எல் நினோ என்பது வெறும் வானிலை மாற்றம் மட்டுமல்ல; உலக நாடுகளின் சுகாதாரத்தையும் பாதிக்கக்கூடிய மிகப்பெரிய சவாலாக உருவெடுத்துள்ளது. இதைக் கருத்தில் கொண்டு உலக சுகாதார அமைப்பு (WHO) தனது அவசரகால நடவடிக்கைகளை மிக உயர்ந்த நிலையான கிரேடு 3-க்கு உயர்த்தியுள்ளது. இந்தியா உள்ளிட்ட சில நாடுகள் சுகாதாரப் பாதிப்பு அதிகம் ஏற்படக்கூடிய ஆபத்தான நாடுகளின் பட்டியலில் இடம்பெற்றுள்ளன. குறிப்பாக, கடுமையான வெப்பம், மழைப்பொழிவு குறைவு, குடிநீர் தட்டுப்பாடு, டெங்கு மற்றும் மலேரியா போன்ற நோய்கள் அதிகரிக்கும் வாய்ப்பு இருப்பதால் முன்கூட்டியே எச்சரிக்கையுடன் இருக்க வேண்டும் என்று உலக சுகாதார அமைப்பு தெரிவித்துள்ளது.
பொதுவாக எல் நினோ என்றால் என்ன என்பது பலருக்கும் தெரிந்திருக்க வாய்ப்பில்லை. பசிபிக் பெருங்கடலின் மத்திய மற்றும் கிழக்குப் பகுதிகளில் கடல் நீரின் வெப்பநிலை வழக்கத்தைவிட அதிகரிக்கும் இயற்கையான காலநிலை நிகழ்வுதான் எல் நினோ. இந்த மாற்றம் உலகின் பல்வேறு பகுதிகளில் காற்றின் போக்கையும், மழைப்பொழிவையும், வெப்பநிலையையும் மாற்றக்கூடியது. இதன் காரணமாக சில நாடுகளில் கடுமையான வறட்சி ஏற்படலாம். மற்ற சில பகுதிகளில் வழக்கத்தைவிட அதிக மழை பெய்து வெள்ளப்பெருக்கு ஏற்படலாம்.
இந்தச் சூழலில், 2026 செப்டம்பர் 5ஆம் தேதி வெளியிடப்பட்ட உலக சுகாதார அமைப்பின் உலகளாவிய சுகாதார அபாய மதிப்பீட்டில் இந்தியா அதிக அல்லது மிக அதிக சுகாதார ஆபத்தை எதிர்கொள்ளும் நாடுகளில் ஒன்றாகக் குறிப்பிடப்பட்டுள்ளது. தெற்காசியாவின் பல பகுதிகளில் வழக்கத்தைவிட அதிக வெப்பநிலையும், குறைவான மழைப்பொழிவும் ஏற்படக்கூடும் என மதிப்பிடப்பட்டுள்ளது. இந்தியாவுடன் வங்கதேசம், நேபாளம், பூடான், இலங்கை, மாலத்தீவு உள்ளிட்ட நாடுகளும் இந்த அபாயத்தை எதிர்கொள்ளக்கூடும் என்று தெரிவிக்கப்பட்டுள்ளது.
இந்தியாவைப் பொறுத்தவரை முதலில் கவனிக்க வேண்டியது கடுமையான வெப்பநிலை. வெப்பம் தொடர்ந்து அதிகரித்தால் உடலில் நீர்ச்சத்து குறைதல், மயக்கம், வெப்பச் சோர்வு மற்றும் உயிருக்கு ஆபத்தை ஏற்படுத்தக்கூடிய வெப்பத் தாக்கம் போன்ற பிரச்சினைகள் ஏற்படலாம். ஏற்கெனவே இதய நோய், சிறுநீரகப் பாதிப்பு, சுவாசப் பிரச்சினை மற்றும் நீரிழிவு நோய் உள்ளவர்களுக்கு அதிக வெப்பம் கூடுதல் பாதிப்பை ஏற்படுத்தக்கூடும். குழந்தைகள், முதியவர்கள், கர்ப்பிணிகள் மற்றும் வெயிலில் வேலை செய்யும் தொழிலாளர்கள் அதிக கவனத்துடன் இருக்க வேண்டும் என்று எச்சரிக்கப்பட்டுள்ளது.
அடுத்ததாக டெங்கு, மலேரியா போன்ற கொசுக்கள் மூலம் பரவும் நோய்கள் அதிகரிக்கும் அபாயமும் உள்ளது. மழைப்பொழிவு மாறுபடுவதால் கொசுக்கள் இனப்பெருக்கம் செய்யும் இடங்களிலும் மாற்றம் ஏற்படலாம். குறிப்பாக வறட்சி ஏற்படும் காலங்களில் குடிநீரைச் சேமித்து வைப்பதற்காகப் பயன்படுத்தப்படும் திறந்தநிலைத் தொட்டிகள், பாத்திரங்கள் போன்றவற்றில் கொசுக்கள் முட்டையிட வாய்ப்புள்ளது. இதனால் தண்ணீரை மூடி வைப்பதும், வீட்டைச் சுற்றி தண்ணீர் தேங்காமல் பார்த்துக்கொள்வதும் அவசியமாகிறது. இந்தியாவில் டெங்கு பாதிப்பு அதிகமாகும் அபாயம் இருப்பதாகவும், வடகிழக்கு மாநிலங்களின் சில பகுதிகளில் மலேரியா குறித்தும் கண்காணிப்பு தேவை என்றும் உலக சுகாதார அமைப்பு தெரிவித்துள்ளது.
அதேபோல், மழை மற்றும் வெள்ளப்பெருக்கு ஏற்படும் பகுதிகளில் குடிநீர் மாசுபடுவதற்கான வாய்ப்பும் உள்ளது. இதனால் வயிற்றுப்போக்கு உள்ளிட்ட நீர்வழித் தொற்றுகள் பரவலாம். குறிப்பாக லெப்டோஸ்பைரோசிஸ் எனப்படும் எலிக்காய்ச்சல் பாதிப்பு குறித்தும் இந்தியா கவனமாக இருக்க வேண்டிய நாடுகளின் பட்டியலில் இடம்பெற்றுள்ளது. வெள்ளநீரில் நடப்பது, அசுத்தமான தண்ணீருடன் தொடர்பு கொள்வது போன்றவற்றால் இந்த நோய் பரவும் அபாயம் அதிகரிக்கலாம்.
எல் நினோவால் விவசாயமும் பாதிக்கப்பட வாய்ப்புள்ளது. மழை குறைந்தால் பயிர் விளைச்சல் பாதிக்கப்படலாம். இதனால் உணவுப் பொருட்களின் கிடைப்புத்தன்மை குறைந்து விலைகள் உயரக்கூடும். குறிப்பாக ஏழை மற்றும் நடுத்தரக் குடும்பங்கள் உணவுத் தேவைகளைப் பூர்த்தி செய்வதில் சிரமத்தைச் சந்திக்கலாம். குழந்தைகள், கர்ப்பிணிகள் மற்றும் பாலூட்டும் தாய்மார்களுக்கு ஊட்டச்சத்துக் குறைபாடு ஏற்படும் அபாயமும் அதிகரிக்கலாம்.
இந்த ஆபத்துகளைக் கருத்தில் கொண்டு உலக சுகாதார அமைப்பு அக்டோபர் 2026 முதல் செப்டம்பர் 2027 வரை கிரேடு 3 அவசரகால நடவடிக்கையைத் தொடங்கியுள்ளது. நோய்களைக் கண்காணிப்பது, பாதிப்பு ஏற்படுவதற்கு முன்பே எச்சரிக்கை விடுப்பது, மருத்துவமனைகளில் போதுமான மருந்துகள் மற்றும் மருத்துவ வசதிகளைத் தயார் நிலையில் வைத்திருப்பது போன்ற நான்கு முக்கிய அம்சங்களுக்கு முன்னுரிமை அளிக்கப்பட்டுள்ளது. முதல் ஆறு மாத நடவடிக்கைகளுக்காக சுமார் 35 மில்லியன் அமெரிக்க டாலர் நிதித் தேவையையும் உலக சுகாதார அமைப்பு குறிப்பிட்டுள்ளது. எல் நினோ நேரடியாக நோய்களை உருவாக்குகிறது என்று அர்த்தமல்ல. மாறாக, வெப்பநிலை மற்றும் மழைப்பொழிவில் ஏற்படும் மாற்றங்கள் ஏற்கெனவே உள்ள நோய்கள் பரவுவதற்குச் சாதகமான சூழலை உருவாக்கலாம் என்பதே நிபுணர்களின் எச்சரிக்கை. இதனால் ஒவ்வொரு பகுதியிலும் நிலவும் வானிலை மற்றும் சுகாதாரச் சூழலுக்கு ஏற்ப முன்னெச்சரிக்கை நடவடிக்கைகள் எடுக்கப்பட வேண்டும்.
பொதுமக்களைப் பொறுத்தவரை போதுமான அளவு தண்ணீர் குடிப்பது, வெயில் அதிகமாக இருக்கும் நேரங்களில் வெளியில் செல்வதைத் தவிர்ப்பது, கொசுக்கள் உற்பத்தியாகும் இடங்களை அகற்றுவது, குடிநீரைச் சுத்தமாகப் பராமரிப்பது போன்ற எளிய நடவடிக்கைகள் முக்கியமானவை. காய்ச்சல், உடல் சோர்வு அல்லது நீர்ச்சத்துக் குறைபாடு போன்ற அறிகுறிகள் ஏற்பட்டால் அலட்சியம் காட்டாமல் மருத்துவரை அணுக வேண்டும். எல் நினோவின் தாக்கம் ஒவ்வொரு பகுதியிலும் வெவ்வேறாக இருக்கலாம் என்பதால், வானிலை மற்றும் சுகாதாரத் துறை வெளியிடும் அதிகாரப்பூர்வ அறிவுறுத்தல்களைக் கவனிப்பதும் அவசியமாகும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.