பெரிய நிறுவனங்களுக்கு அரசு தொடர்ந்து வரிச் சலுகைகளை வழங்க வேண்டுமா, அல்லது அந்தச் சலுகைகளுக்குப் பதிலாக நிறுவனங்கள் வேலைவாய்ப்புகளையும் ஊழியர்களின் சம்பளத்தையும் அதிகரிக்க வேண்டுமா? இந்தக் கேள்வியை மையமாகக் கொண்டு மத்திய அரசுக்கும் இந்தியாவின் முன்னணி நிறுவனங்களுக்கும் இடையே புதிய விவாதம் உருவாகியுள்ளது. சமீபத்தில் பிரதமர் நரேந்திர மோடி தொழில்துறையினரிடம் முன்வைத்த கடுமையான விமர்சனம், நிறுவனங்களின் மத்தியில் ஒருவித அதிர்ச்சியையும் கவலையையும் ஏற்படுத்தியுள்ளது. குறிப்பாக, அடுத்த பட்ஜெட்டில் வரிச் சலுகைகள் தொடர்பாக அரசு எத்தகைய முடிவை எடுக்கப்போகிறது என்ற எதிர்பார்ப்பு அதிகரித்துள்ளது.
டெல்லியில் நடைபெற்ற தொழில்துறை நிகழ்ச்சி ஒன்றில் பேசிய பிரதமர் மோடி, நாட்டின் வளர்ச்சிக்கு அரசு மட்டுமே பொறுப்பேற்க முடியாது என்றும், தனியார் நிறுவனங்களும் அதில் முக்கியப் பங்காற்ற வேண்டும் என்றும் வலியுறுத்தினார். அரசு வழங்கும் வரிச் சலுகைகள் மற்றும் பிற உதவிகளின் பலன் பொதுமக்களுக்கும் ஊழியர்களுக்கும் சென்றடைய வேண்டும் என்பதே அவரது பேச்சின் முக்கிய நோக்கமாக இருந்தது. வரிச் சலுகைகளைப் பெறுவதில் நிறுவனங்கள் காட்டும் ஆர்வம், வேலைவாய்ப்புகளை உருவாக்குவதிலும் ஊழியர்களின் வருமானத்தை உயர்த்துவதிலும் ஏன் போதுமான அளவில் வெளிப்படவில்லை என்ற கேள்வியையும் அவர் எழுப்பினார்.
நிறுவனங்களின் வரிச் சலுகைகளுக்கான கோரிக்கைகள் தொடர்ந்து அதிகரித்து வருவதாகவும், இந்தப் போக்கு மாற வேண்டும் என்றும் பிரதமர் கூறிய கருத்து தொழிலதிபர்கள் மத்தியில் பேசுபொருளாகியுள்ளது. நிகழ்ச்சியில் இருந்த பல நிறுவன நிர்வாகிகள், அப்போது இந்தக் கருத்தின் முழு தாக்கத்தையும் உணரவில்லை என்றும், பின்னர் அதன் முக்கியத்துவத்தைப் புரிந்துகொண்டதாகவும் கூறப்படுகிறது. அரசின் விமர்சனம் சாதாரணமான ஒன்றல்ல; வருங்காலத்தில் வரிச் சலுகைகள் கேட்டு அணுகும்போது அரசு முன்புபோல் சாதகமாக இருக்குமா என்ற கேள்வி தற்போது நிறுவனங்களிடம் எழுந்துள்ளது.
அடுத்த மத்திய பட்ஜெட்டுக்கான தயாரிப்புகள் தொடங்கவுள்ள நிலையில், இந்தக் கருத்து நிறுவனங்களுக்கு முக்கியமான எச்சரிக்கையாகப் பார்க்கப்படுகிறது. வரிச் சலுகைகள் தொடர்பாக அரசு இனி கடுமையான நிலைப்பாட்டை எடுக்கலாம் என்று சில தொழில்துறை நிர்வாகிகள் கருதுகின்றனர். இதனால், தங்களது நிறுவனங்களில் வேலைவாய்ப்புகள் எவ்வாறு அதிகரித்துள்ளன, ஊழியர்களின் சம்பளம் எந்த அளவுக்கு உயர்ந்துள்ளது என்பதற்கான புள்ளிவிவரங்களைத் தயாரிக்கத் தொழில் நிறுவனங்கள் திட்டமிட்டு வருகின்றன. அரசிடம் தங்களது பங்களிப்பை விளக்க வேண்டிய நிலை உருவாகலாம் என்பதே இதற்குக் காரணம்.
நிறுவனங்களின் தரப்பிலும் சில முக்கியமான விளக்கங்கள் முன்வைக்கப்படுகின்றன. கடந்த சில ஆண்டுகளாக எரிபொருள் விலை உயர்வு, உற்பத்திக்குத் தேவையான மூலப்பொருட்களின் செலவு அதிகரிப்பு, ரூபாயின் மதிப்பு பலவீனமடைந்தது போன்ற காரணிகள் நிறுவனங்களின் செயல்பாடுகளைப் பாதித்ததாகத் தொழில்துறை நிர்வாகிகள் சுட்டிக்காட்டுகின்றனர். இத்தகைய சூழலில் நிறுவனங்களின் லாபம் மட்டுமின்றி, வேலைவாய்ப்புகள் மற்றும் சம்பள உயர்வுகளையும் தொடர்ந்து அதிகரிப்பது சவாலானதாக இருந்ததாக அவர்கள் கூறுகின்றனர்.
அரசு தரப்பிலும் தொழில் நிறுவனங்கள் எதிர்கொள்ளும் சிக்கல்கள் முழுமையாக மறுக்கப்படவில்லை. அதே நேரத்தில், நிறுவனங்கள் வளர்ச்சி அடைவதற்கும் சர்வதேச சந்தையில் போட்டியிடுவதற்கும் அரசு ஏற்கெனவே பல உதவிகளைச் செய்துள்ளதாக அதிகாரிகள் கருதுகின்றனர். நேரடி வருமான வரி விகிதங்களைக் குறைத்தது, சரக்கு மற்றும் சேவை வரி முறையில் மாற்றங்களைச் செய்தது, தொழில் தொடங்குவதற்கும் நடத்துவதற்கும் உள்ள நடைமுறைகளை எளிமைப்படுத்தியது எனப் பல நடவடிக்கைகள் எடுக்கப்பட்டுள்ளன. இந்த உதவிகளுக்குப் பதிலாக நிறுவனங்கள் இன்னும் அதிகமான வேலைவாய்ப்புகளை உருவாக்கியிருக்கலாம் என்பதே அரசின் தரப்பு வாதமாக உள்ளது.
இந்த விவாதத்தில் ஊழியர்களின் சம்பள உயர்வும் முக்கிய இடத்தைப் பிடித்துள்ளது. கொரோனா பெருந்தொற்றுக்குப் பிறகு பல குடும்பங்களின் உண்மையான வருமானம் எதிர்பார்த்த அளவுக்கு உயரவில்லை என்ற கவலை நிலவுகிறது. நிறுவனங்களின் லாபம் அதிகரித்தாலும், அந்த வளர்ச்சியின் பலன் ஊழியர்களின் கைகளுக்குச் செல்கிறதா என்ற கேள்வி எழுந்துள்ளது. 2024ஆம் ஆண்டில் நிறுவனங்களின் லாபம் கடந்த 15 ஆண்டுகளில் இல்லாத அளவுக்கு உயர்ந்ததாக 2025ஆம் ஆண்டுக்கான பொருளாதார ஆய்வறிக்கை குறிப்பிட்டிருந்தது. ஆனால், அதே காலகட்டத்தில் ஊழியர்களுக்கான செலவின வளர்ச்சி மந்தமடைந்ததாகவும் அதில் சுட்டிக்காட்டப்பட்டது.
தொழில்துறை புள்ளிவிவரங்களும் இந்த விவாதத்திற்கு கூடுதல் முக்கியத்துவம் அளிக்கின்றன. 2023-24ஆம் ஆண்டில் வேலைவாய்ப்பு வளர்ச்சி 5.6 சதவீதமாக இருந்ததாகவும், ஊழியர்களுக்கான மொத்த ஊதியச் செலவு 11.8 சதவீதம் உயர்ந்ததாகவும் கணக்கிடப்பட்டுள்ளது. அதே ஆண்டில் நிறுவனங்களின் லாபம் 10 சதவீதம் அதிகரித்திருந்தது. 2024-25ஆம் ஆண்டுக்கான சமீபத்திய தரவுகளின்படி, தொழிற்சாலைகளில் பணியாற்றியவர்களின் எண்ணிக்கை 7.2 சதவீதம் உயர்ந்து 2.1 கோடியாக அதிகரித்துள்ளது. ஊழியர்களுக்கான மொத்த ஊதியச் செலவு 12.1 சதவீதம் உயர்ந்து ரூ.8 லட்சம் கோடியாகவும், நிறுவனங்களின் லாபம் 7.7 சதவீதம் அதிகரித்து ரூ.11.6 லட்சம் கோடியாகவும் இருந்தது.
தனியார் நிறுவனங்களின் முதலீடுகள் போதுமான வேகத்தில் அதிகரிக்கவில்லை என்ற விமர்சனமும் கடந்த சில ஆண்டுகளாக இருந்து வருகிறது. இருப்பினும், சமீப மாதங்களில் முதலீடு மற்றும் நுகர்வு நடவடிக்கைகளில் ஓரளவு முன்னேற்றம் காணப்படுவதாகக் கூறப்படுகிறது. குறைக்கப்பட்ட ஜிஎஸ்டி வரி விகிதங்களால் பொருட்களின் நுகர்வு ஓரளவு வலுப்பெற்றதும் இதற்கு உதவியதாகக் கருதப்படுகிறது.
அரசின் வரிச் சலுகைகள் நிறுவனங்களின் வளர்ச்சிக்கு மட்டும் பயன்படாமல், நாட்டின் பொருளாதார வளர்ச்சிக்கும் சாதாரண மக்களின் வாழ்க்கைத் தர உயர்வுக்கும் உதவ வேண்டும் என்பதே இந்த விவாதத்தின் மையமாக உள்ளது. நிறுவனங்கள் தங்களது லாபத்தை அதிகரிப்பதோடு நிற்காமல், வேலைவாய்ப்புகளை உருவாக்கி ஊழியர்களின் சம்பளத்தையும் உயர்த்த வேண்டும் என்ற எதிர்பார்ப்பை அரசு வெளிப்படுத்தியுள்ளது. மறுபுறம், செலவின அழுத்தங்கள் மற்றும் சந்தைச் சூழலைக் கருத்தில் கொள்ள வேண்டும் என்று நிறுவனங்கள் வலியுறுத்துகின்றன. இந்த இரு தரப்புக்கும் இடையிலான அணுகுமுறை அடுத்த பட்ஜெட்டில் வரிச் சலுகைகள் தொடர்பான முடிவுகளில் எந்த அளவுக்குப் பிரதிபலிக்கும் என்பதுதான் தற்போது தொழில்துறையினரின் முக்கிய எதிர்பார்ப்பாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.