தெஹ்ரானில் இஸ்ரேல் படை நடத்திய தாக்குதலில் ஈரானின் உளவுத்துறை அமைச்சர் இஸ்மாயில் கதிப் கொல்லப்பட்டதாக இஸ்ரேல் கூறியுள்ள நிலையில், மேலும் பதட்டம் அதிகரித்துள்ளது.
ஈரானின் மீது இரவில் இஸ்ரேல் நடத்திய தாக்குதலில் உளவுத்துறை அமைச்சர் இஸ்மாயில் கதிப் கொல்லப்பட்டதை ஈரான் அதிபர் மசூத் பெஷெஷ்கியன் உறுதிப்படுத்தியுள்ளார். இதன்மூலம், உயர் பதவியில் உள்ள ஈரான் அதிகாரி ஒருவர் படுகொலை செய்யப்படுவது இது மூன்றாவது முறையாகும். X தளத்தில் இஸ்ரேலிய பாதுகாப்புப் படை, "தெஹ்ரானில் நடத்தப்பட்ட தாக்குதலில், ஈரானிய பயங்கரவாத ஆட்சியின் உளவுத்துறை அமைச்சர் 'இஸ்மாயில் கதிப் கொல்லப்பட்டார்'. ஈரான் முழுவதும் சமீபத்தில் நடந்த போராட்டங்களின் போது, போராட்டக்காரர்களைக் கைது செய்தல் மற்றும் கொல்லுதல் உட்பட்ட பல செயல்களில், கதிப் முக்கியப் பங்காற்றினார். மேலும், உலகம் முழுவதும் உள்ள இஸ்ரேலியர்கள் மற்றும் அமெரிக்கர்களுக்கு எதிராக பயங்கரவாத நடவடிக்கைகளை அவர் வழிநடத்தினார். இதேபோல், மகாசா அமினி போராட்டங்களின் (2022–2023) போதும் அவர் ஈரானிய குடிமக்களுக்கு எதிராகச் செயல்பட்டார். ஈரானிய உளவுத்துறை அமைச்சகம் மேம்பட்ட உளவுத் திறன்களைக் கொண்டுள்ளது. அது கண்காணிப்பு, உளவு பார்த்தல் மற்றும் உலகம் முழுவதும், குறிப்பாக இஸ்ரேலிய மற்றும் ஈரானிய குடிமக்களுக்கு எதிரான இரகசிய நடவடிக்கைகளை மேற்கொள்வதை மேற்பார்வையிடுகிறது" என்று தங்களது 'X' தளத்தில் குறிப்பிட்டிருந்தனர்.
யார் இந்த இஸ்மாயில் கதிப்:
இஸ்மாயில் கதிப், ஈரானிய மதகுரு மற்றும் அரசியல்வாதி ஆவார். இவர் ஆகஸ்ட் 2021 முதல் மார்ச் 2026ல் தனது மரணம் வரை நாட்டின் உளவுத்துறை அமைச்சராகப் பணியாற்றினார். முன்னாள் ஜனாதிபதி இப்ராஹிம் ரைசியால் நியமிக்கப்பட்ட இவர், ஈரானின் பாதுகாப்பு அமைப்பில் ஒரு முக்கிய நபராகக் கருதப்பட்டார். 2024 மே மாதம் ஹெலிகாப்டர் விபத்தில் ரைசி இறந்த பிறகு, மசூத் பெஷெஷ்கியன் ஈரானின் ஜனாதிபதியானார், மேலும் கதிபை நாட்டின் உளவுத்துறைத் தலைவர் என்ற அவரது பதவியில் தக்கவைத்துக் கொண்டார். 1961ம் ஆண்டு பிறந்த கதீப், இஸ்லாமியக் குடியரசின் பாதுகாப்பு அமைப்புடன் நெருங்கிய தொடர்புகளைக் கொண்டிருந்த ஒரு மதகுரு.1980களின் முற்பகுதியில் இஸ்லாமியப் புரட்சிகரப் பாதுகாப்புப் படை (IRGC) என்ற உளவு அமைப்பின் நிறுவன உறுப்பினர்களில் ஒருவராகவும் இவர் இருந்தார்.
மேலும், கதிப் 2012 முதல் 2019 வரை நீதித்துறையின் பாதுகாப்பு மற்றும் புலனாய்வு மையத்திற்குத் தலைமை வகித்தார். இவர் காமேனிக்கு மட்டுமின்று அவரது இரண்டாவது மகனான ஈரானின் புதிய உச்ச தலைவர் மொஜ்தபா கமெனிக்கும் நெருக்கமானவராக இருந்தார். 2022ல் கதிப் மீது அமெரிக்க கருவூலத் துறை தடை இவருக்கு விதித்தது. மேலும், ஜூன் 12, 2009 அன்று அல்லது அதற்குப் பிறகு, ஈரானில் உள்ள நபர்கள், ஈரானிய குடிமக்கள் அல்லது மேற்கூறியவர்களின் குடும்ப உறுப்பினர்களுக்கு எதிராகக் கடுமையான மனித உரிமை மீறல்களைச் செய்ததற்கு உடந்தையாக இருந்தது, அல்லது அச்செயல்களுக்கு உத்தரவிட்டது, கட்டுப்படுத்தியது போன்ற காரணத்திற்காக அவர், கருவூலத் துறை தடை பட்டியலில் சேர்க்கப்பட்டார்.
மேலும், கதிப் தலைமையிலான உளவுத்துறை அமைச்சகம், “ஈரானிய பயங்கரவாத ஆட்சியின் முதன்மை உளவு அமைப்பாகும்; அது அந்த ஆட்சியின் அடக்குமுறை மற்றும் பயங்கரவாத நடவடிக்கைகளுக்கு ஆதரவளிப்பதிலும் முக்கியப் பங்கு வகித்தது” என்று இஸ்ரேலிய இராணுவம் கூறுகிறது. "செயல்பாட்டு மற்றும் உளவுத்துறை ரீதியான வாய்ப்பு ஏற்படும் பட்சத்தில், கூடுதல் ஒப்புதல் தேவையின்றி எந்தவொரு மூத்த ஈரானிய அதிகாரியையும் கொல்லவும் (இஸ்ரேல் பாதுகாப்புப் படைகளுக்கு) நான் அதிகாரம் அளித்துள்ளேன்," என்று காட்ஸ் மிரட்டும் விதத்தில் கூறியிருக்கிறார்.
மேலும், ஈரானின் புதிய உச்ச தலைவர் மற்றும் கதிப் உள்ளிட்ட பிற உயர் அதிகாரிகள் பற்றிய தகவல்களுக்கு, அமெரிக்க வெளியுறவுத்துறை 10 மில்லியன் டாலர் வெகுமதியை அறிவித்தது. இவர்மட்டுமின்றி, பல தசாப்தங்களாகத் தொடரும் பாலஸ்தீனியத் தலைவர்களின் படுகொலைகளின் வரிசையில், காசாவிற்கு உள்ளேயும் வெளியேயும் ஏராளமான ஹமாஸ் தலைவர்கள் படுகொலை செய்யப்பட்டுள்ளனர் என்பது தொடர்ந்த வண்ணமே இருக்கிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.