அந்தியூர் கோட்டையில் மகுடம் சூடப்போவது யார்? திமுகவின் ஒரு சதவீத முன்னிலை நீடிக்குமா? - கருத்துக் கணிப்பு முடிவுகள்!

"மாலை முரசு - கான்சிலிடிக்ஸ்" இணைந்து தமிழகம் முழுவதும் நடத்திய மாபெரும் கருத்துக்கணிப்பு முடிவுகள் குறித்து "Tamil Nadu Political League" நிகழ்ச்சியில் அந்தியூர் தொகுதி பற்றியும், வரும் சட்டமன்ற தேர்தலில் அங்கு வெற்றிப் பெற அதிகம் வாய்ப்புள்ள கூட்டணி எது? என்பது குறித்த தகவல்கள் இங்கே தொகுக்கப்பட்டுள்ளன. ஈரோடு மாவட்டத்தின் முக்கியத் தொகுதியான அந்தியூர், அடர்ந்த வனப்பகுதிகள் மற்றும் மலைவாழ் மக்கள் அதிகம் வசிக்கும் ஒரு தனித்துவமான தொகுதியாகும். மிகவும் பிற்படுத்தப்பட்ட மற்றும் பழங்குடியின மக்கள் அதிக அளவில் வாழும் இந்தத் தொகுதியில், வரும் 2026 சட்டமன்றத் தேர்தலை ஒட்டி நிலவும் அரசியல் மாற்றங்கள் மற்றும் மக்களின் கோரிக்கைகள் குறித்து விரிவான கள ஆய்வு மேற்கொள்ளப்பட்டது.

அந்தியூர் தொகுதியின் முக்கிய வாக்காளர் அடையாளங்களை ஆய்வு செய்ததில், 18 முதல் 25 வயதுடைய இளைஞர்கள் 11.3 சதவீதம் பேரும், 26 முதல் 40 வயதுடையவர்கள் 27 சதவீதம் பேரும் உள்ளனர். 41 முதல் 60 வயதுடையவர்கள் 38 சதவீதமாகவும், 60 வயதிற்கு மேற்பட்டவர்கள் 22.9 சதவீதமாகவும் உள்ளனர். சமுதாய ரீதியாக வெள்ளாள கவுண்டர்கள் 34 சதவீதம் பேர் முதன்மையாக உள்ளனர். இவர்களுக்கு அடுத்தபடியாக வன்னியர்கள் 24 சதவீதம், அருந்ததியர்கள் 10 சதவீதம் மற்றும் ஆதிதிராவிடர்கள் 8 சதவீதம் எனப் பரவலாக உள்ளனர். இந்தத் தொகுதியானது 76 சதவீதம் கிராமப்புறங்களையும், 24 சதவீதம் நகர்ப்புறங்களையும் உள்ளடக்கிய ஒரு விவசாயம் சார்ந்த தொகுதியாகும்.

இங்கு நிலவும் முக்கிய உள்ளூர் பிரச்சினைகளாகப் பர்கூர் மலைவாழ் மக்களுக்கு எஸ்டி சான்றிதழ் பெறுவதில் உள்ள சிக்கல்கள் பெரிய குறையாக உள்ளது. வனப்பகுதியை ஒட்டியுள்ள கிராமங்களில் காட்டுப்பன்றி மற்றும் யானைகளால் பயிர்கள் தொடர்ந்து சேதமடைவது விவசாயிகளுக்குப் பெரும் கவலையை ஏற்படுத்தியுள்ளது. மயானங்களுக்குச் செல்லும் பாதைகள் மற்றும் சுற்றுச்சுவர் வசதிகள் இல்லாதது, சில பகுதிகளில் நிலவும் குடிநீர் தட்டுப்பாடு போன்றவை மக்களின் வேதனையாக உள்ளன. பழங்குடியின மக்களின் மேய்ச்சல் மற்றும் வாழ்வுரிமையை உறுதி செய்ய வேண்டும் என்பதும், நடமாடும் கால்நடை மருத்துவச் சேவைகளை அதிகரிக்க வேண்டும் என்பதும் மக்களின் நீண்ட காலக் கோரிக்கைகளாக உள்ளன.

கடந்த 2021 சட்டமன்றத் தேர்தல் முடிவுகளின்படி, திமுகவின் ஏ.ஜி. வெங்கடாசலம் 45.4 சதவீத வாக்குகளைப் பெற்று மிகக் குறைந்த இடைவெளியில் வெற்றி பெற்றார். அதிமுகவின் சண்முகவேல் 44.4 சதவீத வாக்குகளைப் பெற்று கடும் போட்டியை அளித்தார். அந்தத் தேர்தலில் திமுக 146 பூத்களில் வலுவாகவும், அதிமுக 99 பூத்களில் வலுவாகவும் இருந்த நிலையில், சுமார் 72 பூத்கள் ஸ்விங் நிலையில் இருந்தன. தொடர்ந்து 2024 நாடாளுமன்றத் தேர்தலில் திமுக கூட்டணி 41.1 சதவீத வாக்குகளைப் பெற்ற நிலையில், அதிமுக கூட்டணி 47 சதவீத வாக்குகளைப் பெற்று முன்னிலை பெற்றது. அப்போது ஸ்விங் பூத்களின் எண்ணிக்கை 98 ஆக உயர்ந்திருந்தது குறிப்பிடத்தக்கது.

தற்போதைய 'கான்சிலிடிக்ஸ்' குழுவினர் நடத்திய 2026 தேர்தல் கணிப்பின்படி, அந்தியூர் தொகுதியில் திமுக கூட்டணிக்கும் அதிமுக கூட்டணிக்கும் இடையே மிக நெருக்கமான போட்டி நிலவுகிறது. வரும் தேர்தலில் திமுக கூட்டணி வெற்றி பெற அதிக வாய்ப்புள்ளதாகக் கணிக்கப்பட்டுள்ளது. அதிமுக கூட்டணி 35 சதவீத வாக்குகளைப் பெறும் என்று எதிர்பார்க்கப்படுகிறது. தமிழக வெற்றிக் கழகம் மற்றும் நாம் தமிழர் கட்சி உள்ளிட்ட மற்ற அணிகள் இணைந்து சுமார் 20 சதவீத வாக்குகளைப் பிரிக்கக்கூடும். பூத் வாரியான தரவுகளின்படி, தற்போது திமுக 150 பூத்களில் வலுவான நிலையில் உள்ளதாகவும், அதிமுக 140 பூத்களில் வலுவாக உள்ளதாகவும் புள்ளிவிவரங்கள் கூறுகின்றன.

இந்தத் தொகுதியில் திமுக மற்றும் அதிமுக இடையேயான வெற்றி வித்தியாசம் வெறும் ஒரு சதவீதமாக மட்டுமே இருக்கும் என்று கணிக்கப்பட்டுள்ளது. சுமார் 70 பூத்கள் இன்னும் எந்தப் பக்கம் என்பதைத் தீர்மானிக்க முடியாத ஸ்விங் நிலையில் உள்ளதால், இந்தப் பூத்களில் அதிக வாக்குகளைப் பெறுபவர்களே அந்தியூர் கோட்டையைக் கைப்பற்றுவார்கள். தற்போதைய நிலவரப்படி திமுக கூட்டணி மிகக் குறைந்த வாக்குகள் வித்தியாசத்தில் ஒரு படி முன்னிலையில் இருப்பதாக இந்தக் கருத்துக்கணிப்பு முடிவுகள் தெரிவிக்கின்றன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.