பட்டப்படிப்புகளை சில முன்னணி கல்வி நிறுவனங்கள் அறிமுகப்படுத்தி வருகின்றன.
இன்றைய நிறுவனங்கள் வெறும் பட்டப்படிப்பை மட்டும் பார்க்கவில்லை. ஒரு மாணவர் என்ன திறன்களை கற்றிருக்கிறார் என்பதையும் பார்க்கின்றன. அதனால்தான் "Skills தான் முக்கியம்; Degree மட்டும் போதாது" என்று கல்வி நிபுணர்கள் தொடர்ந்து கூறுகின்றனர்.
12-ம் வகுப்பு முடித்த மாணவர்களுக்கு இன்று கிடைக்கும் வாய்ப்புகள் முன்பைவிட அதிகமாக உள்ளன. B.Tech in AI, B.Sc Data Science, BCA AI, Cyber Security, Cloud Computing போன்ற பல புதிய வழிகள் உருவாகியுள்ளன. மாணவர்கள் தங்களுடைய ஆர்வம், திறன் மற்றும் எதிர்கால இலக்கை அடிப்படையாக வைத்து தேர்வு செய்ய வேண்டும். ஆனால் ஒரு முக்கியமான எச்சரிக்கையும் இருக்கிறது. "AI" என்ற பெயர் இருப்பதற்காக மட்டும் எந்த படிப்பையும் தேர்வு செய்யக்கூடாது. அந்த படிப்பில் என்ன கற்றுக்கொடுக்கப்படுகிறது, தொழில்துறையில் அதற்கான தேவை என்ன, பயிற்சி வாய்ப்புகள் உள்ளனவா? என்பதையும் ஆராய வேண்டும். சில நேரங்களில் ஒரு சாதாரண Computer Science படிப்பு கூட, சரியான திறன்களுடன் இணைந்தால் பெரிய வாய்ப்புகளை உருவாக்கலாம்.
எதிர்காலத்தைப் பற்றி பேசும்போது நிபுணர்கள் ஒரு விஷயத்தை தெளிவாக கூறுகின்றனர். AI வேலைகளை மாற்றாது; AI-ஐ பயன்படுத்த தெரிந்தவர்கள் மற்றவர்களை விட முன்னேறுவார்கள். அதனால் இன்று மாணவர்கள் படிப்பை தேர்வு செய்யும் போது, AI உடன் இணைந்து வளரக்கூடிய துறைகளை கவனிக்க வேண்டும்.
நினைவில் வைத்துக்கொள்ளுங்கள், எதிர்காலத்தில் அதிக மதிப்பு பெறப்போகும் படிப்புகள் என்பது வெறும் புத்தக அறிவை மட்டும் கற்றுத்தருபவை அல்ல. தரவு, செயற்கை நுண்ணறிவு, இணைய பாதுகாப்பு, மேகக் கணினி தொழில்நுட்பம் மற்றும் பிரச்சினைகளை தீர்க்கும் திறனை வளர்க்கும் படிப்புகள்தான் அதிக வாய்ப்புகளை உருவாக்கப் போகின்றன.
அதனால்தான் இன்று கல்வி உலகம் மாணவர்களிடம் ஒரு புதிய கேள்வியை கேட்க ஆரம்பித்துள்ளது: "எந்த Degree படிக்கப் போறீங்க?" என்பதல்ல... "AI காலத்துக்கு தயாராக எந்த Skill கற்றுக்கொள்ளப் போறீங்க?" என்பதுதான்!
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.