வங்கியில் பணத்தையும் நகைகளையும் பாதுகாப்பாக வைத்திருக்கலாம் என்ற நம்பிக்கையில் பலரும் லாக்கர் வசதியைப் பயன்படுத்துகின்றனர். ஆனால், பல ஆண்டுகளாகப் பயன்படுத்தி வந்த லாக்கர் தங்களுக்குத் தெரியாமலேயே ஒப்படைக்கப்பட்டுவிட்டதாக வங்கி கூறினால் எப்படி இருக்கும்? அதிலும், லாக்கரில் வைத்திருந்த பல லட்சம் ரூபாய் மதிப்புள்ள நகைகளும் காணாமல் போயிருந்தால் நிலைமை எப்படியிருக்கும்? டெல்லியில் பெண் ஒருவருக்கு ஏற்பட்ட இந்த அனுபவம் தற்போது வங்கிச் சேவையின் பொறுப்புகள் குறித்த விவாதத்தை ஏற்படுத்தியுள்ளது. இந்த விவகாரத்தில் வங்கியின் செயல்பாட்டில் குறைபாடு இருப்பதாகத் தீர்ப்பளித்த நுகர்வோர் ஆணையம், பாதிக்கப்பட்ட பெண்ணுக்கு ரூ.50.5 லட்சம் வழங்க உத்தரவிட்டுள்ளது.
டெல்லியைச் சேர்ந்த மோனிகா மார்வா என்பவர், தனது மாமனாருடன் இணைந்து யூனியன் வங்கியில் கூட்டுப் பாதுகாப்புப் பெட்டகத்தைப் பயன்படுத்தி வந்தார். கடந்த 1998ஆம் ஆண்டு இந்த லாக்கர் வசதி தொடங்கப்பட்டது. அவரது மாமனார் 2005ஆம் ஆண்டு அந்த லாக்கரைப் பயன்படுத்தியுள்ளார். பின்னர், 2010ஆம் ஆண்டு ஆகஸ்ட் 29ஆம் தேதி அவர் உயிரிழந்தார். அதன் பிறகும் லாக்கருக்கான வாடகைத் தொகை அவரது கணக்கிலிருந்து தொடர்ந்து வசூலிக்கப்பட்டு வந்துள்ளது.
2018ஆம் ஆண்டு செப்டம்பர் 1ஆம் தேதி மோனிகா வங்கிக்குச் சென்று லாக்கரைத் திறக்க முயன்றார். அப்போது அவருக்கு அதிர்ச்சியான தகவல் கிடைத்தது. அந்த லாக்கர் ஏற்கெனவே ஒப்படைக்கப்பட்டுவிட்டதாக வங்கி ஊழியர்கள் தெரிவித்துள்ளனர். குறிப்பாக, 2015ஆம் ஆண்டு ஜனவரி 22ஆம் தேதியே லாக்கர் ஒப்படைக்கப்பட்டதாக அவரிடம் கூறப்பட்டது. ஆனால், தான் ஒருபோதும் லாக்கரை ஒப்படைக்கக் கோரவில்லை என்றும், அது தொடர்பாக வங்கியிடமிருந்து எந்த அறிவிப்பும் வரவில்லை என்றும் மோனிகா தெரிவித்தார். அந்த லாக்கரில் சுமார் ரூ.47 லட்சம் மதிப்பிலான தங்க நகைகள் இருந்ததாகவும், அவை தற்போது காணாமல் போயுள்ளதாகவும் அவர் குற்றம்சாட்டினார். இதனால் அதிர்ச்சியடைந்த அவர், வங்கியின் அலட்சியத்தால் தனது சொத்துகள் இழக்கப்பட்டுள்ளதாகக் கூறி 2019ஆம் ஆண்டு டெல்லி மாநில நுகர்வோர் குறைதீர் ஆணையத்தை அணுகினார். நகைகளின் மதிப்புடன் வட்டி, மன உளைச்சலுக்கான இழப்பீடு மற்றும் வழக்குச் செலவுகளையும் வழங்க வேண்டும் எனக் கோரிக்கை வைத்தார்.
வங்கி இந்தக் குற்றச்சாட்டுகளை மறுத்தது. அந்த லாக்கர் 2015ஆம் ஆண்டில் அல்ல, 2005ஆம் ஆண்டு மே 21ஆம் தேதியே ஒப்படைக்கப்பட்டுவிட்டதாகத் தனது பதிலில் தெரிவித்தது. தொடர்ந்து வசூலிக்கப்பட்ட லாக்கர் வாடகை வங்கியின் தவறுதலால் நடந்ததாகவும் விளக்கம் அளித்தது. வாடிக்கையாளர் லாக்கரை ஒப்படைக்கும்போது அதில் பொருட்கள் எதுவும் இல்லாத நிலையில்தான் வங்கி அதை ஏற்றுக்கொள்ளும் என்றும் வாதிட்டது. வங்கியின் விளக்கத்தில் பல முரண்பாடுகள் இருப்பதை ஆணையம் கண்டறிந்தது. லாக்கர் ஒப்படைக்கப்பட்டதற்கான ரசீதை வங்கி சமர்ப்பிக்கவில்லை. மோனிகா லாக்கரை ஒப்படைக்க விருப்பம் தெரிவித்ததாகக் கூறும் எழுத்துப்பூர்வ விண்ணப்பமும் இல்லை. அதைவிட முக்கியமாக, லாக்கரில் இருந்த நகைகள் அவரிடம் திருப்பிக் கொடுக்கப்பட்டதற்கான எந்த ஆதாரத்தையும் வங்கி தாக்கல் செய்யவில்லை.
லாக்கர் ஒப்படைக்கப்பட்டதாகக் கூறப்பட்ட காலத்திற்குப் பிறகும் வாடகைத் தொகை வசூலிக்கப்பட்டிருப்பதும் ஆணையத்தின் கவனத்திற்கு வந்தது. குறிப்பாக, 2018ஆம் ஆண்டு செப்டம்பர் 25ஆம் தேதியும் வங்கிக் கணக்கிலிருந்து லாக்கர் வாடகை பிடித்தம் செய்யப்பட்டிருந்தது. இதுபோன்ற பதிவுகள் இருக்கும்போது, லாக்கர் ஏற்கெனவே ஒப்படைக்கப்பட்டுவிட்டது என்ற வங்கியின் வாதத்தை ஏற்க முடியாது என்று ஆணையம் முடிவு செய்தது. 2026ஆம் ஆண்டு அக்டோபர் 27ஆம் தேதி வழங்கப்பட்ட தீர்ப்பில், யூனியன் வங்கி சேவையில் குறைபாடு செய்துள்ளதாக ஆணையம் தெரிவித்தது. காணாமல் போன நகைகளின் மதிப்பான ரூ.47 லட்சத்தை மோனிகாவுக்கு வழங்க உத்தரவிட்டது. மேலும், 2018ஆம் ஆண்டு செப்டம்பர் 1ஆம் தேதி முதல் 2026ஆம் ஆண்டு அக்டோபர் 27ஆம் தேதி வரை ஆண்டுக்கு 6 சதவீத எளிய வட்டியையும் சேர்த்து வழங்க வேண்டும் எனத் தீர்ப்பளித்தது.
மன உளைச்சல் மற்றும் தொந்தரவுக்காக ரூ.3 லட்சமும், வழக்குச் செலவுகளுக்காக ரூ.50 ஆயிரமும் வழங்க வங்கிக்கு உத்தரவிடப்பட்டது. மொத்தமாக ரூ.50.5 லட்சம் இழப்பீடு வழங்க வேண்டும். இந்தத் தொகையை டிசம்பர் 27ஆம் தேதிக்குள் வங்கி செலுத்தினால் 6 சதவீத வட்டி பொருந்தும். தவறினால், 2018 செப்டம்பர் 1ஆம் தேதி முதல் தொகை கிடைக்கும் நாள் வரை ஆண்டுக்கு 9 சதவீத வட்டி செலுத்த வேண்டியிருக்கும். இந்தத் தீர்ப்பு வங்கிகளில் லாக்கர் வைத்திருப்பவர்களுக்கும் முக்கியமான எச்சரிக்கையாக அமைந்துள்ளது. லாக்கர் ஒப்பந்தம், வாடகை செலுத்திய ரசீதுகள், வங்கிக் கணக்கு விவரங்கள் போன்றவற்றைப் பாதுகாப்பாக வைத்திருக்க வேண்டும். லாக்கரை ஒப்படைக்கும்போது வங்கியிடமிருந்து எழுத்துப்பூர்வ ரசீது பெறுவதும் அவசியம். வங்கியின் பதிவுகளில் ஏற்படும் சிறிய தவறுகூட வாடிக்கையாளர்களுக்கு மிகப்பெரிய இழப்பை ஏற்படுத்தக்கூடும் என்பதை இந்தச் சம்பவம் உணர்த்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.