தமிழக சட்டமன்றத் தேர்தல் 2026-க்கான வாக்குப்பதிவு இன்று காலை 7 மணிக்குத் தொடங்கி மாநிலம் முழுவதும் விறுவிறுப்பாக நடைபெற்று வருகிறது. ஆனால், திருச்சி தில்லை நகர் பகுதியில் உள்ள மக்கள் மன்றம் வாக்குச்சாவடி மையத்தில் மட்டும் அதிகாலை முதலே ஒருவித பரபரப்பான மற்றும் 'டென்ஷனான சூழல்' நிலவி வருகிறது. சரியாக 7 மணிக்குத் தொடங்க வேண்டிய வாக்குப்பதிவு, 7.15 மணி ஆகியும் தொடங்கப்படாததால் அங்கு நீண்ட வரிசையில் காத்திருந்த பொதுமக்கள் கடும் அதிருப்தி அடைந்தனர். இந்த வாக்குச்சாவடியில் வாக்களிக்க வந்த தமிழக நகராட்சி நிர்வாகத் துறை அமைச்சர் கே.என். நேருவும், வாக்குப்பதிவு தொடங்காததால் நீண்ட நேரமாக அங்கே காத்திருக்க வேண்டிய கட்டாயம் ஏற்பட்டது.
இந்தத் தாமதத்திற்கு முக்கியக் காரணமாகச் சொல்லப்படுவது விவிபேட் (VVPAT) இயந்திரத்தில் ஏற்பட்ட தொழில்நுட்பக் கோளாறுதான். வாக்குப்பதிவு தொடங்குவதற்கு முன்பாக அதிகாரிகள் செய்யும் 'மாக் போலிங்' (Mock Polling) சோதனையின்போது இயந்திரம் சரியாக வேலை செய்த நிலையில், அதிகாரப்பூர்வமாக வாக்குப்பதிவைத் தொடங்க முயன்றபோது இயந்திரத்தில் திடீர் பழுது ஏற்பட்டது. இதனால் வாக்காளர்கள் யாருக்கு வாக்களிக்கிறார்கள் என்பதை உறுதிப்படுத்தும் ரசீது இயந்திரத்தில் தொழில்நுட்ப சிக்கல் நீடித்தது. உடனே அங்கிருந்த தேர்தல் நடத்தும் அலுவலர்கள் மற்றும் தொழில்நுட்ப வல்லுநர்கள் அந்த இயந்திரத்தைச் சரி செய்யும் முயற்சியில் இறங்கினர். இருப்பினும், அந்த சிக்கலை உடனடியாகச் சரிசெய்ய முடியாததால் வாக்குப்பதிவு தற்காலிகமாக நிறுத்தி வைக்கப்பட்டது.
திருச்சி மாவட்டத்தின் மிக முக்கியத் தொகுதியாகப் பார்க்கப்படும் இந்த இடத்தில், அதிகாலை 6 மணிக்கே பொதுமக்கள் ஆர்வத்துடன் வந்து வரிசையில் நின்றனர். குறிப்பாக முதியவர்கள் மற்றும் பெண்கள் அதிகாலையிலேயே வந்துவிட்டால் வெயிலுக்கு முன் ஓட்டுப் போட்டுவிட்டுச் செல்லலாம் எனத் திட்டமிட்டிருந்தனர். ஆனால், 15 நிமிடங்களுக்கும் மேலாகியும் வரிசை நகரவில்லை என்பதை அறிந்ததும் மக்கள் அதிகாரிகளிடம் கேள்வி எழுப்பத் தொடங்கினர். இதே வாக்குச்சாவடியில்தான் அமைச்சர் கே.என்.நேருவும் தனது வாக்கைச் செலுத்த வந்திருந்தார். அமைச்சர் காத்திருக்கும் தகவல் பரவியதும் தில்லை நகர் பகுதியில் திமுக மற்றும் கூட்டணி கட்சித் தொண்டர்கள் அதிக அளவில் குவியத் தொடங்கியுள்ளனர்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்