வங்கதேசத்தின் முன்னாள் பிரதமர் ஷேக் ஹசீனா, இந்தியாவில் இருந்து மீண்டும் தனது தாய்நாட்டிற்குத் திரும்புவதற்கான நடவடிக்கைகளைத் தொடங்கியுள்ளார். இதன் ஒரு பகுதியாக, புதிய பாஸ்போர்ட் மற்றும் தேசிய அடையாள அட்டை வழங்குமாறு டெல்லியில் உள்ள வங்கதேசத் தூதரகத்திடம் கோரிக்கை விடுத்துள்ளார். வரும் டிசம்பர் மாதம் வங்கதேசம் திரும்பத் திட்டமிட்டுள்ள அவர், இதற்கான ஆவணங்களை விரைவாக வழங்க வேண்டும் என்றும் கேட்டுக்கொண்டுள்ளார். ஆனால், அவரது கோரிக்கையை வங்கதேச அரசு நிராகரித்துள்ளதுடன், அவரை ஒரு சாதாரணப் பயணியைப் போல நடத்த முடியாது என்றும் கடுமையான கருத்தைத் தெரிவித்துள்ளது. இதனால் இரு நாடுகளுக்கு இடையிலான அரசியல் மற்றும் தூதரக உறவுகளில் மீண்டும் பரபரப்பு ஏற்பட்டுள்ளது.
கடந்த 2024ஆம் ஆண்டு ஆகஸ்ட் மாதம் வங்கதேசத்தில் மாணவர்கள் தலைமையில் நடைபெற்ற போராட்டம் பெரும் வன்முறையாக மாறியது. அப்போது ஷேக் ஹசீனா தலைமையிலான அரசு கடுமையான நெருக்கடியைச் சந்தித்தது. போராட்டம் தீவிரமடைந்த நிலையில், ஆகஸ்ட் 5ஆம் தேதி அவர் தனது பிரதமர் பதவியை விட்டு வெளியேறி இந்தியாவுக்கு வந்தார். அன்றிலிருந்து அவர் இந்தியாவில் வசித்து வருகிறார். சுமார் 15 ஆண்டுகளாக வங்கதேச அரசியலில் முக்கிய அதிகாரம் செலுத்தி வந்த அவரது ஆட்சி, அந்தப் போராட்டத்துடன் முடிவுக்கு வந்தது.
மீண்டும் வங்கதேசம் திரும்ப வேண்டும் என்ற தனது விருப்பத்தை ஹசீனா தொடர்ந்து வெளிப்படுத்தி வந்தார். தற்போது அதற்கான முதல் முக்கிய நடவடிக்கையாக புதிய பயண ஆவணங்களைக் கோரியுள்ளார். லண்டனைச் சேர்ந்த மேட்ரிக்ஸ் சேம்பர்ஸ் சட்ட நிறுவனத்தைச் சேர்ந்த அவரது வழக்கறிஞர்கள், நவம்பர் 9ஆம் தேதி டெல்லியில் உள்ள வங்கதேசத் தூதரகத்தின் பொறுப்பு உயர் ஆணையர் ப்ரீத்தி ரஹ்மானுக்கு கடிதம் அனுப்பியுள்ளனர்.
அந்தக் கடிதத்தில், இடைக்கால அரசால் ஹசீனாவின் பழைய பாஸ்போர்ட் மற்றும் தேசிய அடையாள அட்டை ரத்து செய்யப்பட்டதாகத் தெரிவிக்கப்பட்டுள்ளது. அவர் வங்கதேசக் குடியுரிமை கொண்டவர் என்பதால், புதிய ஆவணங்களைப் பெறுவதற்கான உரிமை அவருக்கு இருப்பதாக வழக்கறிஞர்கள் வாதிட்டுள்ளனர். எனவே, புதிய பாஸ்போர்ட் மற்றும் அடையாள அட்டைக்கான விண்ணப்பங்களை விரைவாகப் பரிசீலித்து வழங்குவதற்கான நடைமுறைகளைத் தொடங்க வேண்டும் என்றும் கேட்டுக்கொண்டுள்ளனர்.
இந்தக் கோரிக்கைக்கு வங்கதேச அரசு உடனடியாக எதிர்ப்பு தெரிவித்துள்ளது. அந்நாட்டின் வெளியுறவுத் துறை இணையமைச்சர் ஹுமாயுன் கபீர், ஹசீனாவை ஒரு சாதாரணப் பயணியைப் போலக் கருதி பாஸ்போர்ட் வழங்க முடியாது என்று தெரிவித்துள்ளார். அவர் தலைமறைவான குற்றவாளி என்றும், இந்தியாவுடன் வங்கதேசம் ஒப்படைப்பு ஒப்பந்தம் வைத்திருப்பதால் அவரைத் தங்களிடம் ஒப்படைக்க வேண்டும் என்றும் வலியுறுத்தியுள்ளார்.
ஹசீனா தாய்நாட்டிற்குத் திரும்பியதும் நீதிமன்றத்தில் சரணடையத் திட்டமிட்டுள்ளதாகத் தெரிவித்துள்ளார். அவரது நாடு திரும்பும் தேதியைத் தேவையான ஆவணப் பணிகள் முடிந்த பிறகு அறிவிப்போம் என்று அவரது உதவியாளர்கள் கூறியுள்ளனர். தனது சொந்த மண்ணிலும் மக்களிடையிலும் வாழ விரும்புவதாகவும், விதி மரணத்தைத் தீர்மானித்திருந்தாலும் தனது நாட்டிலேயே அதை எதிர்கொள்ள விரும்புவதாகவும் அவர் அண்மையில் தெரிவித்திருந்தார்.
ஹசீனாவுக்கு எதிராக வங்கதேசத்தில் முக்கியமான சட்ட நடவடிக்கைகளும் நிலுவையில் உள்ளன. 2024ஆம் ஆண்டு மாணவர் போராட்டத்தின்போது நடைபெற்ற அடக்குமுறைக்கு உத்தரவிட்டதாகக் குற்றம்சாட்டப்பட்ட அவர், கடந்த 2025ஆம் ஆண்டு நவம்பரில் அந்நாட்டின் சர்வதேச குற்றவியல் தீர்ப்பாயத்தால் அவர் இல்லாத நிலையில் மரண தண்டனைக்கு உட்படுத்தப்பட்டார். இந்தத் தீர்ப்பையும் தன் மீதான குற்றச்சாட்டுகளையும் ஹசீனா மறுத்துள்ளார். விசாரணையின் நியாயத்தன்மை குறித்தும் அவர் கேள்வி எழுப்பியுள்ளார். ஐக்கிய நாடுகள் சபையின் கணக்கீட்டின்படி, அந்தப் போராட்டம் மற்றும் அதனைத் தொடர்ந்து ஏற்பட்ட வன்முறைகளில் சுமார் 1,400 பேர் உயிரிழந்துள்ளனர்.
ஹசீனாவின் அவாமி லீக் கட்சிக்குத் தற்போது வங்கதேசத்தில் தடை விதிக்கப்பட்டுள்ளது. கட்சியின் பல தலைவர்கள் சிறையில் உள்ளனர்; சிலர் வெளிநாடுகளில் தஞ்சமடைந்துள்ளனர். இத்தகைய சூழலில் ஹசீனா நாடு திரும்பினால், அங்கு மீண்டும் அரசியல் பதற்றம் அதிகரிக்கலாம் எனக் கருதப்படுகிறது. ஒருபுறம் ஹசீனா தனது நாட்டிற்குத் திரும்புவதற்கான ஆவணங்களைக் கோருகிறார். மறுபுறம் அவரை ஒப்படைக்க வேண்டும் என்பதில் வங்கதேச அரசு உறுதியாக உள்ளது. இந்த விவகாரத்தில் இந்தியாவின் அடுத்தகட்ட முடிவும் முக்கியத்துவம் பெற்றுள்ளது. ஹசீனாவின் கோரிக்கை, வங்கதேச அரசின் எதிர்ப்பு, நிலுவையில் உள்ள சட்ட நடவடிக்கைகள் எனப் பல சிக்கல்கள் இருப்பதால், அவரது டிசம்பர் மாத வருகை சாத்தியமாகுமா என்பது தற்போது கேள்விக்குறியாகியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.