கோவையில் நடைபெற்ற பாஜகவின் பிரம்மாண்ட மாநாட்டில் தமிழக பாஜகவின் முக்கிய தலைவர்களான நயினார் நாகேந்திரன் மற்றும் அண்ணாமலை ஆகியோர் கலந்துகொண்டு பேசினர். 'தமிழகம் தலைநிமிற தமிழனின் பயணம்' என்ற பெயரில் மலுமிச்சம்பட்டி பகுதியில் நடைபெற்ற இந்த மாநாட்டில், தமிழக அரசு மற்றும் திமுகவின் செயல்பாடுகளை அவர்கள் மிகக் கடுமையாக விமர்சித்தனர். குறிப்பாக, முதலமைச்சர் மு.க.ஸ்டாலின் தமிழை ஒரு கருவியாகப் பயன்படுத்திக்கொண்டு தமிழை விற்று வருவதாகவும், தனது மகனை முதலமைச்சராக்க வேண்டும் என்ற ஒரே நோக்கத்தில் செயல்பட்டு வருவதாகவும் நயினார் நாகேந்திரன் சாடினார்.
தேசிய ஜனநாயகக் கூட்டணியை வெற்றி பெறச் செய்யத் தானும் அண்ணாமலையும் இணைந்து ஆடும் ஆட்டம் இனிமேல் தான் இருக்கிறது என்று நயினார் நாகேந்திரன் சூளுரைத்தார். இந்த ஆட்டம் என்பது பிரதமர் மோடி மற்றும் உள்துறை அமைச்சர் அமித்ஷா ஆகியோர் தமிழகத்தில் எத்தகைய அரசியல் மாற்றத்தை ஏற்படுத்த நினைக்கிறார்களோ, அதைச் செயல்படுத்தும் ஆட்டமாக இருக்கும் என்று அவர் உறுதியளித்தார். மேலும், வரும் சட்டமன்றத் தேர்தலில் தேசிய ஜனநாயகக் கூட்டணி மிகப்பெரிய வெற்றியைப் பெறும் என்ற நம்பிக்கையையும் அவர் மேடையில் பதிவு செய்தார்.
திமுக அமைச்சர்கள் மீதான ஊழல் புகார்கள் குறித்தும் அவர் விரிவாகப் பேசினார். பிரதமர் மோடி தலைமையிலான மத்திய அமைச்சரவையில் ஒருவர் மீது கூட ஊழல் புகார் சொல்ல முடியாது என்றும், ஆனால் தமிழகத்தில் 17 அமைச்சர்கள் மீது ஊழல் மற்றும் அமலாக்கத்துறை வழக்குகள் இருப்பதாகவும் அவர் குறிப்பிட்டார். இந்த வழக்குகளில் இருந்து யாரும் தப்பிக்க முடியாது என்றும், வருமான வரித்துறை மற்றும் அமலாக்கத்துறை விசாரணைகள் அவர்களைச் சுற்றி வளைக்கும் என்றும் அவர் எச்சரிக்கை விடுத்தார்.
அண்ணாமலை அவர்கள் பேசுகையில், வரும் தேர்தலில் ஒரு ஓட்டு கூட திமுகவிற்குப் போய்விடக் கூடாது என்று பொதுமக்களைக் கேட்டுக்கொண்டார். திமுகவினர் பாஜகவையும் அதிமுகவையும் அடிமை கட்சிகள் என்று விமர்சிப்பதற்குப் பதிலடி கொடுத்த அவர், நாங்கள் மக்களுக்கு அடிமைகள் என்றும், மக்களை எஜமானர்களாக மதித்து அவர்களுக்காக உழைப்பவர்கள் என்றும் கூறினார். டெல்லிக்கு அடிமையாக இருப்பதாகச் சொல்லப்படும் விமர்சனங்களை ஒரு பெருமையாக ஏற்றுக்கொண்டு, தமிழக மக்களின் முன்னேற்றத்திற்காகக் களத்தில் நிற்போம் என்று அவர் முழக்கமிட்டார்.
மத்திய அரசின் திட்டங்கள் தமிழகத்திற்கு வந்து சேருவதில் உள்ள உண்மைகளை அவர் விளக்கினார். குறிப்பாக, 100 நாள் வேலைவாய்ப்புத் திட்டத்திற்காக இந்தியாவிலேயே அதிக நிதியைப் பெற்றது தமிழகம் தான் என்று அவர் சுட்டிக்காட்டினார். உத்தரப்பிரதேசம், மகாராஷ்டிரா போன்ற பாஜக ஆளும் மாநிலங்களை விடத் தமிழகத்திற்கு அதிக நிதி ஒதுக்கப்பட்டுள்ளது என்றும், ஆனால் முதலமைச்சர் இந்தத் திட்டத்தையே மத்திய அரசு ரத்து செய்துவிட்டதாகப் பொய்ப் பிரச்சாரம் செய்வதாகவும் அண்ணாமலை குற்றம் சாட்டினார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.