ஒரு காலத்தில் கையில் BlackBerry போன் வைத்திருப்பது பலருக்கும் பெருமையான விஷயமாக இருந்தது. கீபோர்டு வசதி, விரைவான தகவல் பரிமாற்றம், பாதுகாப்பான தகவல் தொடர்பு எனத் தனக்கென ஒரு இடத்தைப் பிடித்திருந்த அந்த நிறுவனம், தொடுதிரை ஸ்மார்ட்போன்களின் வருகைக்குப் பிறகு கடுமையான போட்டியைச் சந்தித்தது. ஆப்பிள், சாம்சங் போன்ற நிறுவனங்கள் சந்தையில் முன்னிலை பெற்ற நிலையில், BlackBerry-யின் போன்கள் படிப்படியாகப் பயன்பாட்டிலிருந்து மறைந்தன. ஆனால், நிறுவனம் தனது பயணத்தை நிறுத்தவில்லை. இப்போது செயற்கை நுண்ணறிவு தொழில்நுட்பத்தைப் பயன்படுத்தும் ரோபோக்கள், தானியங்கி இயந்திரங்கள் மற்றும் தொழிற்சாலை உபகரணங்களுக்கான மென்பொருளில் கவனம் செலுத்தி வருகிறது.
கனடாவைச் சேர்ந்த BlackBerry நிறுவனத்தின் தலைமைச் செயல் அதிகாரி ஜான் ஜியாமட்டியோ, எதிர்கால வளர்ச்சியில் ஏஐ தொழில்நுட்பம் கொண்ட ரோபோக்கள் முக்கியப் பங்கு வகிக்கும் என நம்பிக்கை தெரிவித்துள்ளார். சிஎன்பிசி ஊடகத்துக்கு அளித்த பேட்டியில், நிறுவனம் தற்போது கையில் வைத்துப் பயன்படுத்தும் சாதனங்களைத் தயாரிப்பதைவிட, உலகம் முழுவதும் இயங்கும் வாகனங்கள் மற்றும் பல்வேறு இயந்திரங்களுக்குப் பின்னால் செயல்படும் மென்பொருளை உருவாக்குவதில் கவனம் செலுத்துவதாக அவர் விளக்கியுள்ளார். குறிப்பாக, தொழிற்சாலைகள், மருத்துவ உபகரணங்கள், கிடங்குகள் மற்றும் தானியங்கி வாகனங்கள் போன்ற துறைகளில் BlackBerry-யின் தொழில்நுட்பத்துக்கு அதிக வாய்ப்புகள் இருப்பதாக அவர் தெரிவித்துள்ளார்.
இன்று BlackBerry-யின் முக்கிய வணிகங்களில் ஒன்று க்யூஎன்எக்ஸ் (QNX) எனப்படும் மென்பொருள் பிரிவாகும். இது கார் மற்றும் பிற இயந்திரங்களுக்குள் செயல்படும் அடிப்படை மென்பொருளை வழங்குகிறது. கணினியில் விண்டோஸ் இயங்குதளம் செயல்படுவதைப் போல, வாகனங்கள் மற்றும் இயந்திரங்களின் பல முக்கியப் பணிகளை இயக்குவதற்குக் க்யூஎன்எக்ஸ் உதவுகிறது. கார் பிரேக்கிங் அமைப்பு, வாகனக் கட்டுப்பாடு மற்றும் சில தானியங்கி ஓட்டுநர் வசதிகள் போன்றவற்றில் இந்தத் தொழில்நுட்பம் பயன்படுத்தப்படுகிறது. உலகம் முழுவதும் 27.5 கோடிக்கும் அதிகமான வாகனங்களில் க்யூஎன்எக்ஸ் மென்பொருள் இடம்பெற்றுள்ளதாக நிறுவனம் தெரிவித்துள்ளது.
ஆனால், BlackBerry-யின் அடுத்தகட்ட இலக்கு கார் தயாரிப்புத் துறையுடன் மட்டும் நின்றுவிடவில்லை. ஏஐ தொழில்நுட்பத்தின் உதவியுடன் சுற்றுப்புறத்தைப் புரிந்துகொண்டு செயல்படும் இயந்திரங்களை உருவாக்குவதிலும் நிறுவனம் ஆர்வம் காட்டுகிறது. இதையே ‘பிசிக்கல் ஏஐ’ (Physical AI) என்று அழைக்கின்றனர். பொதுவாக நாம் பயன்படுத்தும் ஏஐ கருவிகள் கேள்விகளுக்குப் பதிலளிக்கவும், படங்களை உருவாக்கவும், தகவல்களைத் தொகுக்கவும் உதவுகின்றன. ஆனால் பிசிக்கல் ஏஐ என்பது நிஜ உலகில் இயங்கும் இயந்திரங்கள் தங்களைச் சுற்றியுள்ள பொருட்களை அடையாளம் கண்டு, சூழ்நிலைக்கு ஏற்ப நகர்ந்து, பாதுகாப்பாகச் செயல்பட உதவும் தொழில்நுட்பமாகும்.
உதாரணமாக, ஒரு பெரிய கிடங்கில் பொருட்களை ஓரிடத்திலிருந்து மற்றொரு இடத்துக்குக் கொண்டு செல்லும் தானியங்கி வாகனங்கள், தொழிற்சாலைகளில் பொருட்களைத் தூக்கிச் செல்லும் ரோபோக்கள், சரக்குகளை ஏற்றிச் செல்லும் இயந்திரங்கள் ஆகியவற்றை எடுத்துக்கொள்ளலாம். இவை மனிதர்களுடன் இணைந்து வேலை செய்ய வேண்டியிருப்பதால், அவற்றின் செயல்பாடு நம்பகமானதாக இருக்க வேண்டும். ஒரு சிறிய மென்பொருள் பிழைகூட விபத்தையோ பொருள் சேதத்தையோ ஏற்படுத்தக்கூடும். வாகனங்களுக்கான பாதுகாப்பான மென்பொருளை உருவாக்கிய அனுபவம், இந்தத் துறையில் BlackBerry-க்கு உதவக்கூடும் என நிறுவனம் கருதுகிறது.
இந்த வளர்ச்சியில் என்விடியா நிறுவனத்துடனான கூட்டணியும் முக்கியமானதாக உள்ளது. ஆரம்பத்தில் வாகனத் தொழில்நுட்பத்தை மையமாகக் கொண்டு தொடங்கிய இந்தக் கூட்டணி, தற்போது தொழிற்சாலைத் தானியங்கி வசதிகள் மற்றும் ரோபோக்கள் வரையிலும் விரிவடைந்துள்ளது. என்விடியா தனது ஹேலோஸ் பாதுகாப்புத் தொழில்நுட்பத் தொகுப்பில் க்யூஎன்எக்ஸ் மென்பொருளைத் தேர்வு செய்துள்ளதாக ஜான் ஜியாமட்டியோ தெரிவித்துள்ளார். இதன் மூலம் தானாக நகரும் ரோபோக்கள், ஓட்டுநர் இல்லாத சரக்குத் தூக்கிகள் மற்றும் கிடங்குகளில் பயன்படுத்தப்படும் இயந்திரங்கள் போன்றவற்றில் BlackBerry-யின் மென்பொருளைப் பயன்படுத்துவதற்கான வாய்ப்புகள் அதிகரித்துள்ளன.
நிறுவனத்தின் வர்த்தக வளர்ச்சியிலும் இதன் தாக்கம் தெரிகிறது. க்யூஎன்எக்ஸ் பிரிவுக்கான ராயல்டி வருவாய் ஒப்பந்தங்களின் நிலுவை மதிப்பு 120 கோடி டாலரைத் தாண்டியுள்ளது. இரண்டு காலாண்டுகளில் மட்டும் இந்த மதிப்பு 25 கோடி டாலருக்கும் அதிகமாக உயர்ந்துள்ளதாகத் தெரிவிக்கப்பட்டுள்ளது. மேலும், 2026ஆம் ஆண்டில் BlackBerry நிறுவனத்தின் பங்குச் சந்தை மதிப்பும் கணிசமாக உயர்ந்துள்ளது. பல ஆண்டுகளுக்கு முன்பு ஸ்மார்ட்போன் சந்தையில் தனது இடத்தை இழந்த நிறுவனம், இப்போது வாகன மென்பொருள் மற்றும் ரோபோ தொழில்நுட்பத்தின் மூலம் மீண்டும் வளர்ச்சியை நோக்கி நகர்கிறது.
ஒரு காலத்தில் மொபைல் போன்களால் உலகம் முழுவதும் பிரபலமான BlackBerry, இன்று பலரது கைகளில் இல்லாவிட்டாலும், அவர்கள் பயணம் செய்யும் கார்களிலும் பொருட்கள் கையாளப்படும் கிடங்குகளிலும் பயன்படுத்தப்படும் தொழில்நுட்பத்தின் பின்னணியில் செயல்பட்டு வருகிறது. இனிவரும் ஆண்டுகளில் ஏஐ ரோபோக்களின் பயன்பாடு அதிகரித்தால், அந்த வளர்ச்சியில் BlackBerry எந்த அளவுக்கு முக்கிய இடத்தைப் பிடிக்கிறது என்பது கவனிக்க வேண்டிய விஷயமாக இருக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்