இந்தியாவில் பண்டிகைக் காலங்களில் விமானப் பயணம் செய்வது நடுத்தரக் குடும்பங்களுக்கு எட்டாக்கனியாக மாறி வருகிறதா என்ற கேள்வி எழுந்துள்ளது. தீபாவளி உள்ளிட்ட பண்டிகைகளை முன்னிட்டு விமான டிக்கெட் கட்டணம் வழக்கமான விலையைவிட ஏழு மடங்கு வரை உயர்ந்துள்ளதாக உச்சநீதிமன்றத்தில் புகார் தெரிவிக்கப்பட்டுள்ளது. இதுதொடர்பாக அவசர விசாரணை நடத்த வேண்டும் என்ற கோரிக்கைக்கு நீதிபதி தெரிவித்த, “விமானத்தில் பயணம் செய்ய வேண்டாம்” என்ற கருத்து தற்போது பெரும் விவாதத்தை ஏற்படுத்தியுள்ளது. அதேநேரத்தில், விமானக் கட்டணத்தை முறைப்படுத்த அரசு நடவடிக்கை எடுக்க வேண்டும் என்ற கோரிக்கையும் வலுப்பெற்றுள்ளது.
நவம்பர் 2ஆம் தேதி உச்சநீதிமன்றத்தில் இந்த விவகாரம் அவசரமாக முன்வைக்கப்பட்டது. நீதிபதிகள் விக்ரம் நாத், சந்தீப் மேத்தா, அபரேஷ் சிங் ஆகியோர் அடங்கிய அமர்வு முன்பு ஆஜரான வழக்கறிஞர், பண்டிகைக் காலத்தில் விமானக் கட்டணம் 700 சதவீதம் வரை உயர்ந்துள்ளதாகத் தெரிவித்தார். இதைக் கேட்ட நீதிபதி விக்ரம் நாத், “விமானத்தில் பயணம் செய்ய வேண்டாம்” என்று பதிலளித்தார். அதற்கு வழக்கறிஞர், விமானப் பயணம் பலருக்கு அத்தியாவசியமானதாக மாறிவிட்டதாகவும், இத்தகைய கட்டண உயர்வு அரசியலமைப்புச் சட்டத்தின் 14ஆவது பிரிவுக்கு எதிரானது என்றும் வாதிட்டார். இருப்பினும், இந்த மனுவை அவசரமாக விசாரிக்க நீதிமன்றம் ஒப்புக்கொள்ளவில்லை.
இந்தக் கட்டண உயர்வு தொடர்பாக சமூக ஆர்வலர் எஸ். லட்சுமிநாராயணன் ஏற்கெனவே பொதுநல மனு ஒன்றைத் தாக்கல் செய்துள்ளார். விமான நிறுவனங்கள் பயணிகளின் தேவையை அடிப்படையாகக் கொண்டு டிக்கெட் விலையைத் திடீரென உயர்த்தும் முறைக்கு வெளிப்படையான விதிமுறைகள் தேவை என்பதே அவரது முக்கியக் கோரிக்கையாகும். குறிப்பாக, பண்டிகைக் காலங்களில் சொந்த ஊர்களுக்குச் செல்ல விரும்பும் மக்கள் அதிகக் கட்டணம் செலுத்த வேண்டிய கட்டாயம் ஏற்படுவதைத் தடுக்க வேண்டும் என்று அவர் வலியுறுத்தியுள்ளார்.
மனுவில் குறிப்பிடப்பட்டுள்ள சில கட்டண விவரங்கள் அதிர்ச்சியளிக்கின்றன. டெல்லியிலிருந்து கொல்கத்தாவுக்குச் செல்ல வழக்கமாக ரூ.10,000 முதல் ரூ.11,000 வரை இருக்கும் விமான டிக்கெட், நவம்பர் 6ஆம் தேதி பயணத்திற்கு ரூ.78,694 வரை உயர்ந்துள்ளதாகக் கூறப்பட்டுள்ளது. அதேபோல், பெங்களூருவிலிருந்து டெல்லிக்குச் செல்லும் விமானத்தில் காலை 5 மணிக்கான டிக்கெட் சுமார் ரூ.15,901 ஆக இருந்த நிலையில், அதே நாளில் பிற்பகல் 3.45 மணிக்கான டிக்கெட் ரூ.40,506 வரை விற்பனை செய்யப்பட்டதாக மனுவில் தெரிவிக்கப்பட்டுள்ளது.
மும்பை - டெல்லி வழித்தடத்தில் வழக்கமாக ரூ.11,531 ஆக இருந்த கட்டணம் ரூ.60,577 ஆகவும், டெல்லி - மும்பை வழித்தடத்தில் ரூ.5,223 ஆக இருந்த கட்டணம் ரூ.26,793 ஆகவும் உயர்ந்துள்ளதாக மனுதாரர் சுட்டிக்காட்டியுள்ளார். ஒரே வழித்தடத்தில் ஒரே நாளில் இயக்கப்படும் விமானங்களுக்கு ஏன் இவ்வளவு பெரிய கட்டண வேறுபாடு இருக்க வேண்டும் என்பதுதான் அவரது கேள்வி.
விமான நிறுவனங்கள் பொதுவாக விமான எரிபொருளான ஏவியேஷன் டர்பைன் ஃபியூல் (ATF) விலை உயர்வு மற்றும் இயக்கச் செலவுகளை டிக்கெட் கட்டண உயர்வுக்கான காரணங்களாகக் கூறுகின்றன. ஆனால், ஒரே நாளில் ஒரே வழித்தடத்தில் இயக்கப்படும் விமானங்களின் எரிபொருள் செலவில் பெரிய வேறுபாடு இருக்காது என்பதால், ஏழு மடங்கு கட்டண உயர்வை எரிபொருள் விலை உயர்வால் மட்டும் நியாயப்படுத்த முடியாது என்று மனுதாரர் வாதிட்டுள்ளார். பயணிகளின் தேவை அதிகரிக்கும்போது கணினி மூலம் தானாகவே டிக்கெட் விலையை உயர்த்தும் Dynamic Pricing முறையில் வெளிப்படைத்தன்மை இருக்க வேண்டும் என்றும் கோரியுள்ளார்.
உள்நாட்டு விமானங்களில் இலவசமாகக் கொண்டு செல்ல அனுமதிக்கப்பட்ட செக்-இன் பயணப்பொதி அளவு 25 கிலோவிலிருந்து 15 கிலோவாகக் குறைக்கப்பட்டுள்ளதையும் மனுவில் சுட்டிக்காட்டியுள்ளார். பண்டிகைக் காலங்களில் சொந்த ஊர்களுக்குச் செல்லும் மக்கள் பரிசுப் பொருட்கள் உள்ளிட்டவற்றை எடுத்துச் செல்ல வேண்டியிருப்பதால், கூடுதல் எடைக்காகத் தனியாகப் பணம் செலுத்த வேண்டிய நிலை ஏற்படுகிறது. எனவே, இலவசப் பயணப்பொதி அளவை மீண்டும் 25 கிலோவாக உயர்த்த வேண்டும் என்றும் கோரப்பட்டுள்ளது.
இந்த விவகாரம் தொடர்பாக உச்சநீதிமன்றம் ஏற்கெனவே பலமுறை கவலை தெரிவித்துள்ளது. கடந்த ஜனவரி மாத விசாரணையின்போது, பண்டிகைக் காலங்களில் விமானக் கட்டணம் அளவுக்கு அதிகமாக உயர்வது பயணிகளைப் பாதிப்பதாக நீதிபதிகள் குறிப்பிட்டிருந்தனர். மே மாத விசாரணையிலும், ஒரே வழித்தடத்தில் ஒரே நாளில் பயணம் செய்யும் பயணிகளிடம் வெவ்வேறு நிறுவனங்கள் மிகப்பெரிய கட்டண வேறுபாட்டைக் காட்டுவது குறித்து நீதிமன்றம் கேள்வி எழுப்பியது.
விமானப் போக்குவரத்துத் துறையை ஒழுங்குபடுத்தும் வகையில் 'பாரதிய வாயுயான் நியமங்கள் 2026' என்ற புதிய விதிமுறைகளை மத்திய அரசு நவம்பர் 1ஆம் தேதி அறிவித்துள்ளது. இந்த விதிகள் 2027 ஜனவரி 1ஆம் தேதி முதல் அமலுக்கு வரவுள்ளன. அசாதாரணமான சூழ்நிலைகளில் பொதுமக்களின் நலனைக் கருத்தில் கொண்டு விமானக் கட்டண விவகாரத்தில் அரசு தலையிடுவதற்கும் இந்த விதிமுறைகள் வழிவகுக்கின்றன. இந்த வழக்கின் அடுத்தகட்ட விசாரணை நவம்பர் 16ஆம் தேதி நடைபெற உள்ளது. அப்போது மத்திய அரசும் விமானப் போக்குவரத்து இயக்குநரகமும் (DGCA) புதிய விதிமுறைகள் தொடர்பாக விளக்கம் அளிக்க வேண்டியுள்ளது.
பண்டிகைக் காலங்களில் ரயில் டிக்கெட்டுகள் கிடைக்காமல் அவசரமாகப் பயணம் செய்ய வேண்டியவர்கள் விமானத்தை நாடுகின்றனர். இத்தகைய சூழலில் கட்டணம் பல மடங்கு உயர்வது சாதாரண மக்களுக்குப் பெரும் சுமையாக அமைகிறது. விமான நிறுவனங்களின் வர்த்தக சுதந்திரத்தையும் பயணிகளின் நலனையும் சமநிலைப்படுத்தும் வகையில் அரசு என்ன நடவடிக்கை எடுக்கப் போகிறது என்பதே தற்போது அனைவரின் எதிர்பார்ப்பாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.