EPFO new rules 2026 
இந்தியா

வேலை இழந்தால் இனி 2 மாதங்களில் முழு PF பணத்தையும் எடுக்கலாம்! EPFO வெளியிட்ட முக்கிய அறிவிப்பு

ஒருவர் வேலையை இழந்து தொடர்ந்து இரண்டு மாதங்கள் வேலையில்லாமல் இருந்தால், தனது PF கணக்கில் உள்ள முழுத் தொகையையும் இறுதித் தீர்வாகப் பெறுவதற்கு விண்ணப்பிக்க முடியும்.

மாலை முரசு செய்தி குழு

கடந்த ஆண்டு அக்டோபர் மாதம் கொண்டுவரப்பட்ட மாற்றத்தின்படி, வேலையை இழந்தவர்கள் முழுமையாக PF பணத்தைப் பெறுவதற்கு 12 மாதங்கள் காத்திருக்க வேண்டியிருந்தது. இதனால் திடீரென வேலை இழக்கும் ஊழியர்கள் குடும்பச் செலவுகள், வீட்டு வாடகை, குழந்தைகளின் கல்வி மற்றும் மருத்துவச் செலவுகளைச் சமாளிப்பதில் சிரமங்களை எதிர்கொண்டனர். குறிப்பாக, வேலையை மாற்றும் இடைப்பட்ட காலத்தில் சேமிப்புப் பணத்தைப் பயன்படுத்த வேண்டியவர்களுக்கு இந்த விதிமுறை சுமையாக இருந்தது. தற்போது அந்தக் காத்திருப்பு காலத்தை மீண்டும் இரண்டு மாதங்களாகக் குறைக்க ஒப்புதல் அளிக்கப்பட்டுள்ளது.

ஒருவர் வேலையை இழந்து தொடர்ந்து இரண்டு மாதங்கள் வேலையில்லாமல் இருந்தால், தனது PF கணக்கில் உள்ள முழுத் தொகையையும் இறுதித் தீர்வாகப் பெறுவதற்கு விண்ணப்பிக்க முடியும். இதன் மூலம் வேலை இழந்த காலத்தில் பணத்தேவையைச் சமாளிக்க ஊழியர்களுக்கு உதவி கிடைக்கும். இருப்பினும், இந்த மாற்றம் தொடர்பான அதிகாரப்பூர்வ அறிவிப்பு மற்றும் நடைமுறைத் திருத்தங்கள் வெளியான பிறகே புதிய விதிமுறை அமலுக்கு வரும் என்பதை கவனத்தில் கொள்ள வேண்டும்.

மற்றொரு முக்கியமான மாற்றமாக, PF கணக்கில் குறைந்தபட்சம் வைத்திருக்க வேண்டிய தொகை 25 சதவீதத்திலிருந்து 10 சதவீதமாகக் குறைக்கப்பட்டுள்ளது. அதாவது, ஊழியர்கள் தங்களுடைய PF சேமிப்பில் அதிகமான தொகையைத் தேவைக்கேற்ப பயன்படுத்துவதற்கு வழி ஏற்படுகிறது. முன்பு 25 சதவீதத் தொகையை கணக்கில் வைத்திருக்க வேண்டிய கட்டுப்பாடு இருந்த நிலையில், தற்போது அந்த அளவு குறைக்கப்பட்டுள்ளது. இதனால் அவசரத் தேவைகளுக்காக PF பணத்தைப் பயன்படுத்த விரும்புவோருக்கு கூடுதல் வசதி கிடைக்கலாம்.

ஓய்வுபெறும் ஊழியர்களுக்கு உதவும் வகையில் புதிய முறையையும் EPFO அறிமுகப்படுத்தத் திட்டமிட்டுள்ளது. பொதுவாக, ஒருவர் ஓய்வுபெறும்போது தனது PF கணக்கில் உள்ள தொகையை மொத்தமாகப் பெற்றுக்கொள்வதே நடைமுறையாக உள்ளது. ஆனால், இனிமேல் விரும்பும் ஊழியர்கள் தங்களுடைய சேமிப்புத் தொகையை ஒரே முறையில் பெறாமல், குறிப்பிட்ட கால இடைவெளியில் தவணைகளாகப் பெற்றுக்கொள்ளும் வசதியைப் பயன்படுத்த முடியும்.

இந்தத் திட்டத்தில் பல்வேறு வாய்ப்புகள் பரிசீலிக்கப்பட்டுள்ளன. ஓய்வுபெறும் ஒருவர் தனது முழுச் சேமிப்பையும் குறிப்பிட்ட தவணைகளில் பெற்றுக்கொள்ளலாம். அல்லது ஒரு பகுதியை மட்டும் மொத்தமாகப் பெற்றுக்கொண்டு, மீதமுள்ள தொகையை மாதந்தோறும் அல்லது குறிப்பிட்ட கால இடைவெளியில் பெறலாம். மேலும், அசல் தொகையை அப்படியே வைத்திருந்து அதற்குக் கிடைக்கும் வட்டியை மட்டும் பெற்றுக்கொள்ளும் வாய்ப்பும் முன்மொழியப்பட்டுள்ளது.

இந்த முறையின் மற்றொரு சிறப்பு என்னவென்றால், கணக்கில் தொடர்ந்து இருக்கும் பணத்துக்கு நடைமுறையில் உள்ள EPF வட்டி விகிதத்தின்படி வட்டி கிடைக்கும். இதனால் ஓய்வுக்குப் பிறகும் சேமிப்புத் தொகையை முழுமையாகப் பயன்படுத்தாமல், அதிலிருந்து தொடர்ந்து வருமானம் பெற விரும்புவோருக்கு உதவியாக இருக்கும். மேலும், இந்தத் தவணைத் திட்டத்தில் இருக்கும் ஒருவர் எந்த நேரத்திலும் அதிலிருந்து வெளியேறி மீதமுள்ள தொகையை முழுமையாகப் பெற்றுக்கொள்ளவும் வழிவகை செய்யப்பட்டுள்ளது.

ஓய்வூதியதாரர் தவணைத் தொகையைப் பெற்றுக்கொண்டிருக்கும் காலத்தில் உயிரிழந்தால், மீதமுள்ள தொகையிலிருந்து அவரது மனைவி அல்லது நியமனதாரர் தொடர்ந்து பணத்தைப் பெறுவதற்கான வசதியும் முன்மொழியப்பட்டுள்ளது. 55 வயதுக்கு மேற்பட்டவர்களில், PF கணக்கில் ரூ.5 லட்சத்துக்கும் அதிகமாகச் சேமிப்பு வைத்திருக்கும் சுமார் 6.32 லட்சம் பேருக்கு இந்தப் புதிய தவணைத் திட்டம் பயனளிக்கலாம் எனக் கணிக்கப்பட்டுள்ளது.

திட்டம் நடைமுறைக்கு வருவதற்கு ஊழியர் வருங்கால வைப்பு நிதித் திட்டத்தில் தேவையான திருத்தங்கள் செய்யப்பட வேண்டும். அதற்குப் பிறகு சுமார் இரண்டு மாதங்களுக்குள் புதிய தவணை முறையை அமல்படுத்த எதிர்பார்க்கப்படுகிறது.

ஓய்வூதியத் தொகையை மொத்தமாகப் பெறுவதற்கான காத்திருப்பு காலத்தில் மாற்றம் இல்லை. இறுதி ஓய்வூதியத் தொகையைப் பெறுவதற்கான குறைந்தபட்சக் காத்திருப்பு காலம் 36 மாதங்களாகவே தொடரும். மேலும், ஊழியர்கள் தங்கள் நிறுவனத்தின் சம்பளப் பட்டியல் வழியாக மட்டுமின்றி, குறிப்பிட்ட டிஜிட்டல் வழிகளிலும் விருப்பத்தின் அடிப்படையில் PF கணக்கில் பணம் செலுத்தும் வசதியை உருவாக்குவது குறித்தும் ஆலோசிக்கப்பட்டுள்ளது.

பரிசுகள், டிப்ஸ் மற்றும் பிற சிறிய தொகைகளை UAN இணைக்கப்பட்ட PF கணக்குகளில் செலுத்துவதற்கான வாய்ப்பும் பரிசீலிக்கப்பட்டுள்ளது. இது கிக் தொழிலாளர்கள், தளங்களில் பணிபுரிபவர்கள், வீட்டு வேலை செய்பவர்கள் உள்ளிட்ட அமைப்புசாரா துறையினருக்கும் எதிர்காலத்தில் ஓய்வுக்கால சேமிப்பை உருவாக்க உதவக்கூடும். வேலை இழந்தவர்களுக்கு PF பணத்தைப் பெறுவதற்கான காத்திருப்பு காலத்தைக் குறைத்திருப்பதும், கணக்கில் வைத்திருக்க வேண்டிய குறைந்தபட்சத் தொகையை 10 சதவீதமாகக் குறைத்திருப்பதும் முக்கியமான மாற்றங்களாகப் பார்க்கப்படுகின்றன. அதே நேரத்தில், ஓய்வுக்குப் பிறகு சேமிப்பைத் தவணைகளாகப் பெறும் புதிய திட்டம் நடைமுறைக்கு வந்தால், ஊழியர்களின் ஓய்வுக்கால நிதி நிர்வாகத்திலும் குறிப்பிடத்தக்க மாற்றம் ஏற்படலாம்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.