பொதுவாக உணவகங்களுக்குச் செல்லும்போது குடும்பத்துடன் குழந்தைகளையும் அழைத்துச் செல்வது வழக்கம். ஆனால், கனடாவில் புதிதாகத் தொடங்கப்பட உள்ள ஒரு உணவகம், 15 வயதுக்குக் குறைவான குழந்தைகளுக்கு அனுமதி இல்லை என்று அதிரடியாக அறிவித்துள்ளது. பெரியவர்கள் அமைதியாக அமர்ந்து உணவு சாப்பிடவும், நண்பர்கள் மற்றும் குடும்பத்தினருடன் நேரத்தைச் செலவிடவும் ஏற்ற சூழலை உருவாக்குவதே இந்த முடிவுக்குக் காரணம் என்று உணவகத்தின் உரிமையாளர் தெரிவித்துள்ளார். இந்த அறிவிப்பு சமூக வலைதளங்களில் பெரும் விவாதத்தை ஏற்படுத்தியுள்ளது.
கனடாவின் வின்னிபெக் நகரில் தொடங்கப்பட உள்ள உணவகம்தான் 'மிஸ் கிறிஸ்டின்ஸ் கிச்சன்' (Miss Christine's Kitchen). ஜமைக்கா நாட்டு உணவு வகைகளை வழங்கும் இந்த உணவகம், வரும் நவம்பர் 30-ம் தேதி தனது புதிய கிளையைத் திறக்கத் திட்டமிட்டுள்ளது. உணவகத்தின் உரிமையாளரும் சமையல் கலைஞருமான கிறிஸ்டின் பட்டிசன், சமூக வலைதளத்தில் வெளியிட்ட அறிவிப்பில்தான் இந்தப் புதிய கட்டுப்பாடு குறித்த தகவலைத் தெரிவித்துள்ளார்.
அந்த அறிவிப்பில், தங்களது உணவகத்திற்கு வரும் வாடிக்கையாளர்கள் சுவையான உணவுகளைச் சாப்பிடுவதுடன், அமைதியான மற்றும் இனிமையான சூழலையும் அனுபவிக்க வேண்டும் என்பதே நோக்கம் என்று குறிப்பிட்டுள்ளார். குறிப்பாக, பெரியவர்கள் தங்களது அன்றாட வேலைப்பளுவில் இருந்து சிறிது நேரம் விடுபட்டு ஓய்வெடுக்கவும், காதல் ஜோடிகள் ஒன்றாக நேரம் செலவிடவும், முக்கியமான சந்திப்புகளை நடத்தவும் ஏற்ற இடமாக உணவகத்தை உருவாக்க விரும்புவதாகத் தெரிவித்துள்ளார்.
இதற்காகவே உணவகத்தின் உள்ளே 15 வயது மற்றும் அதற்கு மேற்பட்டவர்களுக்கு மட்டுமே அனுமதி வழங்கப்படும் என்று அறிவிக்கப்பட்டுள்ளது. அதாவது, 15 வயதுக்குக் குறைவான குழந்தைகள் உணவகத்தில் அமர்ந்து சாப்பிட அனுமதிக்கப்பட மாட்டார்கள். உணவகத்தின் அமைதியான சூழலைப் பாதுகாப்பதற்காக இந்த விதிமுறையை வாடிக்கையாளர்கள் மதிக்க வேண்டும் என்றும் உரிமையாளர் கேட்டுக்கொண்டுள்ளார். இந்த அறிவிப்பு வெளியானதும் சமூக வலைதளங்களில் ஆதரவும் எதிர்ப்பும் ஒருசேர எழுந்தன. சிலர் உணவக உரிமையாளரின் முடிவை வரவேற்றுள்ளனர். குழந்தைகளை வளர்ப்பது பெற்றோருக்கு எவ்வளவு பொறுப்பான வேலை என்பது தங்களுக்குத் தெரியும் என்றும், அதனால் சில நேரங்களில் குழந்தைகள் இல்லாமல் அமைதியாக உணவு சாப்பிட விரும்புவது இயல்பானது என்றும் கருத்து தெரிவித்துள்ளனர்.
மூன்று குழந்தைகளுக்குத் தந்தையான ஒருவர், இந்த முடிவை முழுமையாக ஆதரிப்பதாகப் பதிவிட்டுள்ளார். எல்லா உணவகங்களும் குழந்தைகளுக்கு ஏற்ற வகையில் இருக்க வேண்டிய அவசியமில்லை என்றும் அவர் குறிப்பிட்டுள்ளார். மற்றொரு பயனர், குழந்தைகளை வீட்டில் விட்டுவிட்டு இதுபோன்ற பெரியவர்களுக்கான உணவகத்திற்குச் செல்வதில் மகிழ்ச்சி அடைவேன் என்று தெரிவித்துள்ளார். குழந்தைகள் இல்லாத வாழ்க்கையைத் தேர்ந்தெடுத்தவர்களும் இதுபோன்ற உணவகங்கள் அதிகரிக்க வேண்டும் என்று கருத்து தெரிவித்துள்ளனர்.
இந்த முடிவை அனைவரும் ஏற்றுக்கொள்ளவில்லை. உணவகம் என்பது குடும்பத்தினர் அனைவரும் ஒன்றாகச் சென்று உணவு சாப்பிடும் இடம் என்றும், அங்கு வயது அடிப்படையில் கட்டுப்பாடு விதிப்பது சரியான அணுகுமுறை அல்ல என்றும் சிலர் எதிர்ப்பு தெரிவித்துள்ளனர். மதுபான விடுதி போன்ற இடங்களில் வயது வரம்பு இருப்பதைப் புரிந்துகொள்ள முடியும்; ஆனால் சாதாரண உணவகத்தில் குழந்தைகளுக்கு ஏன் அனுமதி மறுக்க வேண்டும் என்றும் கேள்வி எழுப்பியுள்ளனர்.
குழந்தைகளையும் அவர்களது குடும்பத்தினரையும் உணவகத்தில் இருந்து விலக்குவது சமூகத்தில் அனைவரையும் உள்ளடக்கும் எண்ணத்திற்கு எதிரானது என்றும் சிலர் விமர்சித்துள்ளனர். இந்த எதிர்ப்புகள் காரணமாக உணவகத்தின் உரிமையாளருக்கும் சமூக வலைதளங்களில் கடுமையான விமர்சனங்கள் எழுந்துள்ளன. எதிர்மறையான கருத்துகள் சிலவற்றை அவர் தனது பதிவிலிருந்து நீக்கியதாகவும் தகவல் வெளியாகியுள்ளது. உணவகம் இன்னும் வாடிக்கையாளர்களுக்காகத் திறக்கப்படாத நிலையிலேயே சிலர் ஒரு நட்சத்திர மதிப்பீடுகளை வழங்கியதாக உரிமையாளர் தெரிவித்துள்ளார். உணவகத்தில் உணவு சாப்பிட்ட அனுபவமே இல்லாமல் எதிர்மறையான விமர்சனங்கள் பதிவு செய்யப்பட்டதாகக் கூறிய அவர், அவற்றை சம்பந்தப்பட்ட மதிப்பீட்டு இணையதளங்களில் இருந்து நீக்கவும் முயற்சி மேற்கொண்டுள்ளார்.
தனது முடிவுக்கான காரணத்தை விளக்கிய கிறிஸ்டின் பட்டிசன், பெற்றோர்கள் தங்கள் குடும்பத்திற்காகக் கடுமையாக உழைக்கிறார்கள். அவர்களுக்கும் குழந்தைகளைப் பற்றிய கவலை இல்லாமல் சிறிது நேரம் அமைதியாக அமர்ந்து உணவு சாப்பிடவும், ஓய்வெடுக்கவும் வாய்ப்பு கிடைக்க வேண்டும் என்று தெரிவித்துள்ளார். குழந்தைகளுக்கு அனுமதி மறுப்பதால் அவர்கள் தனது உணவுகளைச் சாப்பிடவே முடியாது என்று அர்த்தமில்லை என்றும், உணவுகளை வீட்டிற்கு எடுத்துச் செல்லும் வகையில் வாங்கிக்கொள்ளலாம் என்றும் அவர் கூறியுள்ளார்.
ஒரு பக்கம் குழந்தைகளுடன் வரும் குடும்பங்களுக்கும் உணவகங்களில் இடம் அளிக்க வேண்டும் என்ற கருத்து வலுப்பெற்று வருகிறது. மறுபக்கம், பெரியவர்களுக்கென அமைதியான உணவு அனுபவத்தை வழங்கும் இடங்களும் இருக்கலாம் என்ற ஆதரவும் அதிகரித்துள்ளது. கனடாவில் தொடங்கப்பட உள்ள இந்த உணவகத்தின் முடிவு, உணவகங்களின் உரிமைகள், வாடிக்கையாளர்களின் விருப்பங்கள் மற்றும் குழந்தைகளுக்கான பொது இடங்களின் அணுகல் குறித்து புதிய விவாதத்தை உருவாக்கியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.