அமெரிக்கா மற்றும் ஈரான் நாடுகளுக்கு இடையே தற்போது மீண்டும் போர் மூளும் சூழல் நிலவி வருகிறது. இந்த இக்கட்டான நேரத்தில், பாகிஸ்தான் தனது ராஜதந்திர நகர்வுகளை மிகவும் சாமர்த்தியமாக மேற்கொண்டு வருவதாக பிரபல பத்திரிகையாளர் மெஹ்தி ஹசன் தெரிவித்துள்ளார். இதுகுறித்து அவர் ஒரு செய்தி நிறுவனத்திற்கு அளித்த சிறப்புப் பேட்டியில், பாகிஸ்தான் தலைவர்கள் அதிபர் டொனால்ட் ட்ரம்பை கையாளுவதில் மிகவும் கில்லாடிகளாக செயல்படுவதாக அவர் குறிப்பிட்டுள்ளார். ட்ரம்பின் ஈகோவைத் தட்டி எழுப்பினால் அவரிடமிருந்து எதையும் சாதிக்க முடியும் என்பதை பாகிஸ்தான் நன்றாகப் புரிந்து வைத்துள்ளது. இதனால்தான் அமெரிக்காவின் வெளியுறவுக் கொள்கை என்பது தற்போது தனிப்பட்ட உறவுகளைச் சார்ந்தே அமைந்துள்ளதாக அவர் சாடியுள்ளார்.
பாகிஸ்தான் பிரதமர் ஷேபாஸ் ஷெரீப் போன்ற தலைவர்கள் ட்ரம்பை புகழ்ந்து தள்ளுவதில் ஒரு நல்ல வேலையைச் செய்திருக்கிறார்கள் என்று மெஹ்தி ஹசன் கிண்டலாகக் கூறியுள்ளார். குறிப்பாக, அமைதிக்கான நோபல் பரிசுக்கு ட்ரம்பை பரிந்துரைப்போம் என்று கூறுவதன் மூலம், ட்ரம்பின் கவனத்தைத் தங்கள் பக்கம் ஈர்க்க அவர்கள் முயற்சி செய்கிறார்கள். இது ஒரு ஸ்மார்ட் மூவ் என்று மெஹ்தி ஹசன் வர்ணித்துள்ளார். அமெரிக்காவின் வெளியுறவுக் கொள்கை என்பது பகிரப்பட்ட மதிப்புகளின் அடிப்படையில் இல்லாமல், யார் அதிகமாக புகழ்கிறார்களோ (Flatters) அவர்களுக்குச் சாதகமாகவே அமைகிறது. இதில் பாகிஸ்தான் தற்போது முன்னணியில் உள்ளதாக அவர் சுட்டிக்காட்டியுள்ளார்.
இந்த உறவின் மையப்புள்ளியாக பாகிஸ்தான் ராணுவ தளபதி ஆசிம் முனீர் திகழ்கிறார். சமீபத்தில் பீல்டு மார்ஷலாக பதவி உயர்வு பெற்ற அவர், அமெரிக்க அதிபரை வெள்ளை மாளிகையில் தனியாகச் சந்தித்துப் பேசியுள்ளார். பாகிஸ்தான் ராணுவ வரலாற்றிலேயே ஒரு ஜெனரல் அமெரிக்க அதிபரை இப்படித் தனியாகச் சந்திப்பது இதுவே முதல்முறை என்று மெஹ்தி ஹசன் நினைவுபடுத்தியுள்ளார். இந்த நெருக்கமான உறவின் மூலம் ஈரானுடனான பேச்சுவார்த்தையில் பாகிஸ்தான் ஒரு முக்கிய இடத்தைப் பிடிக்கப் பார்க்கிறது. ஒருவேளை இந்த பேச்சுவார்த்தையில் உடன்பாடு ஏற்பட்டால், ட்ரம்ப் மற்றும் ஆசிம் முனீர் இடையிலான நட்பு இன்னும் பலப்படும் என்று அவர் கூறியுள்ளார்.
ஈரான் உடனான மோதலைத் தீர்ப்பது என்பது அவ்வளவு எளிதான காரியம் அல்ல என்றும் மெஹ்தி ஹசன் எச்சரித்துள்ளார். ஒரு ஹோட்டல் அறையில் அமர்ந்து ஒரு வார இறுதியில் பேசித் தீர்க்கும் அளவிற்கு இது சிறிய பிரச்சனை கிடையாது. ஒபாமா காலத்தில் போடப்பட்ட அணுசக்தி ஒப்பந்தம் பல ஆண்டுகள் விவாதிக்கப்பட்டு, பல உலக நாடுகளின் ஒத்துழைப்புடன் உருவானது. ஆனால் தற்போதுள்ள ஜே.டி. வேன்ஸ் போன்றவர்கள் இதைச் சில மணிநேரங்களில் முடித்துவிடலாம் என்று நினைப்பது முட்டாள்தனம். இந்த பேச்சுவார்த்தைகள் மாதக்கணக்கிலோ அல்லது ஆண்டுகணக்கிலோ நீடித்தால், அது உலக நாடுகளுக்குப் பெரிய பாதிப்பை ஏற்படுத்தும் என்று அவர் கவலை தெரிவித்துள்ளார்.
தற்போதுள்ள ஈரான் தலைவர்கள் அவ்வளவு சீக்கிரம் அமெரிக்காவிடம் சரணடைய மாட்டார்கள் என்று மெஹ்தி ஹசன் தெளிவாகக் கூறியுள்ளார். பேச்சுவார்த்தையில் கலந்துகொள்வது குறித்து ஈரான் இன்னும் எந்த முடிவும் எடுக்கவில்லை. அமெரிக்கா தனது ராஜதந்திரத்தில் நேர்மையாக இல்லை என்றும், பொருளாதார மற்றும் ராணுவ ரீதியான அழுத்தங்களைக் கொடுத்துப் பேச்சுவார்த்தைக்கு அழைப்பது வேலைக்கு ஆகாது என்றும் ஈரான் தரப்பில் கூறப்படுகிறது. அதே நேரத்தில் ஹார்முஸ் ஜலசந்தியில் கப்பல்கள் தாக்கப்படுவதற்கு ஈரான்தான் காரணம் என்று அமெரிக்கா தொடர்ந்து குற்றம் சாட்டி வருகிறது.
இஸ்லாமாபாத், புது தில்லி அல்லது மஸ்கட் என எந்த இடத்தில் பேச்சுவார்த்தை நடந்தாலும், இரு நாடுகளுக்கும் இடையே உண்மையான புரிதல் இருந்தால் மட்டுமே தீர்வு கிடைக்கும். ஆனால் தற்போதுள்ள சூழலில் இரு தரப்பும் ஒருவரை ஒருவர் நம்பத் தயாராக இல்லை. பாகிஸ்தான் இந்தச் சூழலைத் தனக்குச் சாதகமாகப் பயன்படுத்தி அமெரிக்காவிடம் சலுகைகளைப் பெறத் துடிக்கிறது. ட்ரம்பின் 'அமெரிக்கா ஃபர்ஸ்ட்' கொள்கை எந்த நேரத்தில் எப்படி மாறும் என்று தெரியாத நிலையில், பாகிஸ்தானின் இந்த அதீத நெருக்கம் அந்த நாட்டுக்கு நீண்ட கால அடிப்படையில் பலன் தருமா என்பது சந்தேகம்தான் என்று மெஹ்தி ஹசன் தனது பேட்டியை முடித்துள்ளார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.