நடப்பு கல்வியாண்டு முதல், இந்தி, உருது, அரபு உள்ளிட்ட மூன்றாம் மொழிப் பாடங்களுக்கு SSLC மாணவர்களுக்கு மதிப்பெண்கள் வழங்கப்படாது என கர்நாடக மாநில அரசு வெள்ளிக்கிழமை அறிவித்தது. அதற்குப் பதிலாக, இந்த மொழிகளுக்கு A, B, C மற்றும் D போன்ற தரங்கள் வழங்கபடும் என்று அம்மாநில அரசு அறிவித்துள்ளது.
கர்நாடகா மாநிலத்தில் மும்மொழி கொள்கை நடைமுறையில் இருந்து வந்தது. தற்போது அதனை அந்த அரசு ரத்து செய்துள்ளது. இந்த முடிவை அறிவித்த பள்ளிக் கல்வி மற்றும் எழுத்தறிவுத் துறை அமைச்சர் மது பங்காரப்பா, "மூன்றாவது மொழிக்குத் தேர்வு நடத்தப்படும், ஆனால் மதிப்பெண்கள் வழங்கப்படாது. மேலும், ஒட்டுமொத்த சதவீதத்தைக் கணக்கிடும்போது மூன்றாவது மொழிகளில் பெற்ற மதிப்பெண்கள் கருத்தில் கொள்ளப்படாது. தற்போதுள்ள 625-க்கு பதிலாக 525-க்கு சதவீதம் கணக்கிடப்படும், இந்த முடிவு SSLC தேர்வுகளுக்குத் தயாராகும் மாணவர்களுக்குப் பொருந்தும்" என்று அவர் கூறினார்.
இந்தி காரணமாக எஸ்.எஸ்.எல்.சி தேர்வுகளில் அதிக எண்ணிக்கையிலான மாணவர்கள் தோல்வியடைவதைக் கருத்தில் கொண்டு, மாணவர்கள் மீது இந்தி "திணிக்கப்படாமல்" இருப்பதை அரசு உறுதி செய்ய வேண்டும் என கன்னட ஆதரவு அமைப்புகள் விடுத்த கோரிக்கைகளின் அடிப்படையில் இந்த முடிவு எடுக்கப்பட்டதாக அமைச்சர் கூறினார். மேலும், மாநிலத்தில் உள்ள 96 சதவீதப் பள்ளிகள் இந்தியை மூன்றாவது மொழியாகக் கற்பிப்பதால், இந்த நடவடிக்கை இந்தி கற்கும் மாணவர்களைப் பெருமளவில் பாதிக்கும் என்று மது பங்காரப்பா கூறினார். கற்பித்தல் முறையில் எந்த மாற்றமும் இருக்காது என்று கல்வி அமைச்சர் மேலும் கூறினார். "மூன்றாவது மொழி புறக்கணிக்கப்படாது. இருப்பினும், இந்த முடிவு மாணவர்களின் தேர்வு அழுத்தத்தைக் குறைக்கும்," என்றும் அவர் குறிப்பிட்டார்.
கன்னட அமைப்புகளும் இந்த முடிவை வரவேற்றுள்ள நிலையில், பலர் அதனை விமர்சித்துள்ளனர். கன்னட மொழியின் மீதான ஆர்வத்தை உயர்வாக வைத்திருப்பதற்கான ஒரு முக்கிய நடவடிக்கை இது என்று கூறி, கன்னட அபிவிருத்தி ஆணையத்தின் தலைவர் புருஷோத்தம் பிலிமாலே இந்த முடிவை வரவேற்றார். "இந்த முடிவு, மாநிலக் கல்விக் கொள்கையில் முன்மொழியப்பட்ட இருமொழிக் கொள்கைக்குத் துணைபுரியும். மாணவர்களின் சுமையைக் குறைப்பதுடன், இது கன்னட மொழியின் வளர்ச்சியையும் ஊக்குவிக்கும்," என்று கூறிய அவர், கன்னடத்திற்கு ஆதரவான முடிவுகளைத் தொடர்ந்து எடுக்குமாறு மாநில அரசைக் கேட்டுக்கொண்டார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.