சினிமா எடுக்க இனி கோடிகள் தேவையில்லையா? AI சினிமாவை நோக்கி வேகமாக நகரும் சீனா

சினிமா தயாரிப்பில் அதிக செலவு, பெரிய படக்குழு, நீண்ட படப்பிடிப்பு என பல சவால்கள் இருக்கும் நிலையில், செயற்கை நுண்ணறிவு எனப்படும் AI தொழில்நுட்பம் அந்த நிலையை வேகமாக மாற்றி வருகிறது. குறிப்பாக சீனாவில் AI மூலம் திரைப்படங்கள் மற்றும் குறும்படங்களை உருவாக்கும் முயற்சிகள் வேகமெடுத்துள்ளன.

இதற்கு தொழில்நுட்ப நிறுவனங்கள் மட்டுமல்லாமல், அந்நாட்டின் பல நகரங்களும் பல்வேறு சலுகைகளை வழங்கி வருகின்றன. குறைந்த வாடகையில் அலுவலகம், கணினி திறன் பயன்படுத்துவதற்கான உதவி, மேகக் கணினி வசதிகள் என பல வழிகளில் AI படைப்பாளர்களை ஈர்க்கும் முயற்சி நடைபெற்று வருகிறது.

சீனாவில் AI மூலம் உருவாக்கப்படும் குறும்படங்கள் மற்றும் தொடர்களின் எண்ணிக்கை வேகமாக அதிகரித்து வருகிறது. இதன் பின்னணியில் முக்கிய காரணமாக தயாரிப்பு செலவு குறைவது பார்க்கப்படுகிறது. அந்நாட்டின் அரசு ஊடகமான CCTV வெளியிட்ட தகவலின்படி, 2026ஆம் ஆண்டின் தொடக்கத்தில் ஒரு நிமிட AI குறும்படத்தை உருவாக்க சுமார் 5,000 யுவான் வரை செலவானது.

ஆனால் ஆறு மாதங்களுக்குள் அதே அளவிலான தயாரிப்பு செலவு சில நூறு யுவானாக குறைந்துள்ளது. இதனால் குறைந்த முதலீட்டில் புதிய படைப்புகளை உருவாக்க விரும்பும் இளம் இயக்குநர்கள் மற்றும் சிறிய தயாரிப்பு நிறுவனங்களுக்கு AI ஒரு புதிய வாய்ப்பாக மாறியுள்ளது.

இதற்கு ஒரு உதாரணமாக ஹைனான் பகுதியைச் சேர்ந்த திரைப்பட இயக்குநர் மாணவர் பான் சியாஜுன் அனுபவத்தை கூறலாம். வழக்கமான முறையில் திருமணக் காட்சியை படமாக்க சுமார் 60,000 யுவான் செலவாகும் நிலையில், AI தொழில்நுட்பத்தை பயன்படுத்தி அதேபோன்ற காட்சியை சுமார் 1,400 யுவானில் உருவாக்கியதாக அவர் தெரிவித்துள்ளார்.

மேலும், உள்ளூர் அரசின் சலுகைகள் மற்றும் கணினி வசதிக்கான உதவிகள் கிடைத்ததால் அவரது செலவு மேலும் குறைந்ததாகவும் கூறப்படுகிறது. இதுபோன்ற அனுபவங்களே பல புதிய படைப்பாளர்களை AI திரைப்படத் துறையை நோக்கி அழைத்து வருகின்றன.

சீனாவின் பல நகரங்கள் தற்போது AI திரைப்பட நிறுவனங்களை தங்கள் பகுதிக்கு அழைப்பதில் போட்டியிடுகின்றன. ஷாங்காய் நகரம் AI மூலம் உருவாக்கப்படும் குறுந்தொடர்களுக்காக கணினி திறன் மற்றும் மேகக் கணினி அடிப்படையிலான AI மாதிரிகளை பயன்படுத்தும் வசதிகளை வழங்கும் திட்டங்களை அறிமுகப்படுத்தியுள்ளது.

பெய்ஜிங் நகரம் ஒலி-ஒளி தொழில்நுட்ப வளர்ச்சிக்காக 260 மில்லியன் யுவான் நிதியை ஒதுக்கியுள்ளது. அங்குள்ள ஹுவைரோ மாவட்டம் AI குறும்படங்களை உருவாக்குபவர்களின் கணினி செலவை குறைக்க சிறப்பு கூப்பன்களையும் வழங்குகிறது. ஷென்சென் நகரம் தொழில்நுட்ப உதவி மற்றும் குறைந்த வாடகை போன்ற சலுகைகளை வழங்கி வருகிறது.

AI மூலம் திரைப்படம் உருவாக்கும் இயக்குநர் ஜூ ஜிலியும் இதுபோன்ற ஆதரவுகளை பயன்படுத்தி வருகிறார். இரண்டு ஆண்டுகளுக்கு முன்பு தனது AI திரைப்பட நிறுவனத்தை தொடங்க ஷென்செனை தேர்வு செய்த அவர், தற்போது சீனாவின் பல நகரங்கள் மற்றும் தொழில் பூங்காக்களில் இருந்து தங்கள் பகுதியில் நிறுவனத்தை தொடங்குமாறு அழைப்புகள் வருவதாக தெரிவித்துள்ளார். குறைந்த அலுவலக வாடகை, வாழ்க்கைச் செலவுக்கான உதவி மற்றும் கணினி வசதி ஆகியவை AI திரைப்படத் துறையில் செயல்படுபவர்களுக்கு முக்கிய ஆதரவாக இருப்பதாக அவர் கூறியுள்ளார்.

திரைப்பட தயாரிப்பாளர்கள் மட்டுமின்றி, இணையத்தில் வீடியோக்களை வழங்கும் நிறுவனங்களும் AI உள்ளடக்கத்தை நோக்கி நகர்கின்றன. சீனாவின் பிரபலமான இணைய ஒளிபரப்பு நிறுவனமான iQIYI, AI மூலம் உருவாக்கப்படும் படைப்புகளை வெளியிடும் சில படைப்பாளர்களுக்கு நிதி உதவி வழங்குவதாக தெரிவித்துள்ளது. இதனால் AI தொழில்நுட்பம் வெறும் பரிசோதனை முயற்சியாக இல்லாமல், திரைப்படம் மற்றும் குறுந்தொடர் தயாரிப்பில் ஒரு வணிக வாய்ப்பாகவும் மாறத் தொடங்கியுள்ளது.

ஆனால் AI திரைப்படத் துறையின் வேகமான வளர்ச்சி புதிய சிக்கல்களையும் உருவாக்கியுள்ளது. ஒரே நேரத்தில் அதிக எண்ணிக்கையில் படைப்புகள் உருவாகும்போது, அவற்றை பார்க்கும் பார்வையாளர்கள் போதுமான அளவில் இருப்பார்களா என்ற கேள்வி எழுந்துள்ளது. DataEye வெளியிட்ட தகவலின்படி, 2026ஆம் ஆண்டின் முதல் ஆறு மாதங்களில் சீனாவின் Douyin தளத்தில் மட்டும் 2,21,900 புதிய AI நிகழ்ச்சிகள் வெளியிடப்பட்டன. ஆனால் அவற்றில் 1,055 படைப்புகள் மட்டுமே 10 கோடிக்கும் அதிகமான பார்வைகளை பெற்றன. இதனால் தயாரிப்பு அதிகரிப்பதுடன், பார்வையாளர்களின் கவனத்தை ஈர்ப்பது பெரிய சவாலாக மாறியுள்ளது.

AI படைப்புகள் தொடர்பாக பதிப்புரிமை மற்றும் நடிகர்களின் முகம், குரல் பயன்படுத்தப்படுவது குறித்தும் கேள்விகள் எழுந்துள்ளன. சில படைப்பாளர்கள் பிறரின் கதாபாத்திரங்கள் அல்லது காட்சிகளை அனுமதி இல்லாமல் AI உள்ளடக்கத்தில் பயன்படுத்துவதாக விமர்சனங்கள் உள்ளன. நடிகர்கள் மற்றும் குரல் கலைஞர்களும் தங்களுடைய வேலை வாய்ப்புகள் பாதிக்கப்படலாம் என்ற கவலையை வெளிப்படுத்தியுள்ளனர். சீனாவில் AI மூலம் உருவாக்கப்பட்ட உள்ளடக்கங்களுக்கு அவை AI உருவாக்கம் என்பதை தெளிவாக குறிப்பிடும் நடைமுறை உள்ளது. ஆனால் பதிப்புரிமை தொடர்பான அனைத்து விதிகளும் இன்னும் முழுமையாக உருவாகவில்லை.

அதே நேரத்தில், AI திரைப்படங்களை திரையரங்குகளுக்கும் கொண்டு செல்லும் முயற்சியும் தொடங்கியுள்ளது. Bona Film Group தயாரித்த 90 நிமிட அறிவியல் புனைகதை திரைப்படமான “Sanxingdui: Future Memories” சீனாவில் பொது திரையிடலுக்கான அனுமதியை பெற்றுள்ளது. பெரிய சீன திரைப்பட நிறுவனத்தால் உருவாக்கப்பட்ட AI படத்துக்கு கிடைத்த முக்கியமான அங்கீகாரமாக இது பார்க்கப்படுகிறது. இதுபோன்ற முயற்சிகள் வெற்றியடைந்தால், எதிர்காலத்தில் திரைப்படம் உருவாக்கும் முறையில் AI-ன் பங்கு மேலும் அதிகரிக்கக்கூடும்.

சீனாவின் தற்போதைய முயற்சி, AI தொழில்நுட்பத்தை திரைப்படத் துறையுடன் இணைப்பது மட்டுமல்லாமல், அதற்கான முழுமையான தொழில் சூழலை உருவாக்கும் முயற்சியாகவும் உள்ளது. தயாரிப்பு செலவு குறைதல், அரசின் ஆதரவு, கணினி வசதி மற்றும் இணைய ஒளிபரப்பு நிறுவனங்களின் ஈடுபாடு ஆகியவை புதிய வாய்ப்புகளை உருவாக்குகின்றன. அதே நேரத்தில், அதிகப்படியான உள்ளடக்கம், பதிப்புரிமை மற்றும் மனித கலைஞர்களின் பங்கு போன்ற கேள்விகளுக்கும் பதில் தேவைப்படுகிறது. AI திரைப்படத் துறையின் அடுத்த கட்ட வளர்ச்சி, தொழில்நுட்ப முன்னேற்றத்துடன் இந்த சிக்கல்களுக்கு எவ்வாறு தீர்வு காணப்படுகிறது என்பதையும் பொறுத்தே அமையும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்