பூமிக்கு அடுத்தபடியாக மனிதர்கள் வாழத் தகுதியான ஒரு இடம் இருக்கிறதென்றால் அது செவ்வாய் கிரகம் தான். பல ஆண்டுகளாக விண்வெளி ஆராய்ச்சியாளர்கள் செவ்வாய் கிரகத்தில் உயிர் வாழ முடியுமா என்ற ஆய்வை மேற்கொண்டு வருகிறார்கள். செவ்வாய் கிரகம் பார்ப்பதற்குச் சிவப்பாக இருந்தாலும், அதன் தட்பவெப்பநிலை மற்றும் தரைப்பகுதி ஓரளவிற்குப் பூமியை ஒத்து இருக்கிறது. ஆனால், அங்கு சுவாசிக்க ஆக்ஸிஜன் கிடையாது, வளிமண்டலம் மிகவும் மெல்லியது மற்றும் கடும் குளிர் நிலவுகிறது. இவ்வளவு சவால்கள் இருந்தாலும், எலான் மஸ்க் போன்ற கோடீஸ்வரர்கள் மனிதர்களைச் செவ்வாய் கிரகத்திற்குக் கொண்டு செல்வதை ஒரு லட்சியமாக வைத்துள்ளனர். அவருடைய 'ஸ்பேஸ் எக்ஸ்' (SpaceX) நிறுவனம் இதற்காகவே 'ஸ்டார்ஷிப்' (Starship) என்ற பிரம்மாண்டமான விண்கலத்தைத் தயாரித்து வருகிறது.
எலான் மஸ்க்கின் திட்டம் என்னவென்றால், வரும் 2050 ஆம் ஆண்டிற்குள் சுமார் 10 லட்சம் மனிதர்களைச் செவ்வாய் கிரகத்திற்குக் கொண்டு சென்று ஒரு நகரத்தையே உருவாக்குவதுதான். இது பார்ப்பதற்கு ஒரு அறிவியல் புனைக்கதை போலத் தோன்றலாம், ஆனால் அவர் இதற்காகத் தீவிரமாக உழைத்து வருகிறார். செவ்வாய் கிரகத்தில் ஒருமுறை சென்றுவிட்டால் மீண்டும் பூமிக்குத் திரும்புவது என்பது மிகவும் கடினம். அங்கேயே தண்ணீரைத் தயாரிப்பது, ஆக்ஸிஜனை உருவாக்குவது மற்றும் விவசாயம் செய்வது எப்படி என்பது குறித்த ஆராய்ச்சிகள் நடந்து வருகின்றன. செவ்வாய் கிரகத்தின் துருவப் பகுதிகளில் பனிக்கட்டி வடிவில் தண்ணீர் இருப்பதாகக் கண்டறியப்பட்டுள்ளது. அந்தப் பனியை உருக்கினால் மனிதர்களுக்குத் தேவையான தண்ணீர் கிடைக்கும் என்பது ஆராய்ச்சியாளர்களின் நம்பிக்கை.
செவ்வாய் கிரகத்தில் மனிதர்கள் வாழ்வதற்கு 'டெர்ராஃபார்மிங்' (Terraforming) என்ற ஒரு தொழில்நுட்பத்தைச் செய்ய வேண்டி இருக்கும். அதாவது செவ்வாய் கிரகத்தின் சுற்றுச்சூழலைச் செயற்கையாகப் பூமி போல மாற்றுவது. அங்குள்ள வெப்பநிலையை உயர்த்தி, வளிமண்டலத்தை அடர்த்தியாக்கினால் மனிதர்கள் கவச உடைகள் இல்லாமல் உலவ முடியும். ஆனால் இதற்குப் பல்லாயிரம் ஆண்டுகள் கூட ஆகலாம். இப்போதைக்குச் செவ்வாய் கிரகப் பயணம் என்பது ஒரு சாகசப் பயணம் போலத்தான் இருக்கும். ஒருவேளை பூமியில் ஏதேனும் பெரிய விண்கல் மோதினாலோ அல்லது அணுப்போரினால் பூமி அழிந்தாலோ, மனித இனம் அழியாமல் இருக்கச் செவ்வாய் கிரகம் ஒரு 'பேக்-அப்' (Back-up) இடமாகச் செயல்படும் என்று மஸ்க் கருதுகிறார். இது மனித நாகரிகத்தின் அடுத்த கட்டப் பாய்ச்சலாக இருக்கும் என்பதில் சந்தேகமில்லை.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.