கனடாவில் உயர்கல்வி படிக்கச் செல்லும் இந்திய மாணவர்களுக்கு அந்நாட்டு குடிவரவு மற்றும் அகதிகள் துறை (IRCC) முக்கியமான எச்சரிக்கையை விடுத்துள்ளது. கனடாவில் படிக்கும் மாணவர்கள் பகுதி நேரமாக வேலை செய்து தங்களது செலவுகளைச் சமாளிப்பது வழக்கம். ஆனால், அனைத்து மாணவர்களுக்கும் வேலை செய்வதற்கு தானாகவே அனுமதி கிடைத்துவிடாது என்று குடிவரவு அதிகாரிகள் தெளிவுபடுத்தியுள்ளனர்.
மாணவர்களின் படிப்பு அனுமதிச் சான்றிதழில் (Study Permit) வேலை செய்வதற்கான உரிய நிபந்தனை இடம்பெற்றிருக்க வேண்டும். அந்த அனுமதி இல்லாமல் வேலை செய்தாலோ, அனுமதிக்கப்பட்ட நேரத்தைவிட அதிகமாகப் பணியாற்றினாலோ, மாணவர்களின் குடியேற்ற நிலை பாதிக்கப்படுவதுடன் எதிர்காலத்தில் கனடாவில் தங்குவதற்கான வாய்ப்புகளும் சிக்கலாகலாம்.
கனடாவின் குடிவரவு, அகதிகள் மற்றும் குடியுரிமைத் துறை வெளியிட்டுள்ள இந்த நினைவூட்டல், அங்கு படிக்கும் வெளிநாட்டு மாணவர்களின் கவனத்தை ஈர்த்துள்ளது. குறிப்பாக, இந்தியாவிலிருந்து ஆண்டுதோறும் ஆயிரக்கணக்கான மாணவர்கள் கனடாவுக்குச் சென்று படித்து வருகின்றனர். கல்விக் கட்டணம், வீட்டு வாடகை, உணவு மற்றும் போக்குவரத்துச் செலவுகள் அதிகமாக இருப்பதால், பல மாணவர்கள் படிப்புடன் சேர்த்து வேலை செய்ய விரும்புகின்றனர். இதற்கான விதிமுறைகளைச் சரியாகப் புரிந்துகொள்ளாமல் வேலைக்குச் செல்வது அவர்களுக்கு எதிர்பாராத சட்டச் சிக்கல்களை உருவாக்கலாம் என அதிகாரிகள் எச்சரிக்கின்றனர்.
கனடாவில் மாணவர்கள் வேலை செய்ய முடியுமா என்பதை முதலில் அவர்களது படிப்பு அனுமதிச் சான்றிதழில் குறிப்பிடப்பட்டுள்ள நிபந்தனைகளே தீர்மானிக்கின்றன. அதில் வளாகத்திற்குள் (On-campus) அல்லது வளாகத்திற்கு வெளியே (Off-campus) வேலை செய்ய அனுமதி இருப்பதாகத் தெளிவாகக் குறிப்பிடப்பட்டிருக்க வேண்டும். இதனுடன், மாணவர்கள் சம்பந்தப்பட்ட கல்வி நிறுவனத்திலும் உரிய வகையில் சேர்க்கப்பட்டிருக்க வேண்டும். வேலைக்கான தகுதிகளைப் பூர்த்தி செய்யாமல், அனுமதி கிடைத்துவிட்டதாகக் கருதி எந்த நிறுவனத்திலும் பணியில் சேரக் கூடாது என்று IRCC அறிவுறுத்தியுள்ளது.
வளாகத்திற்கு வெளியே வேலை செய்ய விரும்பும் மாணவர்களுக்கு சில முக்கிய நிபந்தனைகள் உள்ளன. அவர்கள் கனடா அரசால் அங்கீகரிக்கப்பட்ட கல்வி நிறுவனத்தில் (Designated Learning Institution – DLI) முழுநேர மாணவர்களாகப் படித்துக் கொண்டிருக்க வேண்டும். குறைந்தது ஆறு மாதங்கள் கொண்ட, பட்டம், டிப்ளமோ அல்லது சான்றிதழ் வழங்கும் கல்வித் திட்டத்தில் சேர்ந்திருக்க வேண்டும். மேலும், செல்லுபடியாகும் படிப்பு அனுமதியும், வேலை செய்யத் தேவையான சமூகக் காப்பீட்டு எண் (Social Insurance Number – SIN) என்பதும் அவசியம். படிப்பு தொடங்குவதற்கு முன்பே வேலை செய்ய முடியாது என்பதையும் மாணவர்கள் நினைவில் கொள்ள வேண்டும்.
வேலை நேரத்திற்கும் கனடா அரசு தெளிவான வரம்புகளை நிர்ணயித்துள்ளது. கல்வி வகுப்புகள் நடைபெறும் வழக்கமான செமஸ்டர் காலத்தில், தகுதி பெற்ற மாணவர்கள் வளாகத்திற்கு வெளியே வாரத்திற்கு அதிகபட்சம் 24 மணி நேரம் மட்டுமே வேலை செய்யலாம். ஒன்றுக்கும் மேற்பட்ட இடங்களில் வேலை செய்தாலும், மொத்த வேலை நேரம் இந்த வரம்பைத் தாண்டக் கூடாது. அதே நேரத்தில், கல்வி நிறுவனம் அதிகாரப்பூர்வமாக அறிவித்துள்ள கோடை அல்லது குளிர்கால விடுமுறை போன்ற திட்டமிட்ட இடைவேளைகளில், மாணவர்கள் தகுதி நிபந்தனைகளைப் பூர்த்தி செய்திருந்தால் முழுநேரமாக வேலை செய்ய அனுமதி உண்டு.
சில வகையான படிப்புகளில் சேரும் மாணவர்களுக்கு வளாகத்திற்கு வெளியே வேலை செய்ய அனுமதி கிடையாது. உதாரணமாக, ஆங்கிலம் அல்லது பிரெஞ்சு மொழியை இரண்டாம் மொழியாகக் கற்கும் (ESL/FSL) படிப்புகளில் மட்டும் சேர்ந்திருப்பவர்கள், பொதுவான ஆர்வத்திற்கான குறுகியகாலப் படிப்புகளை மேற்கொள்பவர்கள் ஆகியோர் இந்த வேலை அனுமதிக்குத் தகுதி பெற முடியாது. அதேபோல், படிப்பைத் தற்காலிகமாக நிறுத்தி வைக்கும் மாணவர்களும் அந்தக் காலகட்டத்தில் வளாகத்திற்கு வெளியே வேலை செய்ய அனுமதிக்கப்படுவதில்லை. இறுதிப் பருவத்தில் குறைந்த பாடங்களுடன் படிக்கும் சில மாணவர்களுக்கு மட்டும் குறிப்பிட்ட நிபந்தனைகளின் அடிப்படையில் விதிவிலக்கு வழங்கப்படுகிறது.
வளாகத்திற்குள் வேலை செய்வதற்கும் தனிப்பட்ட விதிமுறைகள் உள்ளன. செல்லுபடியாகும் படிப்பு அனுமதி வைத்திருப்பதுடன், அங்கீகரிக்கப்பட்ட கல்வி நிறுவனத்தில் முழுநேர மாணவராகப் படிப்பவர்களுக்கு வளாகத்திற்குள் வேலை செய்ய வாய்ப்பு இருக்கலாம். பல்கலைக்கழக நூலகம், புத்தக விற்பனை நிலையம், உணவகம், விளையாட்டு மையம் போன்ற இடங்களில் வேலை செய்யலாம். ஆனால், படிப்பு தொடங்கிய பிறகே பணியில் சேர முடியும். மேலும், வேலை செய்வதற்குத் தேவையான சமூகக் காப்பீட்டு எண்ணையும் (SIN) பெற்றிருக்க வேண்டும்.
இந்த விதிமுறைகளை மீறி வேலை செய்வது சாதாரண தவறாகக் கருதப்படாது. அனுமதிக்கப்பட்ட நேரத்தைவிட அதிகமாக வேலை செய்தாலோ, வேலை செய்ய அனுமதி இல்லாத நிலையில் பணியில் சேர்ந்தாலோ, மாணவர்களின் படிப்பு அனுமதி நிபந்தனைகள் மீறப்பட்டதாகக் கருதப்படும். இதனால் அவர்களின் மாணவர் குடியேற்ற அந்தஸ்து ரத்து செய்யப்படலாம். எதிர்காலத்தில் புதிய படிப்பு அனுமதி அல்லது வேலை அனுமதி பெறுவதிலும் சிக்கல்கள் ஏற்படலாம். சில சூழ்நிலைகளில் கனடாவை விட்டு வெளியேற வேண்டிய நிலையும் உருவாகலாம் என்று அந்நாட்டு குடிவரவு அதிகாரிகள் எச்சரிக்கின்றனர்.
படிப்பை முடித்த பிறகு கனடாவில் வேலை செய்ய விரும்புபவர்களும் தனியாக விதிமுறைகளைப் பின்பற்ற வேண்டும். அதற்காக முதுநிலைப் படிப்புக்குப் பிந்தைய வேலை அனுமதி (Post-Graduation Work Permit – PGWP) பெறுவதற்குத் தகுதி உள்ளதா என்பதைச் சரிபார்க்க வேண்டும். படிப்பு முடிந்துவிட்டதால் தானாகவே முழுநேர வேலை செய்யலாம் என்று நினைக்கக் கூடாது. உரிய அனுமதிக்கு விண்ணப்பித்து, விதிமுறைகளின்படி மட்டுமே பணியைத் தொடங்க வேண்டும். படிப்பு முடிந்த பிறகு வேலை அனுமதிக்காக விண்ணப்பித்து முடிவுக்காகக் காத்திருப்பவர்களுக்கு சில குறிப்பிட்ட நிபந்தனைகளின் கீழ் முழுநேரம் வேலை செய்ய அனுமதி வழங்கப்படலாம்.
வெளிநாட்டு மாணவர்களை குறிவைத்து வேலை வாய்ப்பு மற்றும் குடியேற்ற அனுமதி பெற்றுத் தருவதாகக் கூறி மோசடி செய்யும் நபர்களிடமும் எச்சரிக்கையாக இருக்க வேண்டும் என்று IRCC அறிவுறுத்தியுள்ளது. வேலை வாங்கித் தருவதாகக் கூறி பணம் கேட்பவர்கள் அல்லது போலியான அனுமதிச் சான்றிதழ்களை வழங்குபவர்களை நம்பி ஏமாற வேண்டாம். கனடா அரசின் அதிகாரப்பூர்வ இணையதளத்தில் மட்டுமே குடியேற்ற விதிமுறைகள் மற்றும் வேலை அனுமதி தொடர்பான தகவல்களைச் சரிபார்க்க வேண்டும்.
கனடாவில் படிக்கும் இந்திய மாணவர்கள் பகுதி நேர வேலைக்குச் செல்லும் முன்பு தங்களது படிப்பு அனுமதிச் சான்றிதழில் உள்ள நிபந்தனைகளை முழுமையாகப் படித்துப் புரிந்துகொள்ள வேண்டும். வாரத்திற்கு எத்தனை மணி நேரம் வேலை செய்யலாம், எந்த இடங்களில் பணியாற்றலாம், அதற்குத் தேவையான ஆவணங்கள் என்னென்ன என்பதை உறுதி செய்துகொள்ள வேண்டும். படிப்பை முடிப்பதற்காகச் செல்லும் மாணவர்கள், வேலை காரணமாகத் தங்களது எதிர்காலத்தையே கேள்விக்குறியாக்கிக் கொள்ள வேண்டாம் என்பதே கனடா குடிவரவு அதிகாரிகளின் முக்கிய அறிவுறுத்தலாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.