எடெல்வைஸ் மியூச்சுவல் ஃபண்ட் நிறுவனத்தின் தலைமைச் செயல் அதிகாரி (CEO) ராதிகா குப்தா, பணம் சேமிப்பது மற்றும் முதலீடு செய்வது குறித்து ஒரு புதிய '10-30-50' என்ற விதியை அறிமுகப்படுத்தியுள்ளார். இது, வாழ்க்கைச் செலவுகளுக்கும் சேமிப்புக்கும் இடையே சமநிலையைப் பேண உதவும் ஒரு எளிய வழிமுறையாகும்.
இந்த '10-30-50' விதி என்றால் என்ன?
ராதிகா குப்தாவின் இந்த விதி, உங்கள் வாழ்க்கையின் வெவ்வேறு காலகட்டங்களில் எவ்வளவு சேமிக்க வேண்டும் என்பதை விளக்குகிறது.
உங்கள் 20களில்: வருமானத்தில் 10% சேமிப்பு
இதுதான் உங்கள் நிதிப் பயணத்தின் முதல் படி. இந்த வயதில் சம்பளம் குறைவாக இருக்கலாம், செலவுகள் அதிகமாக இருக்கலாம். நண்பர்களுடன் சினிமா, விருந்துகள், புதிய ஆடைகள் என பல ஆசைகள் இருக்கும்.
ராதிகா குப்தாவின் கருத்தின்படி, இந்த வயதில் நீங்கள் எவ்வளவு சேமிக்கிறீர்கள் என்பது முக்கியமல்ல, சேமிக்கும் பழக்கத்தை உருவாக்குவதுதான் முக்கியம். உங்களால் 1% மட்டுமே சேமிக்க முடிந்தாலும், அதைத் தொடங்குவது மிகவும் அவசியம்.
இதை, 'உங்கள் எதிர்கால உங்களுக்குச் செலுத்தும் சம்பளம்' என்று நினைத்துக்கொள்ளுங்கள். இது உங்களை நிதி ரீதியாக பலப்படுத்தும்.
உங்கள் 30களில்: வருமானத்தில் 30% சேமிப்பு
30 வயதிற்கு மேல், உங்கள் வருமானம் அதிகரிக்கும். பதவி உயர்வுகள், வேலை மாற்றம் அல்லது தொழில் வளர்ச்சி மூலம் உங்கள் சம்பளம் உயரலாம்.
இந்த வயதில், வாழ்க்கை இலக்குகள் தீவிரமாக மாறும். வீடு வாங்குதல், திருமணம், குழந்தைகளின் கல்வி போன்ற பெரிய செலவுகளுக்குத் தயாராக வேண்டியிருக்கும்.
எனவே, இந்த காலகட்டத்தில் உங்கள் வருமானத்தில் குறைந்தது 30% சேமிக்க வேண்டும் என்று ராதிகா குப்தா கூறுகிறார்.
உங்கள் 40களில்: வருமானத்தில் 50% சேமிப்பு
40 வயதுக்குப் பிறகுதான், ஒரு நபரின் வருமானம் உச்சத்தை அடையும். இந்த வயதில், குழந்தைகள் உயர்கல்விக்குச் செல்வது, ஓய்வூதியத் திட்டமிடல் போன்ற பெரிய செலவுகள் அதிகரிக்கும்.
உங்கள் வருமானம் உச்சத்தில் இருக்கும்போது, அதில் பாதியளவை, அதாவது 50% சேமிக்க வேண்டும் என்று அவர் அறிவுறுத்துகிறார். இந்த காலகட்டத்தில்தான் நீங்கள் உங்கள் நீண்டகால நிதி இலக்குகளை அடைய முடியும்.
பலர், 'வருமானத்தில் 10% சேமிப்பது கூட கடினம்' என்று சொல்வதைக் கேட்டு, ராதிகா குப்தா ஒரு புத்திசாலித்தனமான யோசனையை முன்வைக்கிறார்.
வருமான வரியை, சம்பளம் பெறுவதற்கு முன்பே Tax Deducted at Source - TDS போல, சேமிப்பையும் Savings Deducted at Source - SDS எனும் ஒரு முறையை உருவாக்க வேண்டும் என்று அவர் கூறுகிறார். உங்கள் வருமானம் வங்கிக் கணக்கிற்கு வருவதற்கு முன்பே, ஒரு குறிப்பிட்ட தொகை தானாகவே மியூச்சுவல் ஃபண்ட், SIP அல்லது FD போன்ற திட்டங்களுக்குச் சென்றுவிடும் வகையில் ஒரு தானியங்கி அமைப்பை உருவாக்கலாம் என்று அவர் பரிந்துரைக்கிறார்.
பழக்கம்தான் முக்கியம்:
சதவிகிதங்களுக்கும் விதிகளுக்கும் அப்பால், செல்வத்தை உருவாக்குவது என்பது ஒரு பழக்கத்தை அடிப்படையாகக் கொண்டது என்று ராதிகா குப்தா வலியுறுத்துகிறார். ஆரம்பத்தில், நீங்கள் எவ்வளவு பணத்தைச் சேமிக்கிறீர்கள் என்பதை விட, சேமிக்கும் பழக்கத்தை உருவாக்குவதுதான் முக்கியம் என்று அவர் கூறுகிறார்.
அவரது 'மேங்கோ மில்லியனர்' (Mango Millionaire) என்ற புத்தகத்தில், கிரிக்கெட் மற்றும் சினிமா போன்ற பொதுவான உதாரணங்களைக் கொண்டு, நிதி மேலாண்மையை அவர் எளிமையாக விளக்கியுள்ளார். இந்த விதி, ஒரே இரவில் பணக்காரர் ஆவதற்கான ஒரு சூத்திரம் அல்ல. மாறாக, இந்தியாவின் உழைக்கும் தலைமுறைக்கு, ஒரு நிதிப் பாதுகாப்பை உருவாக்கவும், நீண்ட கால நிதி நிலையையும் அடையவும் உதவும் ஒரு யதார்த்தமான பாதையாக இது உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.