செயற்கை நுண்ணறிவு வளர்ச்சி வேகமாக அதிகரித்து வரும் நிலையில், அதற்குத் தேவையான கணினி சக்தியும் மிகப்பெரிய அளவில் தேவைப்படுகிறது. இதற்காக உலகம் முழுவதும் புதிய Data Center எனப்படும் தரவு மையங்கள் உருவாக்கப்பட்டு வருகின்றன. ஆனால் இத்தகைய மையங்களை அமைப்பதில் மின்சாரம், நிலம் மற்றும் குளிரூட்டுவதற்கான தண்ணீர் ஆகியவை முக்கிய சவால்களாக உள்ளன. இந்த பிரச்சினைகளுக்கு வித்தியாசமான தீர்வை முன்வைக்கும் வகையில் சீனா கடலுக்குள் ஆயிரக்கணக்கான சர்வர்களை நிறுவி புதிய தரவு மையத்தை செயல்பாட்டுக்கு கொண்டு வந்துள்ளது. ஷாங்காய் நகருக்கு அருகே கடலுக்குள் அமைக்கப்பட்டுள்ள இந்த புதிய தரவு மையத்தில் சுமார் 2,000 சர்வர்கள் உள்ளன. சீனாவின் லிங்காங் சிறப்பு பகுதியில் இருந்து கடலுக்குள் 10 கிலோமீட்டருக்கும் அதிகமான தொலைவில் இந்த அமைப்பு நிறுவப்பட்டுள்ளது. கடல் மட்டத்திலிருந்து சுமார் 10 மீட்டர் ஆழத்தில் சர்வர்கள் வைக்கப்பட்டுள்ளன. வழக்கமான கட்டிடத்தில் அமைக்கப்படும் Data Center போல இல்லாமல், கடலுக்கு அடியில் பாதுகாப்பான தொகுதிகளுக்குள் கணினிகள் வைக்கப்பட்டிருப்பது இதன் முக்கிய சிறப்பாகும்.
இந்த திட்டத்தை HiCloud Technology நிறுவனம், சீன அரசுக்கு சொந்தமான China Communications Construction நிறுவனத்துடன் இணைந்து உருவாக்கியுள்ளது. இதற்காக சுமார் 1.6 பில்லியன் யுவான் முதலீடு செய்யப்பட்டுள்ளதாக தகவல்கள் தெரிவிக்கின்றன. இந்திய மதிப்பில் இது சுமார் ரூ.2,100 கோடிக்கு சமமாகும். கட்டுமானப் பணிகள் 2025ஆம் ஆண்டு அக்டோபரில் நிறைவடைந்த நிலையில், 2026 பிப்ரவரியில் சோதனை நடவடிக்கைகள் தொடங்கப்பட்டன. அதன் பின்னர் மே மாதத்தில் இந்த கடலுக்கடிப் தரவு மையம் வணிக ரீதியாக செயல்படத் தொடங்கியுள்ளது. இந்த தரவு மையத்தின் மொத்த மின்சார திறன் 24 மெகாவாட் என தெரிவிக்கப்பட்டுள்ளது. மேலும், இது அருகில் உள்ள கடலில் அமைக்கப்பட்டுள்ள காற்றாலை மின் நிலையத்துடன் நேரடியாக இணைக்கப்பட்டுள்ளது. அதாவது, கடலுக்குள் இருக்கும் சர்வர்களுக்கு தேவையான மின்சாரத்தை புதுப்பிக்கத்தக்க எரிசக்தி மூலம் வழங்கும் முயற்சியும் இதில் இடம்பெற்றுள்ளது.
இந்த திட்டத்தின் மிக முக்கியமான அம்சம் அதன் குளிரூட்டும் முறையாகும். Data Centerகளில் ஆயிரக்கணக்கான கணினிகள் தொடர்ந்து இயங்குவதால் அதிக வெப்பம் உருவாகும். அந்த வெப்பத்தை குறைக்க நிலத்தில் அமைக்கப்படும் தரவு மையங்களில் பெரிய அளவில் குளிரூட்டும் இயந்திரங்கள் பயன்படுத்தப்படுகின்றன. இதற்கு அதிக மின்சாரமும் தண்ணீரும் தேவைப்படலாம். ஆனால் கடலுக்குள் அமைக்கப்பட்டுள்ள தரவு மையத்திற்கு சுற்றிலும் இயற்கையாகவே கடல் நீர் உள்ளது. இதனால் கடல் நீரின் குளிர்ச்சியை பயன்படுத்தி சர்வர்களில் உருவாகும் வெப்பத்தை வெளியேற்ற முடியும். இதன் மூலம் தனியாக பெரிய குளிரூட்டும் அமைப்புகளை இயக்க வேண்டிய தேவை குறைகிறது. அதே நேரத்தில், குளிரூட்டுவதற்காக அதிக அளவில் புதிய தண்ணீரை பயன்படுத்த வேண்டிய அவசியமும் இல்லை. இந்த காரணத்தால் மின்சார செலவையும் தண்ணீர் பயன்பாட்டையும் குறைக்க முடியும் என்று திட்டத்தை உருவாக்கியவர்கள் தெரிவிக்கின்றனர்.
மேலும், இந்த கடலுக்கடித் தரவு மையத்தில் செயற்கை நுண்ணறிவு பணிகளுக்காக GPU clusters பயன்படுத்தப்படுகின்றன. AI மாடல்களை உருவாக்கவும், அவற்றுக்கு பயிற்சி அளிக்கவும் மிக அதிக கணினி சக்தி தேவைப்படும் நிலையில், கடலுக்கடியில் அமைக்கப்பட்டுள்ள இந்த கட்டமைப்பு அந்த தேவையை பூர்த்தி செய்யும் நோக்கத்துடன் பயன்படுத்தப்படுகிறது. சீனா இப்போது மேற்கொண்டுள்ள இந்த முயற்சி முற்றிலும் புதிய யோசனை அல்ல. இதற்கு முன்பே மைக்ரோசாப்ட் இதே போன்ற பரிசோதனையை மேற்கொண்டிருந்தது. Project Natick என்ற பெயரில் மைக்ரோசாப்ட் நிறுவனம் 2018ஆம் ஆண்டு ஸ்காட்லாந்தின் Orkney தீவுகளுக்கு அருகே கடலுக்கடியில் ஒரு பெரிய உலோக உருளை வடிவ தரவு மையத்தை நிறுவியது. அதில் நூற்றுக்கணக்கான சர்வர்கள் வைக்கப்பட்டிருந்தன.
அந்த பரிசோதனையின் நோக்கம், தரவு மையங்களை கடலுக்குள் அமைத்தால் அவற்றை நம்பகமாக இயக்க முடியுமா என்பதையும், இயற்கையான கடல் நீரை குளிரூட்டுவதற்கு பயன்படுத்த முடியுமா என்பதையும் ஆய்வு செய்வதாகும். சுமார் இரண்டு ஆண்டுகள் அந்த அமைப்பு கடலுக்கடியில் செயல்பட்டது. பின்னர் 2020ஆம் ஆண்டு அது மீண்டும் கடலிலிருந்து மேலே கொண்டு வரப்பட்டது. மைக்ரோசாப்ட் பரிசோதனையில் கிடைத்த முடிவுகள் குறிப்பிடத்தக்கதாக இருந்தன. கடலுக்கடியில் வைக்கப்பட்ட சர்வர்களின் செயலிழப்பு விகிதம், நிலத்தில் பயன்படுத்தப்பட்ட அதே வகை சர்வர்களுடன் ஒப்பிடும்போது எட்டு மடங்கு குறைவாக இருந்ததாக நிறுவனம் தெரிவித்தது. கடலுக்கடியில் இருந்த மூடப்பட்ட சூழலில் தூசி, ஈரப்பதம் மற்றும் மனிதர்கள் நேரடியாக அணுகுவது போன்ற சில பிரச்சினைகள் இல்லாததால் சர்வர்களின் செயல்பாடு சிறப்பாக இருந்திருக்கலாம் என்று ஆய்வுகள் சுட்டிக்காட்டின.
ஆனால் நல்ல முடிவுகள் கிடைத்தபோதிலும், மைக்ரோசாப்ட் Project Natick திட்டத்தை தொடர்ந்து வணிக ரீதியாக முன்னெடுக்கவில்லை. 2024ஆம் ஆண்டில் இந்த திட்டம் இனி செயல்பாட்டில் இல்லை என்பதை நிறுவனம் உறுதி செய்தது. இதற்கிடையே, சீனா அதே அடிப்படை யோசனையை பெரிய அளவில் செயல்படுத்தி வருகிறது. மைக்ரோசாப்ட் பரிசோதனையில் நூற்றுக்கணக்கான சர்வர்கள் பயன்படுத்தப்பட்ட நிலையில், சீனாவின் புதிய திட்டத்தில் சுமார் 2,000 சர்வர்கள் இடம்பெற்றுள்ளன. இந்த முயற்சியின் பின்னணியில் AI வளர்ச்சியும் முக்கிய காரணமாக பார்க்கப்படுகிறது. ChatGPT போன்ற AI சேவைகள் முதல் பெரிய AI மாடல்களுக்கான பயிற்சி வரை, உலகம் முழுவதும் அதிகமான கணினி வளங்கள் தேவைப்படுகின்றன. இதனால் எதிர்காலத்தில் Data Centerகளின் எண்ணிக்கையும் திறனும் மேலும் அதிகரிக்க வேண்டிய சூழல் உருவாகியுள்ளது.
அதே நேரத்தில், புதிய தரவு மையங்களை அமைப்பதற்கு நிலம் கிடைப்பது, அதிக மின்சாரம் பெறுவது, தண்ணீர் பயன்பாட்டை நிர்வகிப்பது போன்ற பிரச்சினைகள் தொடர்ந்து உள்ளன. கடலுக்கடியில் தரவு மையங்களை அமைப்பது இந்த சவால்களில் சிலவற்றுக்கு மாற்று வழியை வழங்கக்கூடும். குறிப்பாக கடல் நீரை குளிரூட்டலுக்கு பயன்படுத்துவதால் தண்ணீர் பயன்பாட்டை குறைக்க முடியும் என்பதும், கடலோர காற்றாலை மின்சாரத்தை நேரடியாக பயன்படுத்த முடியும் என்பதும் இந்த முயற்சியின் முக்கிய அம்சங்களாக உள்ளன. இருப்பினும், கடலுக்குள் தரவு மையங்களை அமைப்பதில் சவால்களும் இல்லாமல் இல்லை. பழுதான சர்வர்களை சரிசெய்வது அல்லது மாற்றுவது நிலத்தில் உள்ள Data Centerகளை விட சிக்கலானதாக இருக்கலாம். கடலுக்கு அடியில் உள்ள கருவிகளை ஆய்வு செய்வதற்கும் பராமரிப்பதற்கும் சிறப்பு உபகரணங்கள் தேவைப்படும். கடல் சூழலில் நீண்ட காலத்திற்கு மின்னணு சாதனங்கள் எவ்வாறு செயல்படும் என்பதும் தொடர்ந்து ஆய்வு செய்ய வேண்டிய விஷயமாகும்.
சுற்றுச்சூழல் தாக்கமும் கவனிக்க வேண்டிய மற்றொரு அம்சமாக உள்ளது. சர்வர்களிலிருந்து வெளியேறும் வெப்பம் சுற்றியுள்ள கடல் நீரில் மாற்றத்தை ஏற்படுத்துமா என்பது குறித்தும் ஆய்வுகள் அவசியம். இதுவரை கிடைத்த தகவல்களின்படி, வெப்பத்தின் தாக்கம் குறிப்பிட்ட சிறிய பகுதிக்குள் மட்டுமே இருக்கும் என்று கடல் உயிரியல் நிபுணர்கள் தெரிவித்துள்ளனர். மைக்ரோசாப்ட் பரிசோதனையாக தொடங்கிய கடலுக்கடித் தரவு மைய யோசனை தற்போது சீனாவில் வணிக பயன்பாட்டை நோக்கி நகர்ந்துள்ளது. AI தொழில்நுட்பத்திற்கான கணினி தேவைகள் தொடர்ந்து அதிகரித்து வரும் நிலையில், எதிர்கால Data Centerகள் நிலத்தில் மட்டுமல்லாமல் கடலுக்கடியிலும் உருவாகுமா என்ற கேள்விக்கு இந்த திட்டம் முக்கியமான தொடக்கமாக அமைந்துள்ளது. தொழில்நுட்ப வளர்ச்சி எந்த அளவுக்கு புதிய இடங்களையும் புதிய வழிகளையும் தேடி செல்கிறது என்பதற்கான மற்றொரு உதாரணமாக சீனாவின் இந்த கடலுக்கடித் தரவு மையம் பார்க்கப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.