கனரா வங்கியில் கல்வி லோனுக்கு எப்படி விண்ணப்பிப்பது? - முழு விவரம் இதோ..

கல்வி என்பது ஒரு மாணவரின் எதிர்காலத்தை வடிவமைக்கும் முக்கியமான பயணம். ஆனால், உயர்கல்விக்கு தேவையான பணம் எல்லோருக்கும் எளிதாகக் கிடைத்துவிடுவதில்லை. இதற்காகவே கனரா வங்கி மாணவர்களுக்கு கல்வி லோன் வழங்கி உதவுகிறது. இந்தக் கட்டுரையில், கனரா வங்கியில் உங்கள் பிள்ளையின் படிப்புக்காக கல்வி லோனுக்கு எப்படி விண்ணப்பிப்பது, தேவையான ஆவணங்கள், வட்டி விகிதம், திருப்பிச் செலுத்தும் முறை ஆகியவற்றை பார்க்கலாம்.

கனரா வங்கி, இந்தியாவில் மாணவர்களின் கல்வி கனவுகளை நனவாக்குவதற்காக பல்வேறு கல்வி லோன் திட்டங்களை வழங்குகிறது. இந்தியாவிலும் வெளிநாட்டிலும் படிக்க விரும்பும் மாணவர்களுக்கு இந்த லோன் உதவுகிறது. இந்திய வங்கிகள் சங்கத்தின் (IBA) மாதிரி கல்வி லோன் திட்டத்தின் கீழ், கனரா வங்கி மாணவர்களுக்கு குறைந்த வட்டி விகிதத்தில் லோன் வழங்குகிறது. இதில் முக்கியமானது, படிப்பு முடியும் வரை திருப்பிச் செலுத்த வேண்டிய அவசியம் இல்லை என்பது. இதனால் மாணவர்கள் படிப்பில் முழு கவனம் செலுத்த முடியும்.

யாரெல்லாம் விண்ணப்பிக்கலாம்?

கனரா வங்கியின் கல்வி லோனுக்கு விண்ணப்பிக்க சில தகுதிகள் உள்ளன:

குடியுரிமை: விண்ணப்பதாரர் இந்திய குடிமகனாக இருக்க வேண்டும்.

கல்வி தகுதி: அங்கீகரிக்கப்பட்ட கல்வி நிறுவனத்தில் பயிலும் மாணவர். உதாரணமாக, 12-ம் வகுப்பு முடித்தவர்கள் இளநிலை படிப்புக்கு, இளநிலை முடித்தவர்கள் முதுநிலை படிப்புக்கு விண்ணப்பிக்கலாம்.

படிப்பு வகை: இந்தியாவில் அல்லது வெளிநாட்டில் அங்கீகரிக்கப்பட்ட கல்லூரி/பல்கலைக்கழகத்தில் பயிலும் பட்டப்படிப்பு, பட்டயப்படிப்பு, தொழில்முறை படிப்புகள் (மருத்துவம், பொறியியல், மேலாண்மை போன்றவை).

பெற்றோர் அல்லது பாதுகாவலர் இணை கடன் வாங்குபவராக இருக்க வேண்டும்.

விண்ணப்பிக்க தேவையான ஆவணங்கள்

கல்வி Loan வாங்குவதற்கு சில முக்கிய ஆவணங்கள் தேவை. இவற்றை முன்கூட்டியே தயார் செய்து வைத்திருந்தால் விண்ணப்ப செயல்முறை எளிதாக இருக்கும்:

அடையாளச் சான்று: ஆதார் கார்டு, வாக்காளர் அடையாள அட்டை, பாஸ்போர்ட், ஓட்டுநர் உரிமம் (விண்ணப்பதாரர் மற்றும் இணை கடன் வாங்குபவருக்கு).

முகவரி சான்று: ஆதார் கார்டு, மின்சார கட்டண ரசீது, வாடகை ஒப்பந்தம் போன்றவை.

கல்வி ஆவணங்கள்: 10-ம் வகுப்பு, 12-ம் வகுப்பு மதிப்பெண் பட்டியல், கல்லூரி சேர்க்கை கடிதம், கட்டண விவரங்கள்.

வருமான ஆவணங்கள்: இணை கடன் வாங்குபவரின் (பெற்றோர்/பாதுகாவலர்) சம்பள பட்டியல், வருமான வரி கணக்கு (ITR) கடந்த 2 ஆண்டுகளுக்கு.

வங்கி விவரங்கள்: கடந்த 6 மாத வங்கி கணக்கு விவரங்கள்.

புகைப்படங்கள்: விண்ணப்பதாரர் மற்றும் இணை கடன் வாங்குபவரின் பாஸ்போர்ட் அளவு புகைப்படங்கள்.

விண்ணப்பிக்கும் முறை

கனரா வங்கியில் கல்வி லோன் வாங்குவது எளிமையான செயல்முறை. பின்வரும் படிகளைப் பின்பற்றலாம்:

ஆன்லைன் விண்ணப்பம்:

கனரா வங்கியின் அதிகாரப்பூர்வ இணையதளமான www.canarabank.com செல்லவும்.

“Loans” பிரிவில் “Education Loan” தேர்ந்தெடுக்கவும்.

“Apply Online” என்ற ஆப்ஷனை கிளிக் செய்து, விண்ணப்ப படிவத்தை பூர்த்தி செய்யவும்.

இந்திய அரசின் வித்யா லட்சுமி போர்ட்டல் (www.vidyalakshmi.co.in) மூலமாகவும் விண்ணப்பிக்கலாம். இந்த தளத்தில் கனரா வங்கி உட்பட 37 வங்கிகள் இணைந்துள்ளன.

ஆவணங்களை சமர்ப்பித்தல்:

ஆன்லைனில் விண்ணப்பித்த பிறகு, தேவையான ஆவணங்களை அருகிலுள்ள கனரா வங்கி கிளையில் சமர்ப்பிக்கவும்.

சில சமயங்களில், ஆவணங்களை ஆன்லைனிலேயே பதிவேற்ற வசதி உள்ளது.

வங்கி பரிசீலனை:

வங்கி உங்கள் ஆவணங்களை பரிசீலித்து, கடன் தகுதியை மதிப்பிடும்.

கல்லூரியின் அங்கீகாரம், மாணவரின் கல்வி பின்னணி, இணை கடன் வாங்குபவரின் வருமானம் ஆகியவை சரிபார்க்கப்படும்.

லோன் அனுமதி:

பரிசீலனை முடிந்தவுடன், வங்கி லோன் அனுமதி கடிதத்தை வழங்கும்.

இதில் லோன் தொகை, வட்டி விகிதம், திருப்பிச் செலுத்தும் காலம் ஆகியவை குறிப்பிடப்பட்டிருக்கும்.

லோன் விநியோகம்:

லோன் தொகை நேரடியாக கல்லூரி/பல்கலைக்கழகத்தின் வங்கி கணக்கிற்கு மாற்றப்படும்.

லோன் தொகை:

இந்தியாவில் படிப்புக்கு: அதிகபட்சம் 7.5 லட்சம் ரூபாய் வரை (ஜாமீன் இல்லாமல்).

வெளிநாட்டு படிப்புக்கு: 20 லட்சம் ரூபாய் வரை (ஜாமீன் தேவை).

சில சிறப்பு திட்டங்களில் 36 லட்சம் ரூபாய் வரை கிடைக்கலாம்.

வட்டி விகிதம்:

கனரா வங்கியின் வட்டி விகிதம் 8.5% முதல் 11% வரை மாறுபடும். இது கடன் தொகை மற்றும் படிப்பின் வகையைப் பொறுத்து மாறும். மத்திய அரசின் மானியத் திட்டங்களின் கீழ் (CSIS) பெண் மாணவர்களுக்கு வட்டி சலுகைகள் உள்ளன.

திருப்பிச் செலுத்தல்:

படிப்பு முடிந்த பிறகு 1 வருட இடைவெளி (Moratorium Period) வழங்கப்படும். அதன் பிறகு 10 முதல் 15 வருடங்கள் வரை தவணை முறையில் திருப்பிச் செலுத்தலாம்.

முக்கிய சலுகைகள்

வட்டி மானியம்: மத்திய அரசின் CSIS திட்டத்தின் கீழ், ஆண்டு வருமானம் 4.5 லட்சத்திற்கு குறைவாக உள்ள குடும்பங்களுக்கு படிப்பு காலத்தில் வட்டி மானியம் கிடைக்கும்.

பெண் மாணவர்களுக்கு சலுகை: பெண்களுக்கு 0.5% வட்டி குறைப்பு உள்ளது.

நீண்ட தவணை: கடன் திருப்பிச் செலுத்துவதற்கு நீண்ட கால அவகாசம் வழங்கப்படுகிறது.

மேலும் விவரங்களுக்கு, கனரா வங்கியின் இணையதளத்தைப் பார்க்கவும் அல்லது அருகிலுள்ள கிளையை தொடர்பு கொள்ளுங்க.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.