சாலையில் பயணம் செய்யும்போது Toll கட்டணம் செலுத்துவது அன்றாட விஷயமாகிவிட்டது. FASTag, UPI, Wallet போன்ற டிஜிட்டல் முறைகள் வந்த பிறகு கட்டணம் செலுத்துவது இன்னும் எளிதாகிவிட்டது. ஆனால் பணம் செலுத்திய பிறகும் அதே கட்டணம் மீண்டும் வசூலிக்கப்பட்டால் என்ன செய்வது? அப்படியொரு சம்பவத்தில், கூடுதலாக வசூலிக்கப்பட்ட தொகையைத் திரும்பப் பெற முடியாமல் நீண்ட போராட்டம் நடத்திய ஒருவருக்கு தற்போது நுகர்வோர் ஆணையம் மூலம் நிவாரணம் கிடைத்துள்ளது.
இந்த சம்பவம் 2023-ம் ஆண்டு ஜூன் மாதம் நடந்தது. ஒருவர் தனது குடும்பத்தினருடன் காரில் பயணம் செய்துகொண்டிருந்தபோது Toll Plaza ஒன்றை கடக்க முயன்றார். அப்போது Toll பணியாளர், அவரது Paytm Wallet-ல் போதுமான பணம் இல்லை என்று தெரிவித்ததாக கூறப்படுகிறது. ஆனால் தன்னுடைய Wallet-ல் போதுமான தொகை இருப்பதாக அவர் தெரிவித்திருந்தார். இருந்தபோதிலும், வழக்கமான ₹65 கட்டணத்திற்கு பதிலாக ₹130 வசூலிக்கப்பட்டதாக புகார் அளிக்கப்பட்டது.
அதன்பிறகு நடந்ததுதான் முக்கியமான திருப்பமாக அமைந்தது. Toll Plaza-வில் ₹130 வசூலிக்கப்பட்டு சுமார் ஐந்து நிமிடங்களுக்குப் பிறகு, அவரது Paytm Wallet-லிருந்து மேலும் ₹65 கழிக்கப்பட்டதாக அவருக்கு தகவல் வந்தது. இதனால் ஒரே Toll கட்டணத்திற்காக இரண்டு முறை பணம் செலுத்திய நிலை ஏற்பட்டது. உடனே அவர் Toll Plaza ஊழியர்களிடம் சென்று கூடுதலாக கழிக்கப்பட்ட ₹65-ஐ திரும்பக் கேட்டதாக கூறப்படுகிறது.
ஆனால் பணத்தை திருப்பித் தர மறுத்ததுடன், ஊழியர்கள் தன்னிடம் முறையாக நடந்து கொள்ளவில்லை என்றும் அவர் புகார் தெரிவித்தார். பிரச்சினை அங்கேயே முடிந்துவிடவில்லை. பணத்தைத் திரும்பப் பெற முடியாததால், சம்பந்தப்பட்ட Toll Plaza மற்றும் அதனுடன் தொடர்புடைய கட்டுமான நிறுவனத்துக்கு அவர் சட்ட நோட்டீஸ் அனுப்பினார். அதிலும் எதிர்பார்த்த தீர்வு கிடைக்காததால், இறுதியாக நுகர்வோர் ஆணையத்தை அணுகினார். ஒரே கட்டணத்தை இரண்டு முறை வசூலித்தது சேவையில் குறைபாடு என்றும், கூடுதலாக வசூலிக்கப்பட்ட தொகையைத் திருப்பித் தர மறுத்தது நியாயமற்ற நடைமுறை என்றும் அவர் தனது புகாரில் குறிப்பிட்டிருந்தார்.
இந்த வழக்கு ஹரியானா மாநிலத்தில் உள்ள Panipat District Consumer Disputes Redressal Commission முன் விசாரணைக்கு வந்தது. சம்பந்தப்பட்ட நபர் தனது புகாரை நிரூபிக்க Paytm பணப் பரிவர்த்தனை விவரம், Toll ரசீது உள்ளிட்ட ஆவணங்களை சமர்ப்பித்திருந்தார். அந்த ஆவணங்களில் ₹65 Toll கட்டணம் தொடர்பான தொகை குறுகிய இடைவெளியில் இரண்டு முறை செலுத்தப்பட்டிருப்பது தெரியவந்ததாக ஆணையம் குறிப்பிட்டது.
மறுபுறம், Toll Plaza தரப்பில் FASTag சரியாக செயல்படவில்லை என்றும், வாகனத்தை Scan செய்தபோது Balance சரியாக காட்டப்படவில்லை என்றும் விளக்கம் அளிக்கப்பட்டது. அந்த பிரச்சினை காரணமாகவே அடுத்ததாக Toll கட்டணம் செலுத்தப்பட்டதாகவும் அவர்கள் தெரிவித்தனர். மேலும், வாடிக்கையாளர் பணத்தைத் திரும்பக் கோரியதாக கூறும் தகவலையும் அவர்கள் மறுத்தனர்.
ஆனால் இந்த விளக்கங்களை ஏற்க நுகர்வோர் ஆணையம் தயாராக இல்லை. வாடிக்கையாளர் தாக்கல் செய்த பணப் பரிவர்த்தனை ஆதாரங்களும் Toll ரசீதும் அவரது புகாருக்கு ஆதரவாக இருப்பதாக ஆணையம் கூறியது. அதே நேரத்தில், எதிர் தரப்பினர் தங்களது வாதத்தை நிரூபிக்கும் போதுமான ஆதாரங்களை சமர்ப்பிக்கவில்லை என்றும் ஆணையம் குறிப்பிட்டது. இதனால், கூடுதலாக வசூலிக்கப்பட்ட பணத்தைத் திருப்பித் தராமல் வைத்திருந்தது சேவையில் ஏற்பட்ட குறைபாடு எனத் தீர்மானிக்கப்பட்டது.
இதையடுத்து, அந்த நபருக்கு மொத்தம் ₹6,800 வழங்க வேண்டும் என்று ஆணையம் உத்தரவிட்டது. அதில் கூடுதலாக வசூலிக்கப்பட்ட ₹1,300 தொகையும், இழப்பீடு மற்றும் வழக்கு செலவுகளுக்காக ₹5,500-ம் அடங்கும். செப்டம்பர் 29 அன்று R K Dogra தலைமையிலான அமர்வு இந்த உத்தரவை பிறப்பித்தது.
இந்த வழக்கு வாகன ஓட்டிகளுக்கு ஒரு முக்கியமான விஷயத்தை நினைவூட்டுகிறது. Toll, FASTag, UPI அல்லது Wallet மூலம் பணம் செலுத்தும்போது, பரிவர்த்தனை குறுஞ்செய்தி, App-ல் இருக்கும் Payment History, Toll ரசீது போன்றவற்றை உடனடியாக சரிபார்ப்பது நல்லது. ஏதேனும் தவறான கழிப்பு ஏற்பட்டால், அதற்கான ஆதாரங்களை சேமித்து வைத்திருப்பது பின்னர் புகார் அளிக்கும்போது மிகவும் உதவியாக இருக்கும். குறிப்பாக டிஜிட்டல் பணப் பரிவர்த்தனைகள் அதிகரித்துள்ள நிலையில், பணம் செலுத்தியதற்கான மின்னணு ஆதாரங்கள் நுகர்வோர் புகார்களில் முக்கிய பங்கு வகிக்கின்றன. Toll கட்டணம் போன்ற சிறிய தொகையாக இருந்தாலும், தவறான வசூல் நடந்தால் அதை கேள்வி கேட்கும் உரிமை நுகர்வோருக்கு உள்ளது. தேவைப்பட்டால் மாநில நுகர்வோர் உதவி மையம் அல்லது தேசிய நுகர்வோர் உதவி எண் 1915 மூலமாகவும் உதவி பெறலாம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்