உலக மக்கள்தொகையை தாங்கும் திறனை பூமி ஏற்கனவே தாண்டிவிட்டது என்றும் உணவுப் பாதுகாப்பு, காலநிலை நிலைத்தன்மை மற்றும் மனித நலன் ஆகியவற்றின் மீது அழுத்தம் அதிகரித்து வருவதாக புதிய ஆய்வுகள் எச்சரிக்கின்றன. இருப்பினும், மக்கள்தொகை வளர்ச்சியை குறைப்பதும், இது குறித்து உலகளாவிய விழிப்புணர்வை ஏற்படுத்துவதும் மனிதகுலத்திற்கு இன்னும் சில நம்பிக்கையை அளிக்கக்கூடும் என்று ஆய்வாளர்கள் கூறுகின்றனர்.
'என்விரான்மென்டல் ரிசர்ச் லெட்டர்ஸ்' இதழில் வெளியிடப்பட்ட இந்த ஆய்வு , மனிதர்கள் புவியின் நீண்டகாலத் திறனை வெகுவாகத் தாண்டிச் சென்றுவிட்டனர் என்பதையும், தற்போதைய நுகர்வுப் பழக்கவழக்கங்களின் கீழ் தொடரும் வளர்ச்சியானது உலகெங்கிலும் உள்ள சமூகங்களுக்கான சுற்றுச்சூழல் மற்றும் சமூகச் சவால்களைத் தீவிரப்படுத்தும் என்பதையும் காட்டுகிறது. இந்த ஆய்வு, இரண்டு நூற்றாண்டுகளுக்கும் மேலான உலக மக்கள்தொகைத் தரவுகளை ஆராய்ந்து, இருபதாம் நூற்றாண்டின் நடுப்பகுதியில் தொடங்கிய மனித மக்கள்தொகை இயக்கவியலில் ஒரு பெரிய மாற்றத்தைக் கண்டறிந்தது.
ஆய்வின் முதன்மை ஆசிரியரும், ஃபிளிண்டர்ஸ் பல்கலைக்கழகத்தின் உலகளாவிய சூழலியல் பேராசிரியருமான கோரி பிராட்ஷா, "இந்தப் போக்கு, மனிதகுலம் பூமி தாங்கக்கூடிய அளவைத் தாண்டி வாழ்ந்து வருகிறது என்பதற்கான ஒரு தெளிவான உயிரியல் சமிக்ஞையை" வெளிப்படுத்துகிறது என்று கூறுகிறார். "நாம் வளங்களைப் பயன்படுத்தும் விதத்திற்கு பூமியால் ஈடுகொடுக்க முடியாது. பெரிய மாற்றங்கள் இல்லாமல் இன்றைய தேவையைக்கூட அதனால் பூர்த்தி செய்ய முடியாது. மேலும், நம்மால் சமாளிக்கக்கூடிய அளவை விட அதிகமாக நாம் இந்தப் புவியை உழைக்க வைக்கிறோம் என்பதை எங்கள் ஆய்வுகள் காட்டுகின்றன," என்று அவர் கூறியிருக்கிறார். அவர்கள் இந்தப் போக்குகளின் திசையைச் சோதித்து, உலகப் பிராந்தியங்கள் முழுவதும் முடிவுகளை ஒப்பிட்டனர். மேலும், மனிதர்களின் எண்ணிக்கை எவ்வாறு சுற்றுச்சூழல் அழுத்தத்தை ஏற்படுத்துகிறது என்பதைப் புரிந்துகொள்வதற்காக, மக்கள்தொகையின் அளவு வரலாற்று ரீதியாக காலநிலை, உமிழ்வுகள் மற்றும் சூழலியல் தடம் ஆகியவற்றில் ஏற்படும் மாற்றங்களுடன் எவ்வாறு ஒத்துப்போகிறது என்பதையும் அவர்கள் அளவிட்டனர்.
1950களுக்கு முன்பிலிருந்து, பூமியில், மனிதர்களின் எண்ணிக்கை அதிகரித்ததால் உலக மக்கள்தொகை வளர்ச்சி உண்மையில் வேகமடைந்தது என்று அந்த ஆய்வு கண்டறிந்துள்ளது. அதிகமான மக்கள் என்பது அதிகமான புத்தாக்கம், அதிகமான ஆற்றல் பயன்பாடு மற்றும் மேலும் விரிவாக்கத்திற்கு ஆதரவளித்த விரைவான தொழில்நுட்ப வளர்ச்சி ஆகியவற்றைக் குறித்தது. மேலும், 1960களின் முற்பகுதியில் மக்கள்தொகை தொடர்ந்து அதிகரித்து, உலகளாவிய வளர்ச்சி விகிதம் குறையத் தொடங்கியபோது, இந்தப் போக்கு சீர்குலைந்தது. "இந்த மாற்றத்தை, 'எதிர்மறை மக்கள்தொகைக் கட்டம்' என்று அழைக்கிறோம் என்கிறார் பேராசிரியர் பிராட்ஷா. இதன் பொருள், அதிகமான மக்களைச் சேர்ப்பது இனி வேகமான வளர்ச்சிக்கு வழிவகுக்காது என்பதாகும். இந்தக் கட்டத்தை நாங்கள் ஆய்வு செய்தபோது, தற்போதைய இந்த போக்குகள் தொடர்ந்தால், 2060களின் பிற்பகுதியிலோ அல்லது 2070களிலோ உலக மக்கள்தொகை 11.7 முதல் 12.4 பில்லியன் மக்களுக்கு இடையில் உச்சத்தை அடைய வாய்ப்புள்ளது என்பதைக் கண்டறிந்தோம் என்று கூறுகிறார்.
இந்த உச்ச வரம்பு ஆபத்தானது என்றும், மனித சமூகங்கள் புதைபடிவ எரிபொருட்களைச் சார்ந்திருந்ததாலும், இயற்கையால் ஈடுசெய்யப்படுவதை விட வேகமாக இயற்கை வளங்களைச் சுரண்டியதாலும்தான் தற்போது இந்த நிலை ஏற்பட்டுள்ளது என்றும் பேராசிரியர் பிராட்ஷா கூறினார். "உண்மையான நிலையான மக்கள்தொகை என்பது மிகவும் குறைவானதும், இருபதாம் நூற்றாண்டின் நடுப்பகுதியில் உலகம் கொண்டிருந்த மக்கள்தொகைக்கு நெருக்கமானதுமாகும். அனைவரும் சூழலியல் வரம்புகளுக்குள்ளும், வசதியான மற்றும் பொருளாதார ரீதியாகப் பாதுகாப்பான வாழ்க்கைத்தரத்திற்குள்ளும் வாழ்ந்தால், நிலையான உலகளாவிய மக்கள்தொகை சுமார் 250 கோடியாக இருக்கும் என்று எங்கள் கணக்கீடுகள் காட்டுகின்றன," என்று அவர் கூறினார்.
அந்த நிலையான எண்ணிக்கைக்கும், தற்போது 830 கோடியாக உள்ள இன்றைய மக்கள்தொகைக்கும் இடையே உள்ள மிகப்பெரிய இடைவெளி, உலகளாவிய அதீத நுகர்வின் அளவை எடுத்துக்காட்டுகிறது என்று ஆராய்ச்சியாளர்கள் கூறுகின்றனர். புதைபடிவ எரிபொருட்களை அதிக அளவில் சார்ந்திருந்ததால் இந்த அதீத நுகர்வு பல தசாப்தங்களாக மறைக்கப்பட்டிருந்தது என்றும், இது உணவு உற்பத்தி, எரிசக்தி விநியோகம் மற்றும் தொழில்துறையை ஊக்குவித்தாலும், காலநிலை மாற்றம் மற்றும் மாசுபாட்டையும் வேகப்படுத்தியது என்றும் அவர்கள் வாதிடுகின்றனர். புவியின் உயிர் ஆதார அமைப்புகள் ஏற்கனவே பெரும் அழுத்தத்தில் உள்ளன. ஆற்றல், நிலம் மற்றும் உணவைப் பயன்படுத்தும் விதத்தில் விரைவான மாற்றங்கள் செய்யாவிட்டால், கோடிக்கணக்கான மக்கள் பெருகிவரும் இந்த நிலையற்ற தன்மையை எதிர்கொள்வார்கள். இந்த வரம்புகள் வெறும் கோட்பாட்டு ரீதியானவை அல்ல, மாறாக அவை இப்போதே நிகழ்ந்துகொண்டிருக்கின்றன என்பதை எங்கள் ஆய்வு காட்டுகிறது என்று பிராட்ஷா கூறுகிறார்.
மேலும், வருங்கால சந்ததியினர் பாதுகாப்பான மற்றும் நிலையான வாழ்க்கையை வாழ வேண்டுமானால், சமூகம் நிலம், நீர், ஆற்றல் மற்றும் பொருட்களைப் பயன்படுத்தும் விதத்தை மறுபரிசீலனை செய்ய வேண்டும் என்று பேராசிரியர் பிராட்ஷா கூறுகிறார். "வரும் பத்தாண்டுகளில் நாம் எடுக்கும் முடிவுகளே, வருங்கால சந்ததியினரின் நல்வாழ்வையும், அனைத்து உயிர்களுக்கும் ஆதாரமான இயற்கை உலகின் மீள்திறனையும் தீர்மானிக்கும்," என்று பேராசிரியர் பிராட்ஷா இறுதியாக கூறினார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.